આવી રહ્યું છે રિઝર્વ બેંકનું 'ડિજિટા', ઓનલાઈન થતી છેતરપિંડી પર લાગશે અંકુશ

રિઝર્વ બેંક ઓફ ઈન્ડિયા (RBI) ઓનલાઈન છેતરપિંડી અટકાવવા માટે ડિજિટલ ઈન્ડિયા ટ્રસ્ટ એજન્સી (DIGITA)ની સ્થાપના પર ગંભીરતાથી વિચાર કરી રહી છે. 'ડિજિટા' દેશમાં ગેરકાયદે લોન આપતી એપ્સની વધતી સંખ્યાને રોકશે. આનાથી નકલી એપ્સની શોધ અને ડિજિટલ ફ્રોડ અટકાવવાનું પણ સરળ બનશે. ઉપરાંત, આવી એપ્સ ગૂગલ પ્લે સ્ટોર પર દેખાશે નહીં.

આરબીઆઈની 'ડિજિટા' શું છે?
નાણાકીય ગુનાઓને રોકવા માટે 'ડિજિટા' (ડિજિટલ ઈન્ડિયા ટ્રસ્ટ એજન્સી) લાવવામાં આવી રહી છે. મળતી માહિતી અનુસાર, તે ડિજિટલ વર્લ્ડમાં ગેરકાયદેસર એપ્સની તપાસ કરશે. નાણાકીય વિશ્વમાં, જે એપ્સમાં 'ડિજિટા' વેરિફિકેશન નથી તે ગેરકાયદેસર ગણવામાં આવશે. જો કંપનીઓ ફાઇનાન્શિયલ સેક્ટરમાં કામ કરવા ઇચ્છતી હોય તો તેમણે તેમની એપ 'ડિજિટા' દ્વારા ચેક કરાવવી પડશે. આ એજન્સી એપની તપાસ કર્યા બાદ RBIને રિપોર્ટ આપશે. ઉપરાંત, 'ડિજિટા' ગ્રાહકોને યોગ્ય એપને ઓળખવામાં મદદ કરશે.

સાચી અને ખોટી એપને ઓળખવામાં સરળતા રહેશે
'ડિજિટા' વેરિફિકેશન દ્વારા, ડિજિટલ વિશ્વમાં સાચી અને ખોટી એપ્સને ઓળખવી ખૂબ જ સરળ બની જશે. આ ઉપરાંત ડિજિટલ લોન સેક્ટરમાં પણ પારદર્શિતા આવશે. છેલ્લા કેટલાક વર્ષોમાં નાણાકીય ક્ષેત્રમાં ડિજિટલ લોનનો હિસ્સો ઝડપથી વધ્યો છે. પરંતુ, તેના કારણે ડિજિટલ છેતરપિંડી પણ ઝડપથી વધી છે. આવી નકલી લોન એપ્સમાં ફસાઈને લોકો ખૂબ જ પરેશાન છે. પોલીસ પાસે પણ આ કેસોની સંખ્યામાં વધારે છે.

ગૂગલે 2200 એપ હટાવી
ગૂગલ પણ તેના પ્લે સ્ટોર પર ફક્ત તે જ એપ્સ ઉપલબ્ધ કરશે જેને 'ડિજિટા' દ્વારા મંજૂરી આપવામાં આવી છે. RBIએ IT મંત્રાલયને 442 ડિજિટલ લેન્ડિંગ એપ્સની યાદી આપી છે. ગૂગલે આના પર કાર્યવાહી કરવી પડશે. સપ્ટેમ્બર 2022થી ઓગસ્ટ 2023 સુધી, ગૂગલે તેના પ્લે સ્ટોરમાંથી લગભગ 2200 ડિજિટલ લેન્ડિંગ એપ્સ રિમૂવ કરી છે. ગૂગલે તેની નવી પોલિસીમાં માત્ર તે જ એપ્સને મંજૂરી આપવાનો નિર્ણય કર્યો છે જેને આરબીઆઈ દ્વારા મંજૂરી આપવામાં આવી છે. આ નિર્ણય આરબીઆઈ અને નાણા મંત્રાલયના નાણાકીય સેવા વિભાગની વિનંતી પર લેવામાં આવ્યો છે.