હવે WhatsAppમાં કોઈ મિસ નહીં કરે તમારું સ્ટેટસ, આવી ગયું છે આ નવું ફીચર

વિશ્વભરના મોટાભાગના સ્માર્ટફોન યુઝર્સ ઇન્સ્ટન્ટ મેસેજિંગ માટે WhatsAppનો ઉપયોગ કરે છે. આજે 3 અબજથી વધુ લોકો તેનો ઉપયોગ કરી રહ્યા છે. પોતાના યુઝર્સને નવો અનુભવ આપવા માટે કંપની સમયાંતરે નવા ફીચર્સ લાવતી રહે છે. હવે WhatsApp દ્વારા સ્ટેટસ પોસ્ટ કરનારા યુઝર્સ માટે એક નવું ફીચર લાવવામાં આવ્યું છે.

WhatsAppનું નવું ફીચર

તમને જણાવી દઈએ કે WhatsApp યુઝર્સની સુરક્ષા અને પ્રાઈવસીનું ખૂબ ધ્યાન રાખે છે. કંપનીએ ભૂતકાળમાં ઘણા સિક્યોરિટી ફીચર્સ રજૂ કર્યા છે. WhatsAppના લાખો યુઝર્સ છે જેઓ તેમની એક્ટિવિટી અને લાગણીઓને શેર કરવા માટે સ્ટેટસનો ઉપયોગ કરે છે. આવા લોકોને વધુ સુવિધા આપવા માટે કંપની એક નવું 'Status Like and Mentions' ફીચર લઈને આવી છે.

સ્ટેટસ લાઈક અને મેન્શન ફીચર યુઝર્સને ખૂબ મદદરૂપ થશે. જ્યારે પણ WhatsAppમાં સ્ટેટસ પોસ્ટ કરવામાં આવે છે ત્યારે તેની સમય મર્યાદા 24 કલાક હોય છે. આવી સ્થિતિમાં, જ્યારે તમે કોઈ વ્યક્તિ માટે સ્ટેટસ મૂકો છો, ત્યારે ઘણી વખત એવું બને છે કે સ્ટેટસની સમય મર્યાદા પૂરી થઈ જાય છે, પરંતુ તે વ્યક્તિ તમારું સ્ટેટસ જોઈ શકતી નથી.

WhatsAppનું આ નવું ફીચર આવ્યા બાદ હવે તમારું ટેન્શન ખતમ થવા જઈ રહ્યું છે, કારણ કે હવે તમે કોઈ ખાસ વ્યક્તિ માટે સ્ટેટસ મૂકશો તો તરત જ લોકોને તેના વિશે જાણકારી મળી જશે અને તેઓ તરત જ તમારું સ્ટેટસ જોઈ લેશે.

સ્ટેટસ નોટિફિકેશન મળશે

તમને જણાવી દઈએ કે WhatsApp હવે સ્ટેટસ માટે કોન્ટેક્ટ મેન્શન નામનું ફીચર લાવી ચુક્યું છે. હવે તમને સ્ટેટસ પોસ્ટ કરતી વખતે લોકોને મેન્શન કરવાનો વિકલ્પ પણ મળશે. તમે તમારા સ્ટેટસમાં જેને મેન્શન કરો છો તેને તમારા સ્ટેટસનું નોટિફિકેશન મળશે. આમાં તમારી પાસે લોકોને ટેગ કરવાનો વિકલ્પ નહીં હોય, તમે ફક્ત તમારા કોન્ટેક્ટ લિસ્ટમાં સામેલ લોકોને મેન્શન કરી શકશો.