VIDEO: ગુજરાતમાં ગાત્રો થીજવતી ઠંડી: નલિયા 7 ડિગ્રી સાથે રાજ્યનું સૌથી ઠંડુ શહેર, જાણો તમારા શહેરની સ્થિતિ
છેલ્લું અપડેટ : 03 Jan 2026
VIDEO: સમગ્ર ગુજરાતમાં છેલ્લા કેટલાક દિવસોથી શિયાળાની બરાબર જમાવટ થઈ રહી છે. અને આ જામતી ઠંડીનો અનુભવ થઈ રહ્યો છે. રાજ્યમાં ઉત્તર-પૂર્વના ઠંડા પવનો ફૂંકાવાને કારણે ગુજરાતના મોટાભાગના શહેરોમાં તાપમાનનો પારો નીચે ઉતર્યો છે, જેથી પરોઢે અને રાત્રિના સમયે કકડતી ઠંડી અનુભવાઈ રહી છે. કાતિલ ઠંડીને લીધે રાહદારીઓ અને શ્રમજીવીની સ્થિતિ કથળી રહી છે.
નલિયામાં સિઝનનું સૌથી નીચું તાપમાન
હવામાન વિભાગના આંકડા અનુસાર, કચ્છ જિલ્લાનું નલિયા રાજ્યનું સૌથી ઠંડુ શહેર નોંધાયું છે. નલિયામાં લઘુત્તમ તાપમાન 7 ડિગ્રી સુધી પહોંચી ગયું છે. જોકે, રસપ્રદ વાત એ છે કે ગત વર્ષની સરખામણીએ આ વખતે ઠંડી થોડી ઓછી છે, કારણ કે ગયા વર્ષે નલિયામાં પારો 3 ડિગ્રી સુધી ગગડ્યો હતો.
ગુજરાતના અન્ય શહેરોની સ્થિતિ
રાજકોટ: સૌરાષ્ટ્રના રાજકોટમાં પણ ઠંડીનું જોર જોવા મળ્યું છે, જ્યાં લઘુત્તમ તાપમાન 9.4 ડિગ્રી નોંધાયું છે.
અમદાવાદ: રાજ્યના પાટનગર અને આસપાસના વિસ્તારોમાં તાપમાન 15 ડિગ્રીની આસપાસ રહેતા વહેલી સવારે ગુલાબી ઠંડીનો અહેસાસ થઈ રહ્યો છે.
હવામાન વિભાગની આગાહી: ઠંડી ઘટશે?
હવામાન વિભાગના વૈજ્ઞાનિક પ્રદીપ શર્માએ જણાવ્યું છે કે, આગામી ત્રણ દિવસ દરમિયાન ઠંડીમાં થોડો ઘટાડો જોવા મળી શકે છે. તેમના જણાવ્યા અનુસાર:
તાપમાનમાં વધારો: આગામી 3 દિવસમાં લઘુત્તમ તાપમાનમાં 2 થી 3 ડિગ્રીનો વધારો થવાની શક્યતા છે, જેનાથી ઠંડીનું જોર ઘટશે.
પવનની દિશા: હાલમાં પવનની દિશા ઉત્તર-પૂર્વથી બદલાઈને પૂર્વ તરફ ગતિમાન થઈ રહી છે.
માવઠાની શક્યતા: હાલમાં રાજ્યમાં ક્યાંય પણ માવઠાની (કમોસમી વરસાદની) શક્યતા નહિવત છે, જે ખેડૂતો માટે રાહતના સમાચાર છે.