શું તમને ખબર છે SMSમાં લખેલા S, G, P અને T અક્ષરનો સાચો અર્થ? જાણો કેવી રીતે ઓળખી શકો છો ફ્રોડ મેસેજ
છેલ્લું અપડેટ : 01 Sept 2025
આજના ડિજિટલ યુગમાં, ફ્રોડના કિસ્સાઓ ઝડપથી વધી રહ્યા છે. સ્કેમર્સ દરરોજ નકલી મેસેજ મોકલીને લોકોને ફસાવવાનો પ્રયાસ કરે છે. ઘણીવાર આ સંદેશાઓ બેંકો, ઈ-કોમર્સ કંપનીઓ, ટેલિકોમ ઓપરેટરો અથવા સરકારી સંસ્થાઓના નામે આવે છે. તેમાં આપેલી લિંક પર ક્લિક કરવાથી, તમારા મોબાઈલમાં માલવેર ઇન્સ્ટોલ થઈ શકે છે, જે પર્સનલ ડેટા ચોરી કરે છે અને ગુનેગારો તેનો ઉપયોગ ફ્રોડ માટે કરે છે.
સાચા અને નકલી મેસેજ કેવી રીતે ઓળખવા?
ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) એ પ્રમોશનલ કોલ્સ અને મેસેજ પર કડક કાર્યવાહી કરી છે. હવે કંપનીઓ અને સંસ્થાઓએ તેમના સેન્ડર આઈડી માટે એક નિશ્ચિત ફોર્મેટનો ઉપયોગ કરવો પડશે. સાચુંસેન્ડર આઈડી સામાન્ય રીતે 6 અક્ષરોનું હોય છે અને આ પછી એક હાઇફન (-) અને એક અક્ષર (S, G, P, T) જોડાયેલ હોય છે. ઉદાહરણ: HDFCBK-S અથવા MYGOVT-G. આ અક્ષર જણાવે છે કે તે કયા પ્રકારનો મેસેજ છે.
S, G, P અને Tનો અર્થ
S (Service): આ સર્વિસ સંબંધિત મેસેજ છે. જેમ કે ટ્રાન્ઝેક્શન એલર્ટ, બેંક તરફથી OTP, અથવા ઈ-કોમર્સ સાઈટ પરથી ઓર્ડર કન્ફર્મેશન.
G (Government): સરકારી વિભાગો દ્વારા મોકલવામાં આવતા મેસેજ, જેમ કે એલર્ટ, જાહેર હિત સંદેશાઓ અથવા સરકારી યોજનાઓ વિશે માહિતી.
P (Promotional): પ્રમોશનલ અથવા જાહેરાતવાળા મેસેજ, જેમ કે ઓફર્સ, ડિસ્કાઉન્ટ અથવા માર્કેટિંગ કેમ્પેઈન. આ ફક્ત તે યુઝર્સને મોકલવામાં આવે છે જે DND (ડૂ નોટ ડિસ્ટર્બ) લિસ્ટમાં નથી.
T (Transactional): મહત્ત્વપૂર્ણ અને સમય-સંવેદનશીલ સંદેશાઓ, જેમ કે OTP અથવા અન્ય મહત્ત્વપૂર્ણ નોટિફિકેશન.
આવા મેસેજથી સાવધાન રહો
જો તમને કોઈ બેંક અથવા સરકારના નામે કોઈ સિમ્પલ 10-અંકના મોબાઈલ નંબર પરથી મેસેજ મળે છે, તો સમજો કે તે નકલી છે. વાસ્તવિક સંસ્થાઓ ક્યારેય પર્સનલ નંબરો પરથી મેસેજ નથી મોકલતી. તેથી આગલી વખતે જ્યારે તમને કોઈ મેસેજ મળે, ત્યારે તેમાં લખેલ S, G, P અથવા T ચોક્કસપણે જુઓ. આ નાનું ચિહ્ન તમને મોટા ફ્રોડથી બચાવી શકે છે.
