Amreli/ બગસરાના નાના મુંજયાસર પાસે કાર પલટી, બાળક અને પતિની નજર સામે જ મહિલાનું મોત
છેલ્લું અપડેટ : 14 Jan 2026
અમરેલી જિલ્લામાં અકસ્માતોનો સિલસિલો યથાવત રહ્યો છે. બગસરાના માણેકવાડા માર્ગ પર એક કારચાલકે સ્ટેયરિંગ પરથી કાબૂ ગુમાવતા કાર રોડ નીચે ઉતરી ગઈ હતી. આ ભયાનક અકસ્માતમાં એક મહિલાનું ઘટનાસ્થળે જ મોત નીપજ્યું છે, જ્યારે કારમાં સવાર અન્ય લોકોનો આબાદ બચાવ થયો છે.
કેવી રીતે સર્જાયો અકસ્માત?
મળતી માહિતી મુજબ, અમરેલીના ચક્કરગઢ દેવળીયા ગામનો પરિવાર કાર લઈને ભલગામ તરફ જઈ રહ્યો હતો. આ દરમિયાન બગસરાના માણેકવાડા રોડ પર આવેલા નાના મુંજયાસર ગામ નજીક અચાનક ફોર વ્હીલ કાર ચાલકે કાબૂ ગુમાવ્યો હતો અને કાર ધડાકાભેર રોડની નીચે ઉતરી ગઈ હતી.
પરિવારમાં શોકનું મોજું
આ અકસ્માતમાં ગંભીર ઇજાઓ થવાને કારણે હેતલબેન જીગ્નેશભાઈ જાદવ નામની મહિલાનું કમકમાટીભર્યું મોત નીપજ્યું છે. જોકે, સદનસીબે કાર ચાલક અને કારમાં સવાર એક બાળકનો આ ચમત્કારિક બચાવ થયો છે. ઘટનાને પગલે આસપાસના લોકો દોડી આવ્યા હતા અને તાત્કાલિક મદદ કાર્ય શરૂ કર્યું હતું.
પોલીસ કાર્યવાહી
ઘટનાની જાણ થતા જ સ્થાનિક પોલીસ કાફલો ઘટનાસ્થળે પહોંચી ગયો હતો. મૃતક મહિલાના મૃતદેહને પોસ્ટમોર્ટમ (PM) અર્થે નજીકની સરકારી હોસ્પિટલે ખસેડવામાં આવ્યો છે. પોલીસે અકસ્માત અંગેનો ગુન્હો નોંધી વધુ તપાસ હાથ ધરી છે. આ કરુણ ઘટનાથી દેવળીયા ગામ અને પરિવારમાં ભારે શોકનું મોજું ફરી વળ્યું છે.
