Business News: વર્ષ 2026, IPO બજાર માટે સાબિત થઈ શકે છે સૌથી મહત્વપૂર્ણ

ભારતીય કંપનીઓ Initial Public Offering (IPO) લાવવા માટે ખૂબ જ હરીફાઈ કરી રહી છે. આ વર્ષે અત્યાર સુધીમાં, 185થી વધારે કંપનીઓએ Securities and Exchange Board of India (SEBI) સમક્ષ Prospectus (DRHP) ફાઇલ કર્યા છે. લગભગ દરેક કાર્યકારી દિવસે IPO લાવવા માટે અરજી ફાઇલ કરવામાં આવે છે. જેથી આગામી સમયમાં પ્રાયમરી બજાર ખૂબ જ વ્યસ્ત રહેશે.

2024માં નિર્ધારિત રેકોર્ડ પણ વટ્યો 

પ્રાઈમ ડેટાબેઝ દ્વારા સંકલિત ડેટા અનુસાર, છેલ્લી વખત 1997માં એક જ વર્ષમાં આટલા બધા DRHP ફાઇલ કરવામાં આવ્યા હતા, જે સ્થાનિક આઈપીઓ બજાર માટે પરાકાષ્ઠાનો સમય હતો. આ વર્ષે, 2023 અને 2024ના પ્રથમ નવ મહિનામાં ફાઇલ કરાયેલ આઈપીઓ અરજીઓ કરતાં વધુ DRHP અરજીઓ ફાઇલ કરવામાં આવી હતી, જે કંપનીઓ વચ્ચે લિસ્ટેડ થવા માટે સ્પર્ધાને પ્રતિબિંબિત કરે છે.

સામાન્ય રીતે, IPO ફાઇલિંગથી લિસ્ટિંગ સુધી 5થી 12 મહિનાનો સમય લાગે છે. IPO અરજીઓના પૂરને ધ્યાનમાં લેતા, 2026માં ભારતીય IPO બજાર માટે એક શ્રેષ્ઠ વર્ષ બનવાની તૈયારીમાં છે. આ વર્ષે બજારની અસ્થિરતા હોવા છતાં, કંપનીઓએ IPO દ્વારા રૂ. 1.1 લાખ કરોડથી વધુ ભંડોળ એકત્ર કર્યું છે. જે 2024માં નિર્ધારિત રૂ. 1.6 લાખ કરોડના રેકોર્ડને વટાવી જવાની તૈયારીમાં છે.

ટૂંક સમયમાં આ મોટી કંપનીઓ જાહેર કરશે IPO

દાખલ કરાયેલા 185 DRHPsમાંથી આશરે રૂ. 2.72 લાખ કરોડ ભંડોળ એકત્ર થવાનો લક્ષ્યાંક છે. જ્યારે આ અરજીઓમાં નાની કંપનીઓની સાથે-સાથે ઘણી મોટી કંપનીઓના ઇશ્યુ પણ હરોળમાં છે. આગામી સપ્તાહમાં TATA Capital અને LG Electronic જેવી મોટી કંપની IPO રજુ કરશે. આ ઉપરાંત, ICICI, Prudential AMC, Lenskart, PhonePe, Physixwala and Pine Labs જેવી કંપનીઓ પણ લાઇનમાં ઊભી છે.

બજારના સહભાગીઓ IPO બજારમાં તેજી માટે અનેક કારણો જણાવે છે. પ્રથમ, મુદ્દો સ્થાનિક બચતનો છે, લોકો દર વર્ષે સ્થાનિક બજારમાં રૂ. 3 લાખ કરોડથી વધુનું રોકાણ કરી રહ્યા છે. બીજું, બજારની પહોંચ વિવિધ ક્ષેત્રો અને ભૌગોલિક વિસ્તારોમાં વિસ્તરી છે, જેનાથી રિયલ એસ્ટેટ અને આરોગ્યસંભાળ જેવા પરંપરાગત ઉદ્યોગોથી લઈને ટેકનોલોજી કંપનીઓ જેવા ઉભરતા ક્ષેત્રો સુધી લિસ્ટિંગનો અવકાશ વિસ્તર્યો છે.

DRHP ફાઇલિંગમાં વધારો

IPOના તાજેતરના મજબૂત પ્રદર્શન અને નાના અને મધ્યમ કદના શહેરોમાં કંપનીઓ દ્વારા વ્યૂહરચનામાં પરિવર્તનને કારણે DRHP ફાઇલિંગમાં વધારો થયો છે. અગાઉ, નાના શહેરોમાં પ્રમોટર-સંચાલિત કંપનીઓ લિસ્ટિંગ પર તેમનો હિસ્સો ઘટાડવામાં ખચકાટ અનુભવતી હતી. લિસ્ટિંગ પછી સ્પર્ધકોની નેટવર્થમાં વધારો જોઈને, અન્ય કંપનીઓ પણ આ તરફ આકર્ષાઈ રહી છે. અનુકૂળ બજાર મૂલ્યાંકન પણ કંપનીઓને લિસ્ટિંગ માટે વધુ પ્રોત્સાહિત કરી રહ્યું છે.