Bike Riding / 5 ભૂલો જે બાઈક ચાલકોને પડે છે મોંઘી, નુકસાન ટાળવા ધ્યાનમાં રાખો આ બાબતો

દેશભરમાં બાઈક અકસ્માતોની સંખ્યા સતત વધી રહી છે. ઘણી વખત બાઈક ચાલકો અન્યની ભૂલોના કારણે અકસ્માતનો ભોગ બને છે તો ક્યારેક પોતાના દ્વારા કરવામાં આવેલી કેટલીક ભૂલો જોખમી અકસ્માતોનું કારણ બની જાય છે.

સરકાર અને ટ્રાફિક વિભાગ રોડ સેફટી અંગે સતત જાગૃતિ અભિયાન ચલાવી રહ્યા છે, તેમ છતાં કેટલીક ભૂલોના કારણે બાઈક ચાલકો જીવ ગુમાવી રહ્યા છે. ચાલો જાણીએ કે બાઈક ચલાવતી વખતે કઈ ભૂલો ન કરવી જોઈએ.

હેલ્મેટ ન પહેરવું

હેલ્મેટ ન પહેરવાની આદત એ સૌથી સામાન્ય અને ગંભીર સમસ્યા છે. હેલ્મેટ અકસ્માત દરમિયાન માથાની ઈજાને રોકવામાં મદદ કરે છે. આમ છતાં, ઘણા બાઇકર્સ આ મહત્ત્વપૂર્ણ વસ્તુને અવગણે છે, જે ઘણીવાર જીવલેણ સાબિત થાય છે.

ઓવરસ્પીડિંગ

ઓવરસ્પીડિંગ અકસ્માતનું મુખ્ય કારણ બની રહ્યું છે. સ્પીડ લિમિટનું પાલન ન કરવું અને વધુ ઝડપે બાઈક ચલાવવાથી બાઈક પરનું નિયંત્રણ ગુમાવવાની શક્યતા વધી જાય છે. ઓવરસ્પીડિંગને કારણે અકસ્માતોમાં ગંભીર ઈજાઓ થવાની શક્યતા વધુ રહે છે.

સાઈડ મિરર્સનો ઉપયોગ ન કરવો

સાઈડ મિરર્સનો યોગ્ય રીતે ઉપયોગ ન કરવાથી પણ મોટા અકસ્માતો થઈ શકે છે. ઘણા બાઈક ચાલકો લેન બદલતી વખતે પાછળ જોયા વિના વળવાનો પ્રયાસ કરે છે, જે પાછળથી આવતા વાહનો સાથે અથડાવાનું જોખમ વધારે છે. તમને જણાવી દઈએ કે વાહનમાં સાઈડ મિરર્સ ન લગાવવા એ મોટર વ્હીકલ એક્ટનું ઉલ્લંઘન છે અને આ માટે ટ્રાફિક પોલીસ બાઈકને મેમો પણ આપી શકે છે.

મોબાઈલ ફોનનો ઉપયોગ કરવો

બાઈક ચલાવતી વખતે રોડ પરથી ધ્યાન ભટકવાનું સૌથી મોટું કારણ મોબાઈલ ફોનનો ઉપયોગ છે. ટ્રાફિકના નિયમો હોવા છતાં, ઘણા લોકો ફોન પર વાત કરતી વખતે અથવા ટેક્સ્ટિંગ કરતી વખતે તેમની બાઈક ચલાવે છે, જે અકસ્માતોને સીધું આમંત્રણ છે.

ઈન્ડિકેટર્સનો ઉપયોગ ન કરવો

બાઈકને ડાબી કે જમણી તરફ વાળતી વખતે ઈન્ડિકેટર્સનો ઉપયોગ ન કરવો એ પણ ગંભીર ભૂલ છે. જેના કારણે પાછળથી કે બાજુથી આવતા વાહન ચાલકોને દિશા બદલવાની જાણ થતી નથી અને અકસ્માતની શક્યતા વધી જાય છે.