દુનિયાની સૌથી મોટી ક્રિપ્ટો ચોરી! 6 અબજ ડોલર ક્યાં ગયા, FBIના ખુલાસાથી ખળભળાટ
દુનિયાના સૌથી મોટા ક્રિપ્ટોકરન્સી એક્સચેન્જ Binanceમાંથી અંદાજે 6 અબજ ડોલર એટલે કે લગભગ ₹57,000 કરોડની ડિજિટલ કરન્સીની ચોરીના મામલે અમેરિકાની તપાસ એજન્સી FBIએ મોટો ખુલાસો કર્યો છે. FBIના પ્રાથમિક તપાસ અહેવાલ મુજબ, આ ઐતિહાસિક સાયબર હુમલા (Cyber Attack) પાછળ ઉત્તર કોરિયાના હેકર જૂથ ‘TraderTraitor’નો હાથ હોવાની આશંકા છે. જોકે, અમેરિકાના રાષ્ટ્રપતિ ડોનાલ્ડ ટ્રમ્પે આ મામલે ઉત્તર કોરિયાની સંડોવણી અંગે હજુ અનિશ્ચિતતા વ્યક્ત કરી છે.
FBIએ ક્રિપ્ટો એક્સચેન્જોને આપી ચેતવણી
FBIએ શનિવારે જાહેર કરેલા નિવેદનમાં જણાવ્યું કે Binance પર થયેલો હુમલો TraderTraitor જૂથની દૂષિત સાયબર ગતિવિધિઓ સાથે જોડાયેલો છે. આ જ જૂથ પર અગાઉ ગયા વર્ષે Bybit એક્સચેન્જમાંથી આશરે 1.5 અબજ ડોલરની ક્રિપ્ટોકરન્સી ચોરવાનો આરોપ પણ લાગ્યો હતો.
તપાસ એજન્સીએ ક્રિપ્ટો એક્સચેન્જો (Crypto Exchanges), બ્લોકચેન વિશ્લેષણ કરતી કંપનીઓ અને અન્ય સંસ્થાઓને ચોરીની રકમ સાથે જોડાયેલા ડિજિટલ વોલેટના વ્યવહારો અટકાવવા અપીલ કરી છે. હેકર્સ ચોરી કરેલી રકમને અન્ય વોલેટમાં ટ્રાન્સફર કરીને તેનો મૂળ સ્ત્રોત છુપાવી ન શકે તે માટે આ પગલું મહત્વનું માનવામાં આવે છે.
હેકર્સ ચોરીની રકમ કેવી રીતે છુપાવશે?
FBIની પ્રાથમિક તપાસમાં સામે આવ્યું છે કે હેકર્સ ચોરી કરેલી ડિજિટલ સંપત્તિને મુખ્યત્વે Ethereum ક્રિપ્ટોકરન્સીમાં રૂપાંતરિત કરી રહ્યા છે. હવે તેઓ Decentralized Finance (DeFi) પ્લેટફોર્મ અને Instant Swap સેવાઓનો ઉપયોગ કરીને અન્ય ક્રિપ્ટોકરન્સીમાં નાણાં ફેરવવાનો પ્રયાસ કરી શકે છે.
ક્રિપ્ટો નિષ્ણાતોનું માનવું છે કે હેકર્સ મોટી રકમને નાના-નાના હિસ્સામાં વહેંચીને નાના એક્સચેન્જો મારફતે મની લોન્ડરિંગ (Money Laundering) કરવાનો પ્રયાસ કરી શકે છે. આ પ્રક્રિયામાં અનેક મહિના લાગી શકે છે. જોકે, બ્લોકચેન ટેક્નોલોજીના કારણે વ્યવહારોને રિયલ ટાઇમમાં ટ્રેક કરવાની શક્યતા હોવાથી તપાસ એજન્સીઓને ચોરીની સંપત્તિ શોધવામાં મદદ મળી શકે છે.
ટ્રમ્પે કહ્યું, તપાસ ચાલુ છે
અમેરિકાના રાષ્ટ્રપતિ ડોનાલ્ડ ટ્રમ્પે આ મામલે ઉત્તર કોરિયાની સંડોવણી અંગે સાવચેતીભર્યું નિવેદન આપ્યું છે. ફ્લોરિડાના માર-એ-લાગો ખાતે પત્રકારો સાથે વાતચીત દરમિયાન તેમણે કહ્યું કે આ મામલે માહિતી એકત્રિત કરવામાં આવી રહી છે અને હાલમાં એ કહી શકાય નહીં કે ઉત્તર કોરિયા તેમાં સામેલ છે કે નહીં. તપાસ આગળ વધતાં વધુ સ્પષ્ટતા થઈ શકે છે.
Binanceએ ગ્રાહકોને આપી મોટી રાહત
આ સમગ્ર મામલે Binanceએ ગ્રાહકોને રાહત આપતાં જણાવ્યું છે કે કંપની પાસે ચોરી થયેલી ડિજિટલ કરન્સી જેટલો પૂરતો ભંડાર ઉપલબ્ધ છે. તેના આધારે ગુમ થયેલી સંપત્તિના આશરે 90 ટકા હિસ્સાની ભરપાઈ કરવાની ક્ષમતા હોવાનો કંપનીએ વિશ્વાસ વ્યક્ત કર્યો છે. સાથે જ ગ્રાહકોને તેમની સંપૂર્ણ રકમ પરત આપવાની ખાતરી પણ આપી છે.
આ ઘટના ક્રિપ્ટોકરન્સી માર્કેટની સુરક્ષા સામે ગંભીર સવાલ ઊભા કરે છે. જો FBIનો દાવો સાચો સાબિત થાય તો આ હુમલો ડિજિટલ નાણાકીય ઇતિહાસની સૌથી મોટી ચોરીઓમાંની એક બની શકે છે.
