કરોડોના ધુમાડા બાદ ડ્રીમ પ્રોજેક્ટ 'સી પ્લેન' ફ્લોપ, તેનું સંચાલન કરવા કોઈ તૈયાર નથી

અમદાવાદમાં સાબરમતી રિવરફ્રન્ટ પર મોટા ઉપાડે શરુ કરાયેલું સી-પ્લેન અત્યારે ક્યાં છે તેનો કોઈ અતોપતો નથી. રિવરફ્રન્ટથી સ્ટેચ્યુ ઓફ યુનિટી વચ્ચે સી-પ્લેનની ઉડાનને પ્રતિસાદ જ સાંપડ્યો નહીં. આખર ડ્રીમ પ્રોજેક્ટ સી-પ્લેન ફ્લોપ થયું હતું. મહત્વની વાત એ છે કે, સી-પ્લેન માટે ગુજરાત સરકારને ઓપરેટર જ નથી મળતો.

ફરી એકવાર વિધાનસભા ગૃહમાં સી-પ્લેનનો મુદ્દો ઉછળ્યો હતો. સી-પ્લેન વિશએ કોંગ્રેસના ધારાસભ્ય શૈલેષ પરમારે સવાલ પૂછતાં એવી દલીલ કરી છે કે, કોરોના હોવાને લીધે સી પ્લેન બંધ કરવામાં આવ્યું હતું. સાથે સાથે ઓપરેટર માટે ઓપરેશનલ પ્રશ્ન ઉપસ્થિત થતાં આ સેવા બંધ કરવામાં આવી હતી.

સી-પ્લેન પાછળ કુલ મળીને રુ. 19.50 કરોડનો ધુમાડો કરવામાં આવ્યો હતો તેમ છતાં આ પ્રોજેક્ટને સફળતા સાંપડી ન હતી. માલદીવની જેમ સાબરમતી રિવરફ્રન્ટ પર સી પ્લેન ઉડાડવા યોજના હતી પણ કરોડો રુપિયાના આ પ્રોજેક્ટને પ્રવાસીઓએ નકારી કાઢ્યો હતો. સી-પ્લેન માટે મુસાફરો મેળવવા અઘરા બન્યા હતા.

સાબરમતીમાં પાણીનો પ્રવાહ આવતાં સી-પ્લેન માટે ખાસ બનાવવામાં આવેલું સ્ટેન્ડ પણ તણાઈ ગયું છે. ચાર વર્ષ થયાં હજુ સુધી સી-પ્લેન ટર્મિનલ પણ બંધ અવસ્થામાં પડી રહ્યું છે. સી-પ્લેન સફેદ હાથી સમાન હોવાથી કોઈ ઓપરેટર સંચાલન કરવા તૈયાર નથી તેમ છતાંય સરકારે એમ કહ્યું કે, સી-પ્લેન શરુ કરવા વિચારણા ચાલી રહી છે.