ગુજરાતમાં આખરે ઠંડીની જમાવટ, અમરેલી સૌથી વધુ ઠુઠવાયું

ગુજરાતમાં શિયાળાની ઠંડીનો ચમકારો હવે સ્પષ્ટપણે વર્તાઈ રહ્યો છે. રાજ્યના અનેક શહેરોમાં લઘુત્તમ તાપમાનનો પારો ગગડતાં વહેલી સવારે અને મોડી રાત્રે ઠંડીનો અનુભવ થઈ રહ્યો છે. અમરેલીમાં 11.4 ડિગ્રી સેલ્સિયસ સાથે રાજ્યમાં સૌથી વધુ ઠંડી નોંધાઈ હતી. ગત રાત્રિએ રાજ્યના જે શહેરોમાં ૧૫ ડિગ્રીથી નીચું તાપમાન નોંધાયું, તેમાં અમરેલી ઉપરાંત નલિયા, ગાંધીનગર, રાજકોટ, વડોદરા, જૂનાગઢ અને પોરબંદરનો સમાવેશ થાય છે.
ઠંડી વધવા પાછળનું કારણ અને હવામાનની આગાહી
ઠંડા પવનોની અસર: હવામાન નિષ્ણાતોના મતે ગુજરાતમાં અચાનક ઠંડીનો ચમકારો અનુભવાવા પાછળ મુખ્યત્વે ઉત્તર ભારતના ઠંડા પ્રદેશો—જેમ કે રાજસ્થાન, પંજાબ અને હરિયાણા—તરફથી ફૂંકાતા ઠંડા પવનો તથા વાતાવરણમાં આવેલા ફેરફારો જવાબદાર છે. નવેમ્બરના પ્રારંભે ઠંડીની અસર ઓછી હતી, પરંતુ પવનની દિશા બદલાતાં રાજ્યના અનેક વિસ્તારોમાં લઘુત્તમ તાપમાનમાં 2 થી 5 ડિગ્રીનો ઘટાડો નોંધાયો છે.
હવામાન વિભાગની આગાહી: હવામાન વિભાગની આગાહી પ્રમાણે, આગામી ચાર દિવસ દરમિયાન લઘુત્તમ તાપમાનમાં તબક્કાવાર 4 ડિગ્રી સુધીનો વધારો થતાં ઠંડીમાં આંશિક રાહત મળી શકે છે.
અમદાવાદમાં સિઝનનું સૌથી નીચું તાપમાન
ગાંધીનગરમાં 12 ડિગ્રી અને અમદાવાદમાં 16 ડિગ્રી સાથે સિઝનનું સૌથી નીચું તાપમાન નોંધાયું હતું. અમદાવાદમાં મહત્તમ તાપમાન 30.2 ડિગ્રી નોંધાયું હતું, જે સામાન્ય કરતાં 2.4 ડિગ્રી નીચું હતું. આગામી એક સપ્તાહ દરમિયાન અમદાવાદનું લઘુત્તમ તાપમાન 17 થી 20 ડિગ્રીની આસપાસ રહેવાની શક્યતા છે.












