નકલી એરબેગનો વેપલો પૂરજોશમાં ચાલી રહ્યો છે, કેવી રીતે કરશો સાચા ખોટાની ખરાઈ?

કારમાં આપવામાં આવતી એરબેગ્સ મુસાફરોની સુરક્ષા માટે ખૂબ જ મહત્ત્વપૂર્ણ ફીચર છે. જે અકસ્માતના કિસ્સામાં મુસાફરોને સુરક્ષિત રાખવા માટે વિશેષ સામગ્રી સાથે ડિઝાઇન કરવામાં આવ્યું છે. પરંતુ તાજેતરમાં દિલ્હી પોલીસે એક એવી ગેંગનો પર્દાફાશ કર્યો છે જે નકલી એરબેગ્સ બનાવતી હતી. દરોડામાં આ ગેંગ પાસેથી પોલીસે અંદાજે રૂ. 1.84 કરોડની કિંમતની 921 કાઉન્ટર ફીટ કરેલી એરબેગ્સ પણ જપ્ત કરી છે. આ ગેંગ ભારતમાં વેચાતી લગભગ તમામ બ્રાન્ડની નકલી એરબેગ્સ બનાવતી હતી. દરોડા દરમિયાન, પોલીસને મારુતિ સુઝુકી, ફોક્સવેગન, BMW, સિટ્રોએન, નિસાન, રેનો, મહિન્દ્રા, ટોયોટા, હોન્ડા, ટાટા મોટર્સ, ફોર્ડ, કિયા, સુઝુકી, હ્યુન્ડાઈ અને વોલ્વો સહિત 16 બ્રાન્ડની એરબેગ મળી આવી હતી.

નકલી એરબેગની ઓળખ કેવી રીતે કરવી?

આવી સ્થિતિમાં, સૌથી મોટો પ્રશ્ન એ ઊભો થાય છે કે નકલી એરબેગ્સથી કેવી રીતે બચવું. સામાન્ય રીતે, તમે કારમાં ફીટ કરેલી એરબેગને ઉપરથી જોઈને ઓળખી શકતા નથી. કારણ કે આ કારની બોડીની અંદર સ્થાપિત હોય છે. પરંતુ જો તમારી કારમાં એરબેગ બદલવાની જરૂર હોય, તો કેટલાક મુદ્દાઓ છે જે ધ્યાનમાં લઈ શકાય છે અને તપાસી શકાય છે.

યુનિક પાર્ટ નંબર:

દરેક એરબેગ પર એક યુનિટ પાર્ટ નંબર આપવામાં આવે છે. તમારે આ નંબરોને કાર ઉત્પાદકના ડેટા બેઝ સાથે મેચ કરવા જોઈએ. જેનો ઉપયોગ તેમની સત્યતાની પુષ્ટિ કરવા માટે કરી શકાય છે. જો નંબર મેળ ખાતો નથી, તો એરબેગ નકલી હોવાની શક્યતા છે.

એરબેગ ગુણવત્તા:

એરબેગ સામાન્ય રીતે પોલિએસ્ટર જેવા મજબૂત કાપડ અથવા ફેબ્રિકથી બનેલું બલૂન જેવું આવરણ હોય છે. અકસ્માતના કિસ્સામાં મુસાફરોને સુરક્ષિત રાખવા માટે તે ટેનેસિલ સ્ટ્રેંથ ધરાવતી વિશેષ સામગ્રી સાથે ડિઝાઇન કરવામાં આવી છે. નકલી એરબેગ્સની ગુણવત્તા અલગ હોય છે અને તેને સરળતાથી શોધી શકાય છે.

ફિનિશિંગ અને ફિટિંગ

નકલી એરબેગ્સની ફિનિશિંગ અને ફિટિંગ એટલી સારી નથી. નકલી એરબેગ્સ ઘણીવાર હલકી ગુણવત્તાની સામગ્રીમાંથી બનાવવામાં આવે છે અને તેમાં દેખાતા કાપડમાં ક્ષતિગ્રસ્ત ભાગો હોઈ શકે છે. લેબલીંગ, સ્ટીચીંગ અને સામગ્રી તેમજ ફિટમેન્ટની ગુણવત્તા ચેક કરો.

નકલી એરબેગથી કેવી રીતે બચવું

સામાન્ય માણસ માટે એરબેગ સાચી છે કે નકલી તેની ઓળખ કરવું થોડું અઘરું છે. કારણ કે આ એક એવો ભાગ છે જે હંમેશા સામાન્ય લોકોને દેખાતો નથી, તેથી તેની ઓળખ થોડી મુશ્કેલ બને છે. તેથી, અહીં અમે તમને કેટલાક એવા ઉપાયો જણાવી રહ્યા છીએ જેના દ્વારા તમે નકલી એરબેગ્સની છેતરપિંડીથી બચી શકો છો.

1)- કારની એરબેગમાં કોઈપણ પ્રકારની ખામીને તપાસવા માટે, તેને હંમેશા સત્તાવાર સેવા કેન્દ્ર પર જ તપાસો.
2)- સામાન્ય રોડસાઇડ વર્કશોપમાં એરબેગ બદલવાની ભૂલ ક્યારેય ન કરો.
3)- એરબેગ્સ ઓનલાઈન ખરીદવાનું ટાળો. આજકાલ ઘણી ઓનલાઈન શોપિંગ સાઈટ છે જે ઓછી કિંમતની લાલચ આપીને નકલી એરબેગ વેચી રહી છે.
4)- સોશિયલ મીડિયા પર પણ ઓછી કિંમતની અને સસ્તી એરબેગ્સ ખરીદવાની લાલચ ટાળો.