Ahmedabad news: થલતેજ ભાજપ ઉમેદવાર હિતેશ બારોટ 109 કરોડના આસામી, શહેજાદ ખાન 3 દુકાનના માલિક
છેલ્લું અપડેટ : 16 Apr 2026
અમદાવાદ મ્યુનિસિપલ કોર્પોરેશન (AMC)ની ચૂંટણીમાં ભાજપ દ્વારા રિપીટ કરાયેલા થલતેજ વોર્ડના કોર્પોરેટર અને સ્ટેન્ડિંગ કમિટીના પૂર્વ ચેરમેન હિતેશ બારોટ 109 કરોડની મિલકતો ધરાવે છે. બીજી તરફ, ટિકિટ મેળવવામાં વાઈલ્ડ કાર્ડ એન્ટ્રી કરી ચર્ચામાં રહેલા લીગલ કમિટીના પૂર્વ ચેરમેન જૈનિક વકીલ લક્ઝુરિયસ કારના શોખીન છે; તેમની પાસે મર્સિડીઝ અને બીએમડબ્લ્યુ (BMW) જેવી ત્રણ વૈભવી ગાડીઓ છે.
પાલડીના જૈનિક વકીલ પાસે મર્સિડીઝ અને બીએમડબ્લ્યુ સહિત ત્રણ વૈભવી ગાડીઓ
મ્યુનિસિપલ કાઉન્સિલર તરીકે 15 થી 20 હજાર જેટલું સામાન્ય વેતન મેળવતા જનપ્રતિનિધિઓ ક્યારે કરોડોના આસામી બની જાય છે, તેની લોકોને ખબર પડતી નથી. જોકે, ઉમેદવારી ફોર્મ સાથે રજૂ કરાયેલા સોગંદનામામાં તેમની વાસ્તવિક આર્થિક સ્થિતિ સામે આવી છે.
હિતેશ બારોટની અધધધ સંપત્તિ
સોગંદનામાની વિગતો મુજબ, આ વખતે થલતેજ વોર્ડમાંથી ભાજપના ઉમેદવાર હિતેશ બારોટ અને તેમના પત્નીના નામે ઓગણજ, બોડકદેવ, થલતેજ, નાંદોલ અને કુંડલ સહિતના વિસ્તારોમાં ખેતી તથા બિન-ખેતીની જમીનો અને મકાનો મળી 107 કરોડથી વધુની સ્થાવર મિલકતો છે. આ ઉપરાંત, તેમની પાસે 57 તોલાથી વધુ સોનું અને સુરક્ષા માટે એક રિવોલ્વર પણ છે.
શહેઝાદખાન પઠાણ પણ કરોડપતિ
બીજી બાજુ, પાલડી વોર્ડમાં છેલ્લી ઘડીએ ઉમેદવાર જાહેર કરાયેલા જૈનિક વકીલ, તેમના પત્ની અને પુત્રના નામે ચોપડે રૂ. 6.5 કરોડની મિલકત નોંધાયેલી છે. તેમની પાસે મર્સિડીઝ, બીએમડબ્લ્યુ અને ટોયોટા સહિત ત્રણ મોંઘી કાર અને 62 તોલા સોનું છે, જે તેમની વૈભવી જીવનશૈલી દર્શાવે છે. જ્યારે વિપક્ષી નેતા શહેઝાદખાન પઠાણ અને તેમનો પરિવાર રૂ. 68.18 લાખની જંગમ મિલકતો અને શાહઆલમમાં અંદાજે 17 લાખની કિંમતની ત્રણ દુકાનો ધરાવે છે.
