Dwarka/ 21 નિર્જન ટાપુઓ પર અવરજવર પર પ્રતિબંધ, કલેક્ટરનું જાહેરનામું

દેવભૂમિ દ્વારકા: ગણતંત્ર દિવસ પૂર્વે દેશની આંતરિક સુરક્ષાને ધ્યાને રાખીને દેવભૂમિ દ્વારકા જિલ્લાના અધિક જિલ્લા કલેક્ટર દ્વારા એક મહત્વનું જાહેરનામું પ્રસિદ્ધ કરવામાં આવ્યું છે. જિલ્લાની સમુદ્ર સીમામાં આવેલા 21 જેટલા નિર્જન ટાપુઓ પર સામાન્ય લોકોની અવરજવર પર તાત્કાલિક અસરથી રોક લગાવી દેવામાં આવી છે.

શા માટે લેવાયો આ નિર્ણય?

દ્વારકા જિલ્લો વ્યૂહાત્મક રીતે ત્રણ તરફથી સમુદ્ર તટથી જોડાયેલો છે. જિલ્લાના કુલ 24 ટાપુઓ પૈકી માત્ર બે જ ટાપુ પર માનવ વસાહત છે, જ્યારે બાકીના 21 ટાપુઓ સંપૂર્ણપણે નિર્જન છે.

• દેશવિરોધી પ્રવૃત્તિઓ પર રોક: સમુદ્ર માર્ગે કોઈ અસામાજિક તત્વો દેશવિરોધી પ્રવૃત્તિઓ ન કરે તે હેતુથી આ પ્રતિબંધ લાદવામાં આવ્યો છે.

• ધાર્મિક પ્રવૃત્તિના નામે આડધામ: કોઈ વ્યક્તિ ધાર્મિક પ્રવૃત્તિ કે અન્ય બહાના હેઠળ આ નિર્જન ટાપુઓનો ઉપયોગ કરી રાષ્ટ્રની સુરક્ષાને જોખમાવી ન શકે તે માટે તંત્ર સતર્ક બન્યું છે.

જાહેરનામાની મુખ્ય વિગતો:

•  આ પ્રતિબંધ ૨૫ જાન્યુઆરી, ૨૦૨૬ થી ૨૫ માર્ચ, ૨૦૨૬ સુધી અમલમાં રહેશે (કુલ ૨ મહિના માટે).

• 21 નિર્જન ટાપુઓ પર પ્રવેશ કે અવરજવર કરવા પર સંપૂર્ણ રોક.

• જાહેરનામાનો ભંગ કરનાર સામે કાયદેસરની કાર્યવાહી કરવામાં આવશે. કોસ્ટ ગાર્ડ અને મરીન પોલીસ દ્વારા આ ટાપુઓ પર ચાંપતી નજર રાખવામાં આવશે.

સુરક્ષાની દ્રષ્ટિએ દ્વારકાનું મહત્વ

દ્વારકાની દરિયાઈ સીમા આંતરરાષ્ટ્રીય જળસીમાની નજીક હોવાથી તે હંમેશા સુરક્ષા એજન્સીઓના રડાર પર હોય છે. અગાઉ પણ ડ્રગ્સની હેરાફેરી કે ઘૂસણખોરીના પ્રયાસોને નિષ્ફળ બનાવવા માટે આવા કડક પગલાં લેવામાં આવતા રહ્યા છે. 26 મી જાન્યુઆરીની પૂર્વસંધ્યાએ પ્રસિદ્ધ કરાયેલું આ જાહેરનામું સુરક્ષા વ્યવસ્થા વધુ સઘન બનાવવાનો એક ભાગ છે.