19% ઘટ્યો અદાણીની કંપનીનો નફો, શેર ₹135 પર પહોંચ્યો

અદાણી ગ્રુપની કંપની અદાણી પાવરે ડિસેમ્બર ક્વાર્ટરના પરિણામો જાહેર કર્યા છે. આ ક્વાર્ટરમાં અદાણી પાવરનો નફો આશરે 19% ઘટ્યો છે. ડિસેમ્બર ક્વાર્ટરનો નફો ₹2,479 કરોડ હતો, જે પાછલા વર્ષના ₹3,057 કરોડના આંકડા કરતા 19% ઓછો છે. આ ઉપરાંત ત્રિમાસિક આવકમાં 8.9 ટકાનો ઘટાડો નોંધાયો છે, જે પાછલા વર્ષના સમાનગાળામાં 13,671 કરોડથી ઘટીને 12,451 કરોડ થયો છે. 

ચોમાસાના વહેલા આગમન અને લાંબા ચોમાસાને કારણે માંગમાં વિક્ષેપ હોવા છતાં, કંપનીનું વીજ વેચાણ વોલ્યુમ 23.6 અબજ યુનિટ (બીયુ) રહ્યું. પાછલા નાણાકીય વર્ષના ત્રીજા ક્વાર્ટરમાં આ આંકડો 23.3 અબજ યુનિટ હતો. આ ક્વાર્ટર દરમિયાન, કંપનીએ આસામમાં પાવર ડિસ્ટ્રિબ્યુશન કંપનીઓ (ડિસ્કોમ) પાસેથી 3,200 મેગાવોટ માટે નવા લાંબા ગાળાના પાવર ખરીદી કરાર (પીપીએ) મેળવ્યા.

કંપનીના સીઈઓએ શું કહ્યું?

અદાણી પાવર લિમિટેડના ચીફ એક્ઝિક્યુટિવ ઓફિસર (સીઈઓ) એસ.બી. ખ્યાલિયાએ જણાવ્યું હતું કે, "અમે અમારી આગામી ક્ષમતાઓ માટે લાંબા ગાળાના વીજ ખરીદી કરારો ઝડપથી મેળવી રહ્યા છીએ. અમારી 23.7 GW વિસ્તરણ યોજનાનો લગભગ અડધો ભાગ રાજ્ય ડિસ્કોમ સાથે PPA હેઠળ હસ્તાક્ષરિત થઈ ગયો છે. અમારી પ્રોજેક્ટ અમલીકરણ પ્રક્રિયા પણ ઉત્તમ રહી છે, અને અમે અમારા લક્ષ્યોને સમયસર અથવા વહેલા પ્રાપ્ત કરી રહ્યા છીએ."

અદાણી પાવરના શેરોની સ્થિતિ

ગુરુવારે, અઠવાડિયાના ચોથા દિવસે, અદાણી પાવરના શેર વેચવાલી મોડમાં હતા. ટ્રેડિંગ દરમિયાન શેર ₹132 પર ટ્રેડ થઈ રહ્યો હતો. જોકે, સ્થાનિક બ્રોકરેજ ફર્મ JM ફાઇનાન્શિયલે થોડા દિવસ પહેલા શેર પર "બાય" રેટિંગ જારી કર્યું હતું. એનો મતલબ એ થયો કે, બ્રોકરેજ હાઉસીઝે રોકાણકારોને શેર ખરીદવાની સલાહ આપી છે.  તેણે પ્રતિ શેર ₹178 નો લક્ષ્ય ભાવ પણ નક્કી કર્યો છે. આ તેના વર્તમાન ભાવથી 20% થી વધુનો સંભવિત વધારો સૂચવે છે. શેરનો 52-અઠવાડિયાનો ઉચ્ચ અને નીચો ભાવ અનુક્રમે ₹182.75 અને ₹93.23 છે.