સુરતની હોટલમાં સેક્સ રેકેટની સાથે ચાલતા ડ્રગ્સ રેકેટનો પર્દાફાશ, ગુટખામાં ડ્રગ્સને કરાતું મિક્સ 

સુરતમાં યુવાધનને ડ્રગ્સથી લતમાંથી છોડાવવા તથા આ ચુંગાલમાં ફસાતા રોકવા કરવામાં આવી રહેલી મહેનત પર સેક્સ માફિયાઓ પાણી ફેરવી રહ્યા છે. શહેરની હોટેલ અને સ્પા ઓથે સેક્સ રેકેટ ચલાવનારાઓ હવે શોખીનોને ડ્રગ્સ પીરસી નશેડી બનાવવા માંડયા છે. આ મામલે વધુ એક કેસ વેસુની હોટેલ સુપિરીયરમાંથી નોંધાયો છે.અહીં પોલીસની ટીમે દરોડો પાડી ત્રણ ડ્રગ્સ પેડલરોને ઝડપી પાડયા હતાં. જ્યારે આઉટ કોલ માટે રખાયેલા ત્રણ લલાનાઓ પણ હોટેલમાંથી મળી આવી હતી.

95 એમડી ડ્રગ્સ ઝડપાયું

વેસુમાં વીઆઇપી રોડ ઉપર આકાશ રીટેલ કોમ્પલેક્ષના પાંચમા માળે ચાલતી હોટેલ સુપિરીયરમાંથી ઝડપાયું છે. પોલીસે હોટેલ સુપિરીયરમાં દરોડો પાડવામાં આવ્યો હતો. જેમાં શૈલેંદ્રકુમાર રામધન શર્મા, મોહમદ ચાંદ મોહમ્મદ આબીદ શેખ અને મોહમ્મદ જુનેદ ઉર્ફે સાહીલ અલ્તાફ હુશેન કડીયા મળી આવ્યા હતાં. તેઓ પાસેથી ૯૫૦૦ કિંમતનું ૯૫ મિલીગ્રામ એમડી ડ્રગ્સ પણ મળ્યું હતું.

ગુટખામાં મિક્સ કરાતું ડ્રગ્સ

શૈલેન્દ્ર, ચાંદ અને જુનેદ ઝડપાયા ત્યારે તેઓ ડ્રગ્સના નશામાં હતાં. તેઓએ રજનીગંધા ગુટખામાં મિક્સ કરીને ડ્રગ્સ લીધું હતું, સાથે જ હોટેલની બીજી રૂમમાંથી ત્રણ લલનાઓ મળી આવી હતી. જેમાથી એક શૈલેન્દ્ર શર્માની ગર્લફ્રેન્ડ અને બે લલના હતી. આ ત્રણેય યુવતીઓ દેહવિક્રય માટે રાખવામાં આવી હતી. જો કે, તેઓ ગ્રાહકોને હોટેલમાં બોલાવતાં ન હતાં. આ ત્રણેયને આઉટ કોલ એટલે કે ગ્રાહકો ઈચ્છે ત્યાં લઈ જઈ શકે એ રીતે રાખવામાં આવી હતી.ડ્રગ્સ એડિક્ટ એવા સેક્સ માફિયા શૈલેન્દ્ર, ચાંદ અને જુનેદે એમડી ડ્રગ્સ ભાઠેનાના ખલીલ પાસે લાવ્યા હોવાનું જણાવ્યું હતું.આ ત્રણ સામે વેસુ પોલીસ મથકમાં એનડીપીએસ એક્ટ હેઠળ ગુનો નોંધાયાવાયો હતો.જેમાં ખલીલને વોન્ટેડ જાહેર કરાયો છે.