VIDEO/ સંસદમાં પ્રિયંકા ગાંધીનો પાવર પ્લે: ધારદાર પ્રહારો છતાં અમિત શાહ પણ હસી પડ્યા, જુઓ વાયનાડના સાંસદનું પ્રથમ પ્રભાવશાળી ભાષણ

Priyanka Gandhi Lok Sabha Speech: લોકસભામાં વાયનાડના સાંસદ પ્રિયંકા ગાંધી વાડ્રાએ પોતાના ધારદાર ભાષણથી સૌનું ધ્યાન ખેંચ્યું હતું. તેમણે નેહરુ-ગાંધી પરિવારના વારસા અને મહિલા અનામતના મુદ્દે આક્રમક છતાં સૌમ્ય શૈલીમાં રજૂઆત કરી હતી. પ્રિયંકા ગાંધીએ ગૃહમાં કોઈ પણ પ્રકારની કટુતા રાખ્યા વગર મોદી સરકાર અને ખાસ કરીને ગૃહમંત્રી અમિત શાહ પર જે રીતે કટાક્ષ કર્યા, તેના પર અમિત શાહ પણ હસી પડ્યા. સચોટ આંકડા અને તૈયારી સાથે આવેલા પ્રિયંકાએ સત્તા પક્ષને આડે હાથ લેતા જણાવ્યું કે, ભલે કોઈને પસંદ ન આવે પણ વર્ષ 1928માં મોતીલાલ નેહરુએ જ મહિલાઓના સમાન અધિકારોનો પાયો નાખ્યો હતો.

ગૃહમાં પ્રિયંકા ગાંધીની ધારદાર રજૂઆત

ગૃહમાં સંબોધન દરમિયાન પ્રિયંકા ગાંધીએ ખાસ કરીને ઓબીસી મહિલાઓના અધિકારો અને પરિસીમણ પંચની રચના અંગે સવાલો ઉઠાવ્યા હતા. તેમણે આક્ષેપ કર્યો હતો કે સરકારની વ્યૂહનીતિ મહિલાઓના વાસ્તવિક અધિકારો સાથે સમાધાન કરી રહી છે. પ્રિયંકાએ હસતા મુખે રજૂ કરેલી આ દલીલો એટલી પ્રભાવશાળી હતી કે જ્યારે તેમણે અમિત શાહને આજના યુગના 'ચાણક્ય' કહ્યા ત્યારે ગૃહમંત્રી પોતે પણ હસી પડ્યા હતા. આ માહોલની અસર એવી જોવા મળી કે જ્યારે અમિત શાહ જવાબ આપવા ઊભા થયા ત્યારે તેમનો અંદાજ પણ નરમ હતો અને તેમણે કોઈ પણ વ્યક્તિગત હુમલા કરવાનું ટાળ્યું હતું.

પ્રથમ ભાષણ બાદ રાહુલ ગાંધીએ કર્યા દિલથી વખાણ

રસપ્રદ વાત એ છે કે, સંસદમાં જ્યારે આ મહિલા અનામત બિલ પર ચર્ચા થઈ રહી હતી ત્યારે પ્રિયંકા ગાંધીના ભાષણ દરમિયાન તેમની આસપાસ માત્ર પુરુષ સાંસદો જ જોવા મળ્યા હતા. જોકે, કોંગ્રેસના નેતાઓએ સ્પષ્ટતા કરી હતી કે તેમનો બોલવાનો ક્રમ બદલાવાને કારણે આવું બન્યું હતું. બીજી તરફ, કોંગ્રેસના નેતા જયરામ રમેશે 'નારી શક્તિ વંદન અધિનિયમ'ને લાગુ કરવાના સરકારના નિર્ણયને વિચિત્ર ગણાવ્યો છે. તેમણે કહ્યું કે આ બિલના સુધારા પર હજુ ચર્ચા અને મતદાન બાકી છે, તે પહેલા જ તેનું નોટિફિકેશન બહાર પાડવું એ ગૂંચવણભર્યું પગલું છે. પ્રિયંકા ગાંધીના આ પ્રથમ મોટા ભાષણ બાદ રાહુલ ગાંધી સહિત વિપક્ષી નેતાઓએ તેમની પ્રશંસા કરી હતી.