મોદી ફેમિલીની લડતમાં નવો વળાંક : માતા-પુત્રની લડાઈમાં માતાનો વિજય, 1100 કરોડની સંપત્તિનો હતો વિવાદ

લંડનમાં સ્થાપિત અને ભારતમાં બ્રિટિશ શાસન દરમિયાન કારોબાર વિસ્તરિત કરનારી કંપની ગોડફ્રે ફિલિપ્સ ઈન્ડિયા લિમિટેડ હવે ભારતીય કંપની મોદી એન્ટરપ્રાઈઝિસનો હિસ્સો બની છે. પરંતુ આ કંપની મુદ્દે માતા-દિકરા વચ્ચે જંગ છેડાઈ છે. મોદી ફેમિલીની લડતમાં વધુ એક નવો વળાંક આવી ચૂક્યો છે. હવે ગોડફ્રે ફિલિપ બોર્ડના એજીએમમાં શેર હોલ્ડર્સે એક્ઝિક્યુટિવ ડાયરેક્ટર સમીર મોદીને બોર્ડથી બહાર કરવાની મંજૂરી આપી દીધી છે. કંપનીએ આપેલા ખુલાસામાં કહ્યું કે સમીર મોદી બહાર ગયા બાદ હાલ આ પદને ભરી શકાશે નહીં. તેમના માતા બીના મોદીને ફરીથી મેનેજિંગ ડાયરેક્ટર તરીકે પસંદ કરવામાં આવ્યા છે. તેમના પુત્રી ચારુ મોદીને પણ એક્ઝિક્યુટિવ ડાયરેક્ટર પસંદ કરવામાં આવ્યા છે. આ મોટા ફેરફાર બાદ મોદી ફેમિલીમાં વિવાદ એક નવો વળાંક લેતો નજર આવી રહ્યો છે. 
આ મહત્વપૂર્ણ બેઠક પહેલા ગ્રૂપના ચેરપર્સન અને મેનેજિંગ ડાયરેક્ટર બીના મોદીને દિલ્હી હાઈકોર્ટથી રાહત મળી, જેણે તેમને એજીએમમાં કેકે મોદી પરિવાર ટ્રસ્ટ તરફથી વોટ આપવાની પરવાનગી આપી દીધી. હાઈકોર્ટે સમીર અને રુચિર મોદીની તે અરજીને પણ ફગાવી દીધી, જેમાં બીના મોદીને AGMમાં વોટ કરવાથી રોકવાની માગ કરવામાં આવી હતી. 

ટ્રસ્ટની પાસે કંપનીમાં આટલી ભાગીદારી

ટ્રસ્ટની પાસે કંપનીમાં લગભગ 47.5 ટકા ભાગીદારી છે, જ્યારે ભાગીદાર વૈશ્વિક દિગ્ગજ ફિલિપ મોરિસ ઈન્ટરનેશનલની પાસે 25 ટકાથી થોડી વધુ ભાગીદારી છે. જોકે, એમડીની નિમણૂકનો અધિકાર સંપૂર્ણરીતે મોદી પ્રમોટર બ્લોક પાસે છે. ઉલ્લેખનીય છે કે કેકે મોદી ગ્રૂપના મુખ્ય કંપનીના પૂર્વ એક્ઝિક્યુટિવ ડાયરેક્ટર સમીર મોદીને તેમના માતા બીના મોદીની લીડરશિપમાં વિરોધી જૂથ દ્વારા બહાર કરવાનો પ્રસ્તાવ મૂકવામાં આવ્યો હતો, જેની પર પ્રમોટર્સે વોટિંગ કરીને મોહર લગાવી દીધી છે. 

બોનસ શેર અને ડિવિડન્ડ

ગોડફ્રે ફિલિપ્સ ઈન્ડિયા લિમિટેડના શેરોમાં શુક્રવારે બિઝનેસમાં ઝડપથી ઉછાળો આવ્યો અને આ પોતાના સર્વાધિક ઉચ્ચ સ્તરે પહોંચી ગયો. ઘરેલૂ બેન્ચમાર્કમાં ભારે ઘટાડા છતાં શેર 14.50 ટકા ઉછળીને 7,320 રૂપિયાનો રેકોર્ડ ઉચ્ચ સ્તરે પહોંચી ગયો. આ તેજી ત્યારે આવી જ્યારે કંપનીએ કહ્યું કે તે 20 સપ્ટેમ્બરે 2:1 ના પ્રમાણમાં શેરોના બોનસ ઈશ્યૂ પર વિચાર કરવા અને તેને મંજૂરી આપવા માટે બેઠક કરશે. જો મંજૂરી મળે છે તો એક શેર પર બે અન્ય શેર મળશે. આ સિવાય ઈક્વિટી શેરો પર 56 રૂપિયા પ્રતિ શેરના દરથી ડિવિડન્ડ આપવાની પણ જાહેરાત કરી છે.

1100 કરોડની સંપત્તિનો વિવાદ

દિગ્ગજ બિઝનેસમેન કેકે મોદી 2019માં મૃત્યુ પામ્યા હતા. કેકે મોદીના બે દિકરા અને એક દિકરી છે. મોટો દિકરો લલિત મોદી મની લોન્ડ્રિંગ મામલે આરોપી છે, જ્યારે દિકરી ચારૂ ભરતિયા મોદી ગ્રુપનો એજ્યુકેશન બિઝનેસ સંભાળે છે. નાનો દિકરો સમીર મોદી રિટેલ અને કોસ્મેટિક્સ સંબંધિત બિઝનેસ સંભાળે છે. કેકે મોદીના મોત બાદ રૂ. 11000 કરોડની પ્રોપર્ટીની ફાળવણી અંગે મોદી પરિવારમાં ખેંચતાણ વધ્યું છે. આ મામલો કોર્ટ સુધી પહોંચ્યો છે. હાલ, તેના પર કોઈ નિર્ણય લેવામાં આવ્યો નથી. ગોડફ્રે ફિલિપ્સનો 50 ટકા હિસ્સો મોદી ફેમિલી પાસે છે.