અન્ય યુવતીઓ સાથે વાંધાજનક ચેટ, દહેજ માટે ત્રાસ, બે બાળકો.., ત્રીજા લગ્નમાં પણ NRI મહિલાને મળ્યો દગો!
છેલ્લું અપડેટ : 05 Oct 2026
અમદાવાદ: અમેરિકામાં રહેતી 46 વર્ષીય NRI મહિલા સાથે લગ્નના નામે છેતરપિંડી (Fraud) અને શારીરિક-માનસિક ત્રાસ (Harassment)નો ચોંકાવનારો મામલો સામે આવ્યો છે. મૂળ અમદાવાદની અને વર્ષોથી અમેરિકામાં રહેતી મહિલાએ મેટ્રિમોનિયલ સાઇટ (Matrimonial Site) મારફતે ત્રીજા લગ્ન કર્યા હતા. જોકે, લગ્નના માત્ર 15 દિવસમાં જ પતિની કથિત હરકતોનો ભાંડો ફૂટી ગયો હતો. મહિલાના આરોપ મુજબ, પતિના મોબાઇલ ફોનમાંથી લગભગ 15 મહિલાઓ સાથેની વાંધાજનક ચેટ મળી હતી. વિરોધ કરતાં તેની સાથે મારપીટ કરવામાં આવી હતી. મામલો હવે પોલીસ સ્ટેશન સુધી પહોંચ્યો છે.
મેટ્રિમોનિયલ સાઇટ દ્વારા કર્યા હતા ત્રીજા લગ્ન
મહિલાના જણાવ્યા અનુસાર, અગાઉ બે વખત છૂટાછેડા (Divorce) થયા બાદ અને અમેરિકાની નાગરિકતા (Citizenship) મેળવ્યા પછી તેણે મેટ્રિમોનિયલ સાઇટ મારફતે એક યુવક સાથે ત્રીજા લગ્ન કર્યા હતા. લગ્ન બાદ શરૂઆતના થોડા દિવસો સામાન્ય રહ્યા, પરંતુ લગભગ 15 દિવસ પછી તેને પતિની કેટલીક હરકતો પર શંકા થવા લાગી હતી.
પતિ સતત મોબાઇલ ફોનમાં વ્યસ્ત રહેતો હોવાથી મહિલાએ તેના ફોન અંગે તપાસ કરી હતી. ત્યારે તેના મોબાઇલમાં ગોવા, અમેરિકા અને અમદાવાદ સહિત અલગ-અલગ સ્થળોની લગભગ 15 મહિલાઓ અને યુવતીઓ સાથેની કથિત પ્રેમસંબંધો તથા વાંધાજનક ચેટ્સ (Chats) મળી આવી હતી.
ચેટ અંગે પૂછતાં પતિએ કરી મારપીટ
મહિલાએ પતિને આ ચેટ્સ અંગે સવાલ કર્યો હતો. ફરિયાદ મુજબ, આ વાતથી પતિ ઉશ્કેરાઈ ગયો હતો અને તેણે મહિલાને ગાળો આપી તેની સાથે મારપીટ કરી હતી. ત્યારબાદ મહિલાને પતિની કેટલીક અન્ય આદતો અંગે પણ માહિતી મળી હતી.
પોલીસ ફરિયાદમાં મહિલાએ આરોપ લગાવ્યો છે કે તેનો પતિ દારૂ અને જુગાર (Gambling)નો પણ વ્યસની છે. લગ્ન બાદ પતિ તેને ગોવા અને બાલી ફરવા લઈ ગયો હતો. આ દરમિયાન ગોવાની એક હોટલમાં જુગારમાં પૈસા હારી ગયા બાદ તેણે મહિલાની સાથે ખરાબ વર્તન કર્યું હોવાનો પણ આરોપ છે.
ગોવામાં બીજી મહિલાએ પોતાને પત્ની ગણાવી
મહિલાના જણાવ્યા પ્રમાણે, ગોવાની મુસાફરી દરમિયાન પતિની એક કથિત પ્રેમિકાએ પણ પોતાને તેની પત્ની ગણાવી હતી. આ વાતને લઈને મહિલાએ વિરોધ કર્યો હતો. ત્યારબાદ પતિએ તેનો હાથ ખેંચ્યો હતો, જેના કારણે તેની કાંડા પર ગંભીર ઈજા થઈ હતી.
આ ઘટનાથી મહિલાને પતિના અગાઉના સંબંધો અંગે વધુ શંકા થઈ હતી. ફરિયાદમાં મહિલાએ પતિ પર સતત માનસિક અને શારીરિક ત્રાસ આપવાનો આરોપ લગાવ્યો છે.
પિતાની મિલકતના પૈસા દહેજ તરીકે માંગ્યાનો આરોપ
મહિલાનો આરોપ છે કે પતિની પૈસાની લાલચ પણ અહીં અટકી નહોતી. મહિલાના પિતાએ દુકાન વેચીને મેળવેલી રકમ પણ પતિએ દહેજ (Dowry) તરીકે માંગી હતી. આ ઉપરાંત મહિલાના માયકેથી લાવવામાં આવેલા સોના-ચાંદીના દાગીના (Stridhan) પણ પતિએ પોતાની પાસે રાખી લીધા હતા.
ફરિયાદ મુજબ, દાગીના બેંક લોકરમાં (Bank Locker) સુરક્ષિત રાખવાના બહાને પતિએ પોતાની પાસે લઈ લીધા હતા. ત્યારબાદ મહિલાએ દાગીના પરત માંગ્યા તો તેણે પરત આપવાનો ઇનકાર કર્યો હતો.
પતિના અગાઉ પણ લગ્ન થયા હોવાનું સામે આવ્યું
સતત મળતા ત્રાસથી પરેશાન થઈને NRI મહિલાએ અમદાવાદના પોલીસ સ્ટેશનનો સંપર્ક કર્યો હતો. મહિલાની ફરિયાદના આધારે પોલીસે કેસ નોંધી તપાસ (Investigation) શરૂ કરી છે.
પોલીસની પ્રાથમિક તપાસમાં આરોપી પતિના અગાઉ પણ લગ્ન થયા હોવાનું સામે આવ્યું હોવાનું જણાવાયું છે. તેના એક પુત્ર અને એક પુત્રી હોવાની માહિતી પણ તપાસ દરમિયાન મળી છે.
પુત્ર-પુત્રી દ્વારા પણ ધમકી અને શોષણના આરોપ
મહિલાએ ફરિયાદમાં આરોપ લગાવ્યો છે કે પતિ ઉપરાંત તેના પુત્ર અને પુત્રી દ્વારા પણ તેને ધમકીઓ આપવામાં આવતી હતી. મહિલાના જણાવ્યા મુજબ, તેની સાથે આર્થિક શોષણ (Financial Exploitation) ઉપરાંત શારીરિક અને માનસિક ત્રાસ પણ કરવામાં આવ્યો હતો.
હાલ પોલીસે મહિલાની ફરિયાદના આધારે સમગ્ર મામલાની તપાસ શરૂ કરી છે. પોલીસ આરોપો સાથે જોડાયેલા પુરાવા એકત્ર કરી રહી છે અને આગળની કાયદેસરની કાર્યવાહી (Legal Action) હાથ ધરવામાં આવી રહી છે. મામલામાં પોલીસ તપાસ પૂર્ણ થયા બાદ જ સમગ્ર હકીકત વધુ સ્પષ્ટ થશે.
