તહેવારો બાદ અમદાવાદ આવતી ફ્લાઇટ્સના ભાડામાં 138%નો ઉછાળો, પુણેની ટિકિટ 166% મોંઘી

દિવાળી અને છઠ પૂજાના તહેવારો પૂર્ણ થયા બાદ નોકરી-ધંધા માટે અન્ય શહેરોમાં રહેતા લોકો પોતાના કામના સ્થળે પરત ફરી રહ્યા છે. મુસાફરોના આ ધસારાને કારણે હવાઈ મુસાફરીના ભાડામાં તોતિંગ વધારો નોંધાયો છે. ખાસ કરીને પુણે, અમદાવાદ અને મુંબઈ આવતી ફ્લાઇટ્સની ટિકિટના ભાવમાં મોટો ઉછાળો જોવા મળ્યો છે. 14થી 17 નવેમ્બર દરમિયાન પુણે આવતી ફ્લાઇટ્સના સરેરાશ ભાડામાં 165.5 ટકા, અમદાવાદ આવતી ફ્લાઇટ્સમાં 137.5 ટકા અને મુંબઈ આવતી ફ્લાઇટ્સમાં 83.8 ટકાનો વધારો થયો છે. એરલાઇન ટિકિટના ભાડાના વિશ્લેષણમાં સામે આવ્યું છે કે તહેવારો દરમિયાન લોકો વતન જવા માટે ઉત્સુક હોય છે, પરંતુ તહેવારો પૂર્ણ થયા બાદ કામના શહેરોમાં પરત ફરતી વખતે મુસાફરોને વધુ કિંમત ચૂકવવી પડે છે. ખાસ કરીને રોજગારી અને વ્યવસાયનાં મોટાં કેન્દ્રો ગણાતાં શહેરોમાં પરત આવતી ફ્લાઇટ્સના ભાડામાં નોંધપાત્ર વધારો થયો છે.
અમદાવાદ આવતી ફ્લાઇટ્સના ભાડામાં 138%નો વધારો
નવેમ્બરના પ્રથમ સપ્તાહ (1થી 7 નવેમ્બર)ની સરખામણીમાં 14થી 17 નવેમ્બર દરમિયાન અમદાવાદ આવતી ફ્લાઇટ્સના સરેરાશ ભાડામાં 137.5 ટકાનો વધારો નોંધાયો છે. જ્યારે પુણે આવતી ફ્લાઇટ્સના ભાડામાં 165.5 ટકા અને મુંબઈ આવતી ફ્લાઇટ્સમાં 83.8 ટકાનો વધારો થયો છે. બેંગલુરુ આવતી ફ્લાઇટ્સના ભાડામાં પણ 69.1 ટકાનો ઉછાળો નોંધાયો છે. બીજી તરફ વતનના શહેરોમાંથી બહાર જતી ફ્લાઇટ્સમાં પણ કેટલાક રૂટ પર ભાડાં વધ્યાં છે. દિલ્હીથી બહાર જતી ફ્લાઇટ્સના ભાડામાં 103.4 ટકા, હૈદરાબાદથી 102.2 ટકા અને કોલકાતાથી બહાર જતી ફ્લાઇટ્સના ભાડામાં 69.1 ટકાનો વધારો થયો છે. જોકે, દરેક રૂટ પર આવી સ્થિતિ જોવા મળી નથી. પુણેથી બહાર જતી ફ્લાઇટ્સના ભાડામાં 24.4 ટકાનો ઘટાડો થયો છે, જ્યારે દિલ્હી આવતી ફ્લાઇટ્સના ભાડામાં 31.7 ટકાનો ઘટાડો નોંધાયો છે.
કયા રૂટ પર ટિકિટના ભાવમાં સૌથી વધુ વધારો?
તહેવારો બાદ કેટલાક રૂટ પર વિમાન ટિકિટના ભાવમાં બમણાથી વધુ વધારો થયો છે.
