ટોયલેટમાં મોબાઈલ ફોનનો ઉપયોગ કરો છો? તો તમે આ ગંભીર બીમારીનો ભોગ બની શકો છો

જો તમે શૌચાલયમાં ટોયલેટ સીટ પર બેઠા-બેઠા તમારા સ્માર્ટફોનનો ઉપયોગ કરો છો, તો આ આદત તમારા સ્વાસ્થ્ય માટે હાનિકારક બની શકે છે. અમેરિકામાં થયેલા એક નવા અભ્યાસ મુજબ, આ આદતથી પાઈલ્સ થવાનું જોખમ લગભગ 46% સુધી વધે છે. દરેક માનવ શરીરમાં પાઈલ્સ જેવી રચના હોય છે, જેને હેમોરાઈડ્સ કહેવાય છે. આ ગુદા (anus)ની નજીક રક્તવાહિનીઓ અને પેશીઓથી બનેલા ગાદલા જેવી રચના હોય છે જે મળને નિયંત્રિત કરવામાં મદદ કરે છે.

મોટે ભાગે આવા લોકોને થાય છે પાઈલ્સ

સામાન્ય સ્થિતિમાં, તેઓ સમસ્યાઓનું કારણ નથી, પરંતુ જ્યારે તેમાં સોજો આવે છે અથવા તેમાં લોહી એકઠું થવા લાગે છે, તો આ કારણે દુખાવો, સોજો, રક્તસ્ત્રાવ અથવા ગાંઠ જેવી સમસ્યા સામે આવે છે. આ એક ખૂબ જ સામાન્ય સમસ્યા છે, અને એવો અંદાજ છે કે અડધાથી વધુ વસ્તી તેમના જીવનના કોઈને કોઈ સમયે પાઈલ્સથી પીડાય છે. આ પાઈલ્સ મોટે ભાગે 45 વર્ષથી વધુ ઉંમરના લોકો, ગર્ભવતી સ્ત્રીઓ, વધુ વજનવાળા લોકો, વારંવાર કબજિયાત અથવા ઝાડાની સમસ્યા ધરાવતા લોકો, ભારે વજન ઉપાડનારાઓ અને લાંબા સમય સુધી શૌચાલયમાં બેસનારાઓમાં જોવા મળે છે.

ટોઇલેટ સીટ પર બેસવું વધુ ખતરનાક

લાંબા સમય સુધી ખુરશી પર બેસવાથી પાઈલ્સ જોખમ તો વધતું નથી, પરંતુ ટોઇલેટ સીટ પર બેસવું વધુ ખતરનાક માનવામાં આવે છે. ટોઇલેટ સીટ પર બેસવાથી પેલ્વિક ફ્લોર પર દબાણ વધે છે અને ગુદાની આસપાસની નસોમાં લોહી એકઠું થાય છે. આ દબાણ પાઈલ્સ થવાનું કારણ બની શકે છે.

લાંબા સમય સુધી શૌચાલયમાં બેસવામાં છે જોખમ

આ અમેરિકા સ્થિત અભ્યાસમાં 125 લોકો (45+ વર્ષની વયના) સામેલ હતા. તેમને ટોઇલેટમાં સ્માર્ટફોનના ઉપયોગ, ખાવાની આદતો અને શારીરિક પ્રવૃત્તિ વિશે પ્રશ્નો પૂછાયા હતા. ત્યારબાદ કોલોનોસ્કોપી દ્વારા તેમની તપાસ થઈ હતી. જેમાં 66% લોકો શૌચાલયમાં હોય ત્યારે ફોનનો ઉપયોગ કરતા જોવા મળ્યા. આમાંથી 37.3% લોકો શૌચાલયમાં 5 મિનિટથી વધુ સમય બેસતા જોવા મળ્યા, જ્યારે ફોન વગરના લોકોમાં આ પ્રમાણ ફક્ત 7% હતું. શૌચાલયમાં હોય ત્યારે ફોનનો ઉપયોગ કરતા લોકોમાં પાઈલ્સનું જોખમ 46% કરતા વધુ હતું. રસપ્રદ વાત એ છે કે, આ અભ્યાસમાં જોર લગાવવા અને પાઈલ્સ વચ્ચે કોઈ સીધો સંબંધ જોવા મળ્યો નથી. આનો અર્થ એ થયો કે લાંબા સમય સુધી શૌચાલયમાં બેસવામાં વાસ્તવિક જોખમ રહેલું છે.

પાંચ મિનિટથી વધુ સમય માટે શૌચાલયમાં બેસવાથી પાઈલ્સનું જોખમ ઘણું વધે

અગાઉ 2020માં તુર્કી અને ઇટાલીમાં કરાયેલ સંશોધનમાં પણ એ જ જાણવા મળ્યું હતું કે પાંચ મિનિટથી વધુ સમય માટે શૌચાલયમાં બેસવાથી પાઈલ્સનું જોખમ ઘણું વધે છે. તમે ચોક્કસ પગલાં અપનાવીને આનાથી બચી શકો છો: તમારા આહારમાં ફાઇબર અને પાણીની માત્રા વધારો. તમારા ફોન અથવા અન્ય કોઈપણ એવી વસ્તુને શૌચાલયમાં ન લઈ જાઓ, જેના દ્વારા તમે શૌચાલયમાં વધુ સમય વિતાવો છો. શૌચાલયમાં બેસવામાં વિતાવેલો સમય ઓછામાં ઓછો રાખો. જો તમને મળત્યાગ દરમિયાન રક્તસ્ત્રાવ, દુખાવો અથવા ગાંઠ જેવી સમસ્યા દેખાય તો તાત્કાલિક ડૉક્ટરની સલાહ લો.