તમે પણ CNG કાર ચલાવો છો? તો ઉનાળામાં આ 5 બાબતોને અવગણશો નહીં

પેટ્રોલ અને ડીઝલની વધતી કિંમતોને કારણે હવે સીએનજી કાર મધ્યમ વર્ગના પરિવારોની પહેલી પસંદ બની ગઈ છે. પરંતુ સીએનજી કારના માલિકોએ ઉનાળામાં પોતાની કારની ખાસ કાળજી લેવી પડે છે. જો ઉનાળામાં સીએનજી કારની યોગ્ય રીતે જાળવણી કરવામાં ન આવે તો તે ઘણી સમસ્યાઓનું કારણ બની શકે છે. આવો આજે અમે તમને જણાવીએ ઉનાળાની ઋતુમાં CNG કારની કાળજી રાખવાની કેટલીક ખાસ ટિપ્સ.

તડકામાં ન પાર્ક કરો

ઉનાળાના દિવસોમાં તડકામાં પાર્ક કરેલી કાર ભઠ્ઠીની જેમ ગરમ થવા લાગે છે. તમને લાગતું હશે કે તડકામાં પાર્ક કરેલી કાર બહારથી જ ગરમ થાય છે, પરંતુ કાર અંદરથી પણ સંપૂર્ણપણે ગરમ થઈ જાય છે. વધુ પડતી ગરમીના કારણે કારના સંવેદનશીલ ઉપકરણોને નુકસાન થઈ શકે છે. જો કારમાં ફયુલ લીકેજ થાય છે, તો આગ લાગવાનું જોખમ રહેલું છે.

એન્જિન ઓઈલ

ગરમીના કારણે કારનું એન્જિન ઓઈલ પાતળું થઈ જાય છે. આવી સ્થિતિમાં, કાર કંપની દ્વારા જણાવવામાં આવેલા ગ્રેડના એન્જિન ઓઈલનો ઉપયોગ કરો અને સમય સમય પર તેને ચેક કરાવતા રહો, જેથી એન્જિનને કોઈ નુકસાન ન થાય.

કૂલિંગ સિસ્ટમ અને એસી

તમારી કારની કૂલિંગ સિસ્ટમ ચેક કરાવતા રહો અને જો જરૂરી હોય તો તેમાં પાણી અને કૂલેંટ પણ ભરો. આ સાથે ફેન અને રેડિએટર પણ ચેક કરાવવા જોઈએ. આ સિવાય જો એસી સિસ્ટમ યોગ્ય રીતે કામ ન કરતી હોય તો તેને રિપેર કરાવો.

ફર્સ્ટ-એઇડ કીટ અને અગ્નિશામક ઉપકરણ રાખો

ફર્સ્ટ એઇડ કીટ અને અગ્નિશામક ઉપકરણ હંમેશા કારની અંદર રાખવું જોઈએ. અકસ્માતના કિસ્સામાં, ફર્સ્ટ એઇડ કીટની મદદથી થોડી રાહત આપી શકાય છે. આગના કિસ્સામાં, અગ્નિશામક દ્વારા આગને  નિયંત્રિત કરી શકાય છે.

સીએનજી ટેંક ફુલ ન કરાવો

ઉનાળામાં સીએનજી ટેંકને ફુલ કરાવવાનું ટાળો. હવા અને ગેસ ઊંચા તાપમાને વિસ્તરે છે. ગરમીના કારણે CNG ટેંકનું તાપમાન વધી શકે છે જેના કારણે અંદરનો ગેસ વિસ્તરી શકે છે. જો ટેંક ફુલ ન હોય તો ગેસને ફેલાવવા માટે જગ્યા મળશે અને દુર્ઘટનાની શક્યતા ટાળી શકાય છે. ઉનાળાની ઋતુમાં CNG કારમાં 1-2 કિલો ઓછો ગેસ નાખવો જોઈએ.