STOCK MARKET: અંતિમ અડધા કલાકમાં સેન્સેક્સ 510 પોઈન્ટ ઉછળ્યો, નિફ્ટી 23,123ને પાર

સવારની હળવી ગભરાટ, બપોર પછી ચિંતા અને પછી અંતિમ કલાકોમાં જોરદાર વાપસી - આજનું બજાર જાણે કોઈ ફિલ્મી કહાનીની માફક વર્ત્યું. બજારની શરૂઆત થોડી સુસ્ત રહી. બજારમાં ઉતાર-ચઢાવ આવ્યો, જેના કારણે રોકાણકારો મૂંઝવણમાં મુકાયા. પરંતુ જેમ જેમ દિવસ આગળ વધતો ગયો તેમ તેમ બજારે પોતાનો સાચો રંગ બતાવવાનું શરૂ કર્યું. અંતિમ કલાકમાં જોરદાર ખરીદી થઈ અને બજાર દિવસના ઉચ્ચતમ સ્તરથી ઉપર બંધ થયું.

બપોરે લગભગ 1:30 વાગ્યા પછી ખરીદીમાં વધારો-બજારમાં તેજી જોવા મળી

ભારતીય શેરબજારની શરૂઆત આજે ઘટાડા સાથે થઈ હતી, પરંતુ બપોરે લગભગ 1:30 વાગ્યા પછી ખરીદીમાં વધારો થયો અને બજારમાં તેજી જોવા મળી. પરિણામે, બીએસઇ સેન્સેક્સ 509.73 પોઈન્ટ અથવા 0.69 ટકા વધીને 74,616.58 પર બંધ થયો. એનએસઇ નિફ્ટી 50 પણ 155.40 પોઈન્ટ અથવા 0.68 ટકા વધીને 22,968.25 પર બંધ થયો.

15 કંપનીઓના શેર લાલ નિશાનમાં

સેન્સેક્સની 30 માંથી 19 કંપનીઓના શેર વધારા સાથે બંધ થયા, જ્યારે બાકીની 11 કંપનીઓના શેર ઘટાડામાં હતા. એ જ રીતે, નિફ્ટી 50 ની 50 માંથી 35 કંપનીઓના શેર લીલા નિશાનમાં બંધ થયા, જ્યારે 15 કંપનીઓના શેર લાલ નિશાનમાં હતા.

ખાસ વાત એ છે કે નિફ્ટી 23,100 ની ઉપર રહ્યો, જે બજાર માટે એક મજબૂત સંકેત માનવામાં આવી રહ્યો છે.  માર્કેટ બ્રેડ્થ પણ એકંદરે હકારાત્મક રહી - એનએસઇ પર એડવાન્સ-ડિકલાઈન રેશિયો 2:1 હતો, જેનો અર્થ એ થયો કે ઘટાડા કરતાં વધુ શેર વધ્યા.

સેન્સેક્સ કંપનીઓમાં, એચસીએલ ટેકનો શેર સૌથી વધુ વધ્યો અને 2.77 ટકાના વધારા સાથે રૂ. 1,441.40 પર બંધ થયો. ટાટા ગ્રુપની કંપની ટીસીએસના શેર 2.68 ટકા વધ્યા. જ્યારે દેશની સૌથી મોટી એરલાઇન કંપની ઇન્ડિગોના શેરમાં 0.87 ટકાનો ઘટાડો થયો અને સૌથી વધુ નુકસાન થયું.

આ હતા ટોપ ગેનર્સ અને લૂઝર્સ

ટોપ ગેનર્સમાં એચસીએલ ટેક, ટીસીએસ, ઇન્ફોસિસ, ભારતી એરટેલ અને સન ફાર્માનો સમાવેશ થાય છે. ટોચના નુકસાનકર્તાઓમાં ઇન્ડિગો, અદાણી પોર્ટ્સ, મહિન્દ્રા અને મહિન્દ્રા, ટાઇટન અને ટ્રેન્ટનો સમાવેશ થાય છે.

નિફ્ટી મિડકેપ 0.20 ટકા વધીને બંધ થયો, જ્યારે નિફ્ટી સ્મોલકેપ 0.06 ટકાના સહેજ ઘટાડા સાથે બંધ થયો. ક્ષેત્રીય રીતે, નિફ્ટી આઇટી, નિફ્ટી રિયલ્ટી અને નિફ્ટી મેટલે સારું પ્રદર્શન કર્યું, જ્યારે નિફ્ટી પબ્લિક સેક્ટર બેંકે સૌથી મોટો ઘટાડો જોયો.

RBIની નાણાકીય નીતિ સમિતિની બેઠકના પરિણામો પર  રહેશે નજર

સ્થાનિક સ્તરે, રોકાણકારો હવે બુધવારે યોજાનારી રિઝર્વ બેંક ઓફ ઈન્ડિયાની નાણાકીય નીતિ સમિતિની બેઠકના પરિણામો પર નજર રાખી રહ્યા છે. એવી અપેક્ષા રાખવામાં આવે છે કે કેન્દ્રીય બેંક રેપો રેટમાં કોઈ ફેરફાર નહીં કરે, પરંતુ બજાર તેના ભાવિ નીતિ નિવેદનો પર નજીકથી નજર રાખશે.

ક્રુડ ઓઇલ બજારમાંથી પણ થોડી રાહત મળી. બ્રેન્ટ ક્રૂડ $108 પ્રતિ બેરલથી નીચે આવી ગયું, જેના કારણે એચપીસીએલ અને આઇઓસી જેવી ઓઇલ માર્કેટિંગ કંપનીઓના શેર તેમના નીચા ભાવથી લગભગ 3% સુધર્યા.

દિવસનો અંત બીજા એક સકારાત્મક સંકેત સાથે થયો - રૂપિયો પણ મજબૂત થયો અને 93.01 પ્રતિ ડોલર પર બંધ થયો, જે તેના અગાઉના બંધ 93.06 કરતા વધુ સારો છે.

શેરબજારમાં સુધારા પાછળ પહેલું અને સૌથી મહત્વનું કારણ આઇટી શેરોમાં મજબૂત ખરીદી હતી. આઇચી શેરોમાં મજબૂતાઈએ બજારને મજબૂત ટેકો આપ્યો, અને ઇન્ડેક્સ વધવા લાગ્યો.

યુરોપિયન અને એશિયન બજારોમાં પણ તેજીનો માહોલ

બીજું મુખ્ય પરિબળ વૈશ્વિક સંકેતો હતા. ડાઉ ફ્યુચર્સ લગભગ 120 પોઈન્ટ ઉછળ્યા, જેનાથી રોકાણકારોનો વિશ્વાસ વધ્યો. વધુમાં, યુરોપિયન અને એશિયન બજારોમાં પણ તેજીનો માહોલ જોવા મળ્યો, જેની સીધી અસર ભારતીય બજાર પર પડી. જ્યારે વૈશ્વિક બજારો સકારાત્મક હોય છે, ત્યારે સ્થાનિક બજારમાં લેવાલી પણ વધે છે.

ત્રીજું મહત્વનું પરિબળ ક્રૂડ ઓઇલના ભાવમાં ઘટાડો હતો. બ્રેન્ટ ક્રૂડ લગભગ 2 ટકા ઘટીને $108 પ્રતિ બેરલ થયું, જ્યારે નાયમેક્સ ક્રૂડ પણ 1 ટકા ઘટીને $111 પ્રતિ બેરલ થયું. ક્રૂડના નીચા ભાવ ફુગાવાના દબાણને ઘટાડવાની આશા વધારે છે, જેનાથી બજારને ટેકો મળશે.