ઉનાળામાં પણ ઓછું આવશે વીજળીનું બિલ બસ આ 5 બાબતોનું રાખજો ધ્યાન

ઉનાળાની સિઝન શરૂ થઈ ગઈ છે. લોકો ઉનાળામાં ઘર-ઓફિસમાં એસીનો વધુ ઉપયોગ કરતા હોય છે પરંતુ, જેમ જેમ ગરમી વધે છે તેમ તેમ વીજળીનું બિલ પણ વધવા લાગે છે, પરંતુ જો અમે તમને કહીએ કે તમે ACનો ઉપયોગ કરીને પણ વીજળીનું બિલ બચાવી શકો છો તો? આજે અમે તમને આવી જ કેટલીક ટિપ્સ વિશે જણાવવા જઈ રહ્યા છીએ, જેને અપનાવીને તમે ACનો ભરપૂર ઉપયોગ કરવા છતાં વીજળીનું બિલ ઘટાડી શકો છો.

યોગ્ય તાપમાન પસંદ કરો

ઘણી વખત લોકો રૂમને ઝડપથી ઠંડુ કરવા માટે તેને સીધું 17°C અથવા 16°C પર સેટ કરે છે. આ કારણે વીજળીનો વપરાશ ઝડપથી વધે છે. તાપમાનમાં એક ડિગ્રીનો ઘટાડો કરવાથી વીજળીનો વપરાશ લગભગ 6 ટકા વધી જાય છે. તેથી, જો તમે વીજળીનો વપરાશ ઓછો કરવા માગો છો, તો ACને 24°C અથવા 26°C પર જ ચલાવો. તેનાથી વીજળીનું બિલ ઘટશે.

ફિલ્ટર્સ સાફ રાખો અને સમયસર સર્વિસ કરાવો

જો તમે એર કંડિશનર ચાલુ હોય ત્યારે વીજળીનો વપરાશ ઓછો કરવા માગો છો, તો તમારે સમયાંતરે તેના ફિલ્ટરને સાફ કરતા રહેવું જોઈએ. ઘણી વખત, ફિલ્ટરમાં ગંદકી જમા થઈ જવાને કારણે એર સર્ક્યુલેશનમાં નોંધપાત્ર ઘટાડો થાય છે અને તેના કારણે AC પર દબાણ પણ આવે છે, જેનાથી પાવર વપરાશ વધે છે. તેથી, દર મહિને ફિલ્ટરને સાફ કરો અને વર્ષમાં ઓછામાં ઓછા 1-2 વખત ACની સર્વિસ કરાવો.

બારી-બારણાં બંધ રાખો

ACનો ઉપયોગ કરતી વખતે ધ્યાન રાખો કે રૂમમાંથી ઠંડી હવા બહાર ન જાય. તેના માટે રૂમના બારી-બારણાં બંધ રાખો. તમે બારણાં પર ક્લોઝર પણ લગાવડાવી શકો છો જે બારણું ખુલ્યા બાદ આપોઆપ બંધ થઈ જાય છે. તેનાથી રૂમ લાંબા સમય સુધી ચિલ્ડ રહે છે અને તમારું વીજળીનું બિલ પણ બચશે.

પંખો ચાલુ કરો

પંખો રૂમમાં એર સર્ક્યુલેશન વધારે છે જેના કારણે ઠંડી હવા રૂમમાં ચારેય તરફ ફેલાઈ જાય છે. તમે AC ચાલુ કરીને રૂમ ઠંડો થઈ જાય પછી તેને બંધ કરી શકો છો અને પછી પંખો ચાલુ કરી શકો છો. જેના કારણે એસીને ઓછી મહેનત કરવી પડે છે અને વીજળીની બચત થાય છે.

ટાઈમરનો ઉપયોગ કરો

વીજળીનું બિલ બચાવવા માટે તમે રાત્રે સૂતી વખતે ટાઈમર પણ સેટ કરી શકો છો, જેથી 1-2 કલાક પછી AC આપોઆપ બંધ થઈ જશે. તેનાથી એક મોટો ફાયદો એ થશે કે જો તમે સૂઈ પણ જાઓ છો તો પણ એસી તેના સેટ ટાઇમ પર બંધ થઈ જશે અને વીજળીની બચત થશે. આ ઉપરાંત, ACને આખો દિવસ સતત ન ચલાવો, તેના બદલે ટાઈમર સેટ કરો અને અંતરાલ પર તેને બંધ કરો.