હવે ઇન્ટરનેટ વગર પણ થશે UPI પેમેન્ટ; જાણો કેવી રીતે કામ કરે છે આ ઓફલાઇન સુવિધા

NPCI (નેશનલ પેમેન્ટ્સ કોર્પોરેશન ઓફ ઈન્ડિયા) એ ઓફલાઇન UPI પેમેન્ટની સુવિધા શરૂ કરી છે. જેનાથી યુઝર્સ ઇન્ટરનેટ વગર પણ સરળતાથી પૈસા મોકલી શકે છે. *99# USSD સેવા દ્વારા મોબાઈલ નંબર નાખીને અને UPI પિન એન્ટર કરીને સુરક્ષિત રીતે ટ્રાન્ઝેક્શન કરી શકાય છે. આ સુવિધા ખાસ કરીને નબળા નેટવર્ક અથવા ઇન્ટરનેટ વગરના વિસ્તારોમાં રહેતા લોકો માટે ખૂબ જ ઉપયોગી છે અને ડિજિટલ પેમેન્ટને વધુ સરળ બનાવે છે.

આજના સમયમાં ઓનલાઇન પેમેન્ટે આપણી જિંદગી ખૂબ જ સરળ બનાવી દીધી છે. શોપિંગથી લઈને મોબાઈલ રિચાર્જ અને બિલ ચુકવણી સુધીના લગભગ તમામ કામ હવે ડિજિટલ પેમેન્ટથી થાય છે. Google Pay, Paytm અને BHIM જેવી એપ્સે પૈસા મોકલવા અને મેળવવાનું ખૂબ જ સરળ બનાવી દીધું છે. પરંતુ ઘણીવાર એવી પરિસ્થિતિ ઊભી થાય છે જ્યારે ઇન્ટરનેટ કામ કરતું નથી અથવા મોબાઈલ ડેટા અને વાઈ-ફાઈ ઉપલબ્ધ હોતું નથી.

આવી સ્થિતિમાં પેમેન્ટ કરવું મુશ્કેલ બની જાય છે, ખાસ કરીને જ્યારે તમારી પાસે રોકડ (Cash) પણ ન હોય. આ સમસ્યાને ધ્યાનમાં રાખીને NPCI એ ઓફલાઇન UPI પેમેન્ટની સુવિધા શરૂ કરી છે. આ સેવા ખાસ કરીને એવા લોકો માટે ઉપયોગી છે જેઓ ઓછા ઇન્ટરનેટ કનેક્ટિવિટી વાળા વિસ્તારોમાં રહે છે. આ સુવિધાની મદદથી તમે ઇન્ટરનેટ વગર પણ તમારા ફોનથી સીધા પૈસા મોકલી શકો છો.

જાણો ઇન્ટરનેટ વગર UPI પેમેન્ટ કેવી રીતે કરવું

સૌથી પહેલા તમારા સ્માર્ટફોન પરથી USSD કોડ *99# ડાયલ કરો.

સ્ક્રીન પર ‘Welcome to *99#’ નો મેસેજ દેખાશે, ત્યાં ‘OK’ પર ક્લિક કરો.

હવે તમારી સામે ઘણા વિકલ્પો આવશે, જેમાંથી ‘Send Money’ નો વિકલ્પ પસંદ કરો.

ત્યારબાદ મોબાઈલ નંબર (Mobile Number) નો વિકલ્પ પસંદ કરો.

 હવે તે વ્યક્તિનો મોબાઈલ નંબર એન્ટર કરો જેને તમે પૈસા મોકલવા માંગો છો.

 નંબર નાખ્યા પછી તે વ્યક્તિનું નામ સ્ક્રીન પર દેખાશે, તેને કન્ફર્મ કરો.

હવે મોકલવાની રકમ (Amount) લખો અને તમારો UPI પિન નાખો. આ સાથે તમારું પેમેન્ટ સફળતાપૂર્વક પૂર્ણ થઈ જશે.

ઓફલાઇન UPI પેમેન્ટ માટેની જરૂરી શરતો

તમારો મોબાઈલ નંબર બેંક એકાઉન્ટ સાથે લિંક હોવો જોઈએ.

તમારું બેંક એકાઉન્ટ UPI સાથે જોડાયેલું હોવું જોઈએ.

તમારો UPI પિન પહેલેથી સેટ હોવો જોઈએ.

બેંકમાં લિંક હોય તે જ મોબાઈલ નંબર પરથી *99# ડાયલ કરવાનું રહેશે.

શા માટે ખાસ છે આ સેવા?

ઓફલાઇન UPI સેવા એવા સમયે ખૂબ મદદરૂપ સાબિત થાય છે જ્યારે ઇન્ટરનેટ ઉપલબ્ધ ન હોય. આ સુવિધા ગ્રામીણ અને નબળા નેટવર્ક વાળા વિસ્તારો માટે વરદાન સમાન છે. ડિજિટલ ઇન્ડિયાના આ યુગમાં આ સેવા સુનિશ્ચિત કરે છે કે ઇન્ટરનેટ ન હોવા છતાં પણ તમારું કોઈ જરૂરી પેમેન્ટ અટકે નહીં.