Dwarka/ ખંભાળિયા નજીક ગમખ્વાર અકસ્માત, ટ્રેક્ટર નીચે બાઈક આવતા એકનું મોત

દેવભૂમિ દ્વારકાના ખંભાળિયા પાયલ ચોકડી નજીક આજે વહેલી સવારે એક ગમખ્વાર માર્ગ અકસ્માત સર્જાયો હતો, જેમાં એક યુવકનું ઘટનાસ્થળે જ કરૂણ મોત નિપજ્યું હતું, જ્યારે અન્ય એક યુવક ગંભીર રીતે ઇજાગ્રસ્ત થયો હતો.

રોંગ સાઈડમાં આવેલા ટ્રેક્ટરે સર્જ્યો અકસ્માત

પ્રાથમિક માહિતી મુજબ, આ અકસ્માત ટ્રેક્ટર રોંગ સાઈડમાં આવવાના કારણે સર્જાયો હતો. રોંગ સાઈડમાંથી આવેલા ટ્રેક્ટર નીચે બાઈક આવી જતાં આ ગંભીર અકસ્માત થયો હતો. અકસ્માતમાં સામોર ગામના સિદાભાઈ ભીખાભાઈ ચાવડાનું ઘટનાસ્થળે જ મોત થયું હતું. જ્યારે બાઈક પર સવાર અન્ય એક યુવકની હાલત ગંભીર હોવાથી તેને તાત્કાલિક સારવાર અર્થે હોસ્પિટલ ખસેડવામાં આવ્યો છે.

હાઈવે પર ટ્રાફિક જામ, પોલીસ તપાસ શરૂ

અકસ્માતની આ ઘટના બાદ ખંભાળિયા હાઈવે પર થોડા સમય માટે ટ્રાફિક જામ થઈ ગયો હતો. ઘટનાની જાણ થતાં જ પોલીસ ટીમ તાત્કાલિક સ્થળ પર પહોંચી હતી. પોલીસે ટ્રાફિક પૂર્વવત કરાવ્યો હતો અને અકસ્માત કયા સંજોગોમાં થયો તેની વધુ તપાસ શરૂ કરી છે.