આ સોલાર કંપનીના IPOની શેરબજારમાં ધમાકેદાર એન્ટ્રીઃ રોકાણકારોને આપ્યો 90 ટકાનો તગડો નફો

રિન્યુએબલ એનર્જી સોલ્યુશન્સ પ્રદાન કરતી કંપની સહજ સોલરના આઇપીઓએ શેરબજારમાં જોરદાર એન્ટ્રી કરી છે. સહજ સોલરનો શેર એનએસઇ એસએમઇ પર રૂ. 342 પર બમ્પર જમ્પ સાથે ખુલ્યો, જે રૂ. 180ની પ્રાઇસ બેન્ડ કરતાં 90 ટકા વધારે છે.

તમને જણાવી દઈએ કે આ કંપનીનો પ્રારંભિક પબ્લિક ઑફરિંગ (આઇપીઓ) 11 જુલાઈ 2024ના રોજ બિડિંગ માટે ખુલ્લી હતી અને 15 જુલાઈ 2024ના રોજ બંધ થઈ ગઈ હતી. વૈકલ્પિક ઉર્જા કંપની તેના આઇપીઓ દ્વારા રૂ. 52.56 કરોડ એકત્ર કરવાનો લક્ષ્યાંક ધરાવે છે.

આઇપીઓને મળ્યો હતો જોરદાર પ્રતિસાદઃ 507 ગણો છલકાયો હતો

બિડિંગના ત્રીજા અને છેલ્લા દિવસે આઇપીઓને રોકાણકારો તરફથી મજબૂત પ્રતિસાદ મળ્યો હતો અને 507 ગણું સબસ્ક્રીપ્શન આવ્યું હતું. કંપનીને 19.49 લાખ શેરની ઓફર સામે 98.81 કરોડથી વધુ શેર માટે બિડ મળી હતી, જેના પરિણામે એકંદરે 506.84 વખત સબ્સ્ક્રિપ્શન થયું હતું. આ કંપનીના આઈપીઓનું ગ્રે માર્કેટ પ્રીમિયમ શુક્રવાર (19 જુલાઈ) રૂ. 250 પર ચાલી રહ્યું છે.

ગ્રે માર્કેટમાં આ આઇપીઓ પ્રાઇસ બેન્ડ અને પ્રીમિયમના ઉપલા લેવલને ધ્યાનમાં રાખતાં આઇપીઓની અંદાજિત લિસ્ટિંગ કિંમત રૂ. 430 હતી, જે રૂ. 180ની બંધ કિંમત કરતાં 138.89% વધારે છે. 'ગ્રે માર્કેટ પ્રીમિયમ' એ રોકાણકારોની પ્રાઇસ બેન્ડ કરતાં વધુ ચૂકવણી કરવાની ઇચ્છા દર્શાવે છે.

કંપની આઇપીઓમાંથી એકત્ર કરાયેલ ભંડોળનો ઉપયોગ ક્યાં કરશે?

કંપની તેની કાર્યકારી મૂડીની જરૂરિયાતોને પહોંચી વળવા અને સામાન્ય કોર્પોરેટ હેતુઓ માટે આઇપીઓ દ્વારા એકત્ર કરાયેલ ભંડોળનો ઉપયોગ કરશે. 2023ના નાણાકીય વર્ષની સરખામણીમાં 2024ના નાણાકીય વર્ષમાં સહજ સોલર લિમિટેડની આવક 8.56% વધીને રૂ. 20,171.55 કરોડ થઈ છે. જ્યારે નાણાકીય વર્ષ 2023ની સરખામણીએ નાણાકીય વર્ષ 2024 માં ચોખ્ખો નફો 106.25 ટકા વધીને રૂ. 1,337.29 કરોડ થયો હતો.