દિવાળીમાં અમદાવાદીઓને મળશે તબીબી મદદ, 7થી 13 નવેમ્બર સુધી ‘ડૉક્ટર ઑન કૉલ’ સેવા

દિવાળીના તહેવારો દરમિયાન અમદાવાદના નાગરિકોને તાત્કાલિક તબીબી સહાય મળી રહે તે માટે અમદાવાદ મેડિકલ એસોસિએશન (AMA) અને અમદાવાદ ફેમિલી ફિઝિશિયન્સ એસોસિએશન (AFPA) દ્વારા ‘ડૉક્ટર ઑન કૉલ’ સેવા શરૂ કરવામાં આવી છે. 7 નવેમ્બરથી 13 નવેમ્બર, 2026 સુધી આ સેવા કાર્યરત રહેશે. આ પહેલના કારણે તહેવારોની રજાઓ દરમિયાન નિયમિત ક્લિનિક બંધ હોય ત્યારે પણ નાગરિકોને તબીબી માર્ગદર્શન મળી શકશે.

એક દાયકાથી વધુ સમયથી સેવા આપવાની પરંપરા

દિવાળીના તહેવારો અને રજાઓ દરમિયાન ઘણા ફેમિલી ડૉક્ટર્સનાં ક્લિનિક બંધ અથવા મર્યાદિત સમય માટે ચાલુ રહે છે. આવી સ્થિતિમાં દર્દીઓને સારવાર મેળવવામાં મુશ્કેલી ન પડે તે હેતુથી AMA અને AFPA દ્વારા છેલ્લા એક દાયકાથી વધુ સમયથી આ સેવાકીય પહેલ કરવામાં આવે છે. આ વર્ષે પણ બંને સંસ્થાઓએ પરંપરા જાળવી રાખીને સેવા શરૂ કરવાનો નિર્ણય લીધો છે.

ફોન પર મળશે નિઃશુલ્ક પ્રાથમિક માર્ગદર્શન

આ સેવા અંતર્ગત નિયુક્ત તબીબી કોઓર્ડિનેટર્સ નાગરિકોના ફોન કોલ સ્વીકારીને વિનામૂલ્યે પ્રાથમિક તબીબી સલાહ અને માર્ગદર્શન આપશે. દર્દીની તબિયત ગંભીર હોય અથવા નિષ્ણાત ડૉક્ટરની જરૂરિયાત જણાય તો કોઓર્ડિનેશન ટીમ દ્વારા યોગ્ય સ્પેશિયાલિસ્ટ (Specialist) સાથે સંપર્ક કરાવવામાં આવશે.

ઈમરજન્સીમાં આ નંબર પર કરી શકાશે સંપર્ક

નાગરિકો તબીબી સહાય અને માર્ગદર્શન માટે નીચેના ડૉક્ટરોનો સંપર્ક કરી શકશે:

• ડૉ. ધીરેન મહેતા: 9898854158

• ડૉ. અશ્વિન શાહ: 9824038816

• ડૉ. સુનીલ પટેલ: 9879225294

• ડૉ. રમેશ પટેલ: 9426495264

• ડૉ. જ્યોતિન્દ્ર મહેતા: 9825039653

• ડૉ. પાર્થ પટેલ: 9924119778

નાગરિકોની સુરક્ષિત દિવાળી ઉજવણીનો ઉદ્દેશ

આ સંયુક્ત પહેલ અંગે AMAનાં પ્રમુખ ડૉ. કલ્પિતા દવે, માનદ મંત્રી ડૉ. મૌલિક શેઠ તેમજ AFPAના પ્રમુખ ડૉ. રમેશ આઈ. પટેલ અને માનદ મંત્રી ડૉ. મેહુલ શેલતે જણાવ્યું હતું કે અમદાવાદના પરિવારો સુરક્ષિત, સ્વસ્થ અને ચિંતામુક્ત રીતે દિવાળીની ઉજવણી કરી શકે તે માટે આ સેવા શરૂ કરવામાં આવી છે. આ પહેલથી તહેવારો દરમિયાન તબીબી જરૂરિયાત ઊભી થાય ત્યારે નાગરિકોને યોગ્ય માર્ગદર્શન અને નિષ્ણાત ડૉક્ટર સુધી પહોંચવામાં મદદ મળશે. નોંધનીય છે કે આ સેવા પ્રાથમિક માર્ગદર્શન અને ડૉક્ટર રેફરલ માટે છે; ગંભીર કે જીવલેણ સ્થિતિમાં તાત્કાલિક હોસ્પિટલ અથવા ઇમરજન્સી સેવાનો સંપર્ક કરવો જરૂરી છે.