ઊંઝા APMCમાં ખેડૂત પેનલમાં ભાજપના પાંચ ઉમેદવારો હાર્યા, દિનેશ પટેલનો દબદબો

ઊંઝા એપીએમસીની હાઇવોલ્ટેજ ચૂંટણીનું પરિણામ સામે આવ્યું છે. ખેડૂત વિભાગની 10 અને વેપારી વિભાગની 4 બેઠકો માટે ચૂંટણી યોજાઈ હતી. કુલ 14 બેઠકો માટે સરેરાશ 98 ટકા મતદાન થયું હતું. જેના પરિણામો મંગળવારે (17 ડિસેમ્બર) સામે આવ્યા છે. ખેડૂત વિભાગની મતગણતરીના અંતે ભાજપે મેન્ડેટ આપેલા 10માંથી 5 અને પાંચ અપક્ષ ઉમેદવારોની જીત થઈ છે. 

નોંધનીય છે કે, ભાજપના મેન્ડેટવાળા પાંચ તેમજ જીતેલા પાંચ અપક્ષ ઉમેદવારોને APMCના પૂર્વ ચેરમેન દિનેશ પટેલનો ટેકો હતો. તેથી કહી શકાય કે, દિનેશ પટેલના દસે દસ ઉમેદવારોની ભવ્ય જીત થઈ છે અને ધારાસભ્ય કિરીટ પટેલની પેનલના તમામ ઉમેદવારોની કારમી હાર થઈ છે. જોકે, વેપારી વિભાગની મતગણતરી હવે શરુ થશે. 

ઊંઝા APMCમાં ખેડૂત વિભાગના વિજેતા ઉમેદવારની યાદી

મેન્ડેડ ઉમેદવાર

અંબાલાલ પટેલ
કનુભાઈ પટેલ
ધીરેન્દ્ર કુમાર પટેલ
પ્રહ્લાદભાઈ પટેલ
ભગવાનભાઈ પટેલ
 
અપક્ષ ઉમેદવાર

બળદેવભાઈ પટેલ
રાજેન્દ્રકુમાર પટેલ
લીલાભાઈ પટેલ
શૈલેષભાઈ પટેલ
જયંતીભાઈ પટેલ 

ભાજપના પાંચ ઉમેદવારોની કારમી હાર

ઊંઝા એપીએમસી ચૂંટણીમાં આજે 10 રાઉન્ડમાં મત ગણતરી કરાઈ હતી. જોકે, ગણતરીની શરુઆતથી જ પૂર્વ ચેરમેન દિનેશ પટેલની પેનલ આગળ હતી. જોકે, ભાજપે મેન્ડેટ આપેલાં જે પાંચ ઉમેદવારોને દિનેશ પટેલનું સમર્થન નહતું તેમની કારમી હાર થઈ છે. આ પરિણામો પરથી સાબિત થાય છે કે, ખેડૂત વિભાગની પેનલમાં દિનેશ પટેલનો દબદબો કાયમ રહ્યો છે. 

ખેડૂત વિભાગનું પરિણામ સામે આવ્યા બાદ દિનેશ પટેલની પેનલના ઉમેદવારો અને સમર્થકોએ ફટાકડા ફોડીને જીતની ઉજવણી કરી હતી. એપીએમસીની ચૂંટણીના પરિણામ આવ્યા બાદ જાણે દિવાળી જેવો માહોલ બની ગયો હતો. 

સોમવારે યોજાયેલી ઊંઝા APMCની ચૂંટણીમાં ખેડૂત વિભાગમાં કુલ 261 પૈકી 258 મતદારોએ મતદાન કર્યું હતું. જેમાં મત ગણતરી દરમિયાન કુલ 16 મત રદ થયા છે.તો કુલ 258માંથી 242 મતો માન્ય રખાયા છે. વેપારી વિભાગમાં 805 પૈકી 782 મતદારોએ મતદાન કર્યું હતું. ખેડૂત વિભાગમાં 98 ટકા અને વેપારી વિભાગમાં 97 ટકા મતદાન થયુ હતુ. આ ચૂંટણીમાં બંને વિભાગોમાં ભાજપ દ્વારા મેન્ડેટ આપવામાં આવ્યા હતા.