-
કોલકાતા-મુંબઈ: ₹7,450થી વધીને ₹22,605 (203% વધારો)
-
હૈદરાબાદ-પુણે: ₹6,079થી વધીને ₹17,880 (194% વધારો)
-
ચેન્નાઈ-પુણે: ₹5,681થી વધીને ₹16,389 (189% વધારો)
-
દિલ્હી-પુણે: ₹7,212થી વધીને ₹20,522 (185% વધારો)
-
દિલ્હી-મુંબઈ: ₹6,688થી વધીને ₹18,364 (175% વધારો)
-
હૈદરાબાદ-અમદાવાદ: ₹7,613થી વધીને ₹20,217 (166% વધારો)
-
ચેન્નાઈ-અમદાવાદ: ₹8,539થી વધીને ₹21,235 (149% વધારો)
-
અમદાવાદ-પુણે: ₹4,196થી વધીને ₹10,340 (146% વધારો)
-
કોલકાતા-અમદાવાદ: ₹7,736થી વધીને ₹18,731 (142% વધારો)
-
મુંબઈ-અમદાવાદ: ₹4,662થી વધીને ₹11,074 (138% વધારો)
આ આંકડા દર્શાવે છે કે તહેવારો બાદ અમદાવાદ આવવા માટે પણ મુસાફરોએ અગાઉની સરખામણીમાં નોંધપાત્ર વધારે ભાડું ચૂકવવું પડ્યું છે.
દિવાળીના દિવસે હવાઈ મુસાફરી સૌથી સસ્તી
વિશ્લેષણ મુજબ, 8 નવેમ્બર એટલે કે દિવાળીના દિવસે 54 રૂટ્સ પર સરેરાશ હવાઈ ભાડું ₹7,050 નોંધાયું હતું. 25 ઓક્ટોબરથી 18 નવેમ્બર વચ્ચેના 25 દિવસોમાં આ સૌથી ઓછું સરેરાશ ભાડું હતું. બીજી તરફ, છઠ પૂજા બાદ લોકો કામના સ્થળે પરત ફરી રહ્યા હતા તે 17 નવેમ્બરના રોજ સરેરાશ ભાડું વધીને ₹11,062 થયું હતું. એટલે કે તહેવારના દિવસે મુસાફરી કરવી પરત ફરવાના દિવસોની સરખામણીમાં વધુ સસ્તી સાબિત થઈ હતી.
એરલાઇન્સ માંગ પ્રમાણે ભાડાં વધારે છે
હવાઈ ટિકિટના ભાવમાં આ વધારા પાછળનું મુખ્ય કારણ મુસાફરોની એકસાથે વધતી માંગ છે. તહેવારો દરમિયાન લાખો લોકો કામનાં શહેરોમાંથી વતન તરફ જાય છે અને થોડા દિવસો બાદ મોટી સંખ્યામાં લોકો એકસાથે પરત ફરે છે. પરિણામે જે દિશામાં ફ્લાઇટ્સમાં વધુ બુકિંગ થાય છે તે રૂટ પર એરલાઇન્સ ટિકિટના ભાવમાં વધારો કરે છે. આ વિશ્લેષણ TOI-DPA એરલાઇન પ્રાઇસ ઇન્ડેક્સ પર આધારિત છે. તેમાં 28 એપ્રિલથી 17 નવેમ્બર 2026 સુધી દિલ્હી, મુંબઈ, બેંગલુરુ, ચેન્નાઈ, કોલકાતા, હૈદરાબાદ, અમદાવાદ અને પુણે વચ્ચેના 54 રૂટ્સના ભાડાનો અભ્યાસ કરવામાં આવ્યો છે.
મુસાફરોએ ટિકિટ બુકિંગમાં શું ધ્યાન રાખવું?
તહેવારો દરમિયાન વતન જવાની યોજના બનાવતા મુસાફરોએ પરત ફરવાની ટિકિટ પણ અગાઉથી બુક કરાવી લેવી જોઈએ. કારણ કે તહેવારો પૂર્ણ થયા બાદ કામના શહેરોમાં પરત ફરતી વખતે ભાડામાં મોટો વધારો થવાની શક્યતા રહે છે. જો મુસાફરીની તારીખમાં ફેરફાર શક્ય હોય તો દિવાળી જેવા મુખ્ય તહેવારના દિવસે મુસાફરી કરવાથી ખર્ચ ઘટાડી શકાય છે. છેલ્લી ઘડીએ ટિકિટ બુક કરાવવાને બદલે અગાઉથી આયોજન કરવું મુસાફરો માટે આર્થિક રીતે ફાયદાકારક બની શકે છે.











