VIDEO: એપ અને ઇન્ટરનેટ વગર પણ થશે ફૂડ ઓર્ડર, સ્વદેશી Sarvam AI અને Swiggy એ મળીને રજૂ કર્યું નવું ફીચર

ભારતમાં ઓનલાઈન ફૂડ ઓર્ડર કરવાની પદ્ધતિ બદલાઈ રહી છે. હવે તમારે એપ ખોલીને ટાઈપ કરવાની જરૂર નહીં પડે. બસ બોલો અને તમારું ખાવાનું, ગ્રોસરી કે ટેબલ બુકિંગ બધું જ થઈ જશે.

હકીકતમાં, Swiggy એ સ્વદેશી AI સ્ટાર્ટઅપ Sarvam AI સાથે મળીને 'વોઇસ લેડ કોમર્સ' લોન્ચ કર્યું છે. આ ફીચર યુઝર્સને પોતાની ભાષામાં બોલીને ઓર્ડર કરવાનો વિકલ્પ આપશે.

આ નવી સિસ્ટમ હેઠળ Swiggyની આખી ઇકોસિસ્ટમ બદલાવા જઈ રહી છે. હવે ફૂડ ડિલિવરી, ઈન્સ્ટામાર્ટ અને ડાઇનઆઉટ ત્રણેય સર્વિસનો એકસાથે વોઇસ દ્વારા ઉપયોગ કરી શકાશે. એટલે કે જો તમે એમ કહેવા માંગતા હોવ કે 'મારે એક પનીર બટર મસાલા અને બે નાન જોઈએ છે', તો AI જાતે જ સમજીને ઓર્ડર પ્લેસ કરી દેશે.

સ્વદેશી AI કંપની Sarvam અને Swiggyની ભાગીદારી

સૌથી ખાસ વાત એ છે કે આ ફીચર માત્ર અંગ્રેજી પૂરતું મર્યાદિત નથી. Sarvamનું AI મોડલ હિન્દી સહિત 10થી વધુ ભારતીય ભાષાઓમાં કામ કરશે, જેનાથી નાના શહેરો અને અંગ્રેજી ન જાણતા યુઝર્સ માટે પણ ઓનલાઈન ઓર્ડર કરવાનું સરળ બનશે.

નોંધનીય છે કે આ ટેકનોલોજી પાછળ Sarvamનો AI આસિસ્ટન્ટ 'ઈન્ડસ' (Indus) કામ કરી રહ્યો છે, જે અવાજને સમજીને આખી પ્રક્રિયા સંભાળે છે. જેમાં સર્ચથી લઈને ઓર્ડર અને પેમેન્ટ સુધીની તમામ બાબતો સામેલ છે. આ સિસ્ટમમાં Razorpayની પેમેન્ટ સિસ્ટમ પણ જોડવામાં આવી છે, જેનાથી આખી પ્રોસેસ 'એન્ડ-ટુ-એન્ડ' થઈ જાય છે. Sarvam AIની ભાગીદારી Razorpay સાથે પણ થઈ હોવાથી, બોલીને પેમેન્ટ પણ કરી શકાશે.

એપ અને ઈન્ટરનેટ વગર કેવી રીતે થશે ફૂડ ઓર્ડર?

AI Impact Summit દરમિયાન Sarvam AI અને Swiggy એ બતાવ્યું હતું કે કેવી રીતે કોઈ યુઝર ઈન્ટરનેટ અને એપ વગર પણ Swiggy Instamart પરથી સામાન ઓર્ડર કરી શકે છે. હકીકતમાં, આ માટે Sarvam AIના ચેટ પ્લેટફોર્મ 'Indus' પર Swiggyને ઈન્ટીગ્રેટ કરવામાં આવ્યું છે, એટલે કે ત્યાં ચેટિંગ દરમિયાન વાત કરતાં-કરતાં જ ફૂડ ઓર્ડર કરી શકાય છે. આનો અર્થ એ છે કે યુઝરે અલગ-અલગ સ્ટેપ્સ અનુસરવાની જરૂર રહેશે નહીં. AI પોતે જ બધું સંભાળી લેશે. ઓર્ડર સર્ચથી લઈને પેમેન્ટ સુધીનું બધું જ તમે બોલીને કરી શકશો.

આ ટેકનોલોજીનું બીજું મોટું પાસું 'એક્સેસિબિલિટી' (સરળ પહોંચ) છે. ભારતમાં હજુ પણ કરોડો લોકો એવા છે જેઓ ભાષાના કારણે એપ્સનો સરળતાથી ઉપયોગ કરી શકતા નથી. એવામાં વોઇસ બેઝ્ડ સિસ્ટમ તેમના માટે 'ગેમ ચેન્જર' સાબિત થઈ શકે છે.

તમને જણાવી દઈએ કે મોટાભાગના કેબ ડ્રાઈવરો કે નાના દુકાનદારો ગૂગલના વોઈસ સર્ચ ફીચરનો ઘણો ઉપયોગ કરે છે. જો Sarvam AI પ્રાદેશિક ભાષાઓમાં વોઈસ કમાન્ડને સરળ બનાવે છે, તો લોકોની સ્ક્રીન પરની નિર્ભરતા ચોક્કસપણે ઓછી થઈ શકે છે. રિપોર્ટ્સ મુજબ, કેટલાક કિસ્સાઓમાં તો એપ ડાઉનલોડ કર્યા વગર અને માત્ર ફોન કોલ દ્વારા પણ ઓર્ડર કરી શકાશે. એટલે કે ઈન્ટરનેટ અને એપ બંનેની જરૂરિયાત ઓછી થઈ શકે છે.