VIDEO: ખાડિયા પોલીસની સરાહનીય કામગીરી: 8 વર્ષથી વિખૂટા પડેલા નાગપુરના યુવકનું પરિવાર સાથે કરાવ્યું મિલન
છેલ્લું અપડેટ : 12 Mar 2026
VIDEO: અમદાવાદ શહેરના ઐતિહાસિક ખાડિયા વિસ્તારની પોલીસે પવિત્ર ફરજની સાથે માનવતાનું ઉત્તમ ઉદાહરણ પૂરું પાડ્યું છે. વર્ષો પહેલાં મહારાષ્ટ્રથી ગુમ થયેલા અને રઝળતું જીવન જીવવા મજબૂર બનેલા એક વ્યક્તિને શોધી કાઢી, તેના પરિવારનો સંપર્ક કરી તેને હેમખેમ સ્વજનોને સોંપવામાં આવ્યો છે.
પેટ્રોલિંગ દરમિયાન મળી સફળતા
ખાડિયા પોલીસ સ્ટેશનની ટીમ જ્યારે સારંગપુર દરવાજા પાસે રૂટિન પેટ્રોલિંગમાં હતી, ત્યારે તેમની નજર એક અજાણ્યા શખ્સ પર પડી હતી જે રસ્તા પર બેસીને હાથમાં રોટલી લઈને ખાતો હતો. પોલીસને આ વ્યક્તિની સ્થિતિ શંકાસ્પદ અને દયનીય લાગતા તેની પ્રેમપૂર્વક પૂછપરછ કરવામાં આવી હતી. પ્રાથમિક પૂછપરછમાં જાણવા મળ્યું કે આ વ્યક્તિ પોતાના પરિવારથી વિખૂટો પડી ગયો છે અને રસ્તો ભૂલી અહીં આવી ચઢ્યો છે.
ટેક્નોલૉજી અને આંતરરાજ્ય પોલીસ સંકલન
પોલીસ તપાસમાં બહાર આવ્યું કે આ વ્યક્તિનું નામ પ્રફુલ હંસરાજ ફુલજલ છે અને તે નાગપુર, મહારાષ્ટ્રનો રહેવાસી છે. ખાડિયા પોલીસે તુરંત જ ટેક્નોલૉજીનો ઉપયોગ કરીને નાગપુરના બાલાજી નગર વિસ્તારના હુડકેશ્વર પોલીસ સ્ટેશનનો સંપર્ક સાધ્યો હતો. પોલીસે પ્રફુલનો ફોટો મહારાષ્ટ્ર પોલીસને મોકલી આપ્યો હતો, જેની ખરાઈ કરતા જાણવા મળ્યું કે તે છેલ્લા 8 વર્ષથી ગુમ છે.
8 વર્ષ બાદ ભાઈ સાથે મિલન
મહારાષ્ટ્ર પોલીસની મદદથી પ્રફુલના ભાઈ પ્રતીકનો સંપર્ક કરવામાં આવ્યો હતો. 8 વર્ષથી જે ભાઈની આશા છોડી દીધી હતી, તે જીવિત છે અને અમદાવાદ પોલીસની સુરક્ષિત કસ્ટડીમાં છે તે જાણીને પરિવારની ખુશીનો પાર રહ્યો નહોતો. ખાડિયા પોલીસે પ્રફુલની યોગ્ય માવજત કરી, તેને જમાડ્યો અને તમામ કાયદાકીય પ્રક્રિયા પૂર્ણ કરી તેના ભાઈને સોંપ્યો હતો.
જ્યારે 8 વર્ષ બાદ બંને ભાઈઓ એકબીજાને મળ્યા ત્યારે વાતાવરણ ભાવુક બની ગયું હતું. ખાડિયા પોલીસની આ કામગીરીને સોશિયલ મીડિયા પર અનેક લોકો બિરદાવી રહ્યા છે અને આ ઘટનાના વીડિયો તથા ફોટા પોલીસની સક્રિયતાનું પ્રમાણ આપી રહ્યા છે.
