VIDEO / ટ્રમ્પે પહેલીવાર બતાવી ગોલ્ડ વિઝાની ઝલક, જણાવ્યું ક્યારથી ખરીદી શકાશે

અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે પોતાનો નવો ગોલ્ડ કાર્ડ વિઝા બતાવતા કહ્યું કે તે બે અઠવાડિયાથી ઓછા સમયમાં ખરીદી શકાશે. ટ્રમ્પના ગોલ્ડ કાર્ડની કિંમત 50 લાખ ડોલર એટલે કે લગભગ 42 કરોડ 53 લાખ રૂપિયા છે, જે ચૂકવીને કોઈપણ વ્યક્તિ અમેરિકન નાગરિકતા મેળવી શકે છે.

જ્યારે ટ્રમ્પને પૂછવામાં આવ્યું કે ગોલ્ડ કાર્ડનો પહેલો ખરીદનાર કોણ બનશે, ત્યારે તેમણે જવાબ આપ્યો, "હું પહેલો ખરીદનાર છું." ગોલ્ડ કાર્ડ લહેરાવતા ટ્રમ્પે કહ્યું, "5 મિલિયન ડોલરનું રોકાણ કરો અને આ કાર્ડ તમારું થઈ શકે છે. તે કદાચ બે અઠવાડિયાથી ઓછા સમયમાં ઉપલબ્ધ થશે. તમે આ વિશે ખૂબ ઉત્સાહિત છો, ખરું ને?" કાર્ડ પર ટ્રમ્પનો ફોટો છપાયેલો છે અને તે ગોલ્ડન કલરનું છે.

આ વર્ષે ફેબ્રુઆરીમાં, ટ્રમ્પે અમીર વિદેશીઓને આકર્ષવા માટે ગોલ્ડ કાર્ડ જારી કર્યું હતું જેથી તેઓ અમેરિકા આવીને રોકાણ કરી શકે. આ ગોલ્ડ કાર્ડ દ્વારા, કોઈપણ વિદેશી અમેરિકામાં રહી શકે છે અને ત્યાંની નાગરિકતા મેળવી શકે છે. ટ્રમ્પ કહે છે કે ગોલ્ડ કાર્ડથી અમેરિકાને ટ્રિલિયન ડોલરની આવક થશે અને દેશનું વધતું દેવું પણ ઘટશે.

ટ્રમ્પે કહ્યું હતું કે, "તે કંઈક અંશે ગ્રીન કાર્ડ જેવું છે, પરંતુ તેનું સ્તર ઘણું વધારે છે. તે ખાસ કરીને અમીરો લોકો માટે યુએસ નાગરિકતા મેળવવાનો માર્ગ પણ છે."

ગોલ્ડ કાર્ડ પ્રોગ્રામ શું છે?

ગોલ્ડ કાર્ડ પ્રોગ્રામ હેઠળ, ટ્રમ્પ ગોલ્ડ કાર્ડ વિઝા જારી કરવા જઈ રહ્યા છે જેને કોઈપણ અમીર વિદેશી 5 મિલિયન ડોલર ચૂકવીને ખરીદી શકે છે. અમેરિકા પાસે પહેલાથી જ EB-5 ઈમિગ્રન્ટ ઈન્વેસ્ટર વિઝા નામનો આવો પ્રોગ્રામ છે.

આ ઈન્વેસ્ટર વિઝા પ્રોગ્રામ 1990માં શરૂ થયો હતો, જે હેઠળ ઈમિગ્રન્ટ્સ ઓછામાં ઓછા 1 મિલિયન ડોલર (લગભગ 8.75 કરોડ રૂપિયા) ચૂકવીને યુએસ ગ્રીન કાર્ડ મેળવી શકે છે. આ ઉપરાંત, ઓછી આવક ધરાવતા ક્ષેત્રમાં  8 લાખ ડોલરનું રોકાણ કરીને પણ અમેરિકન નાગરિકતા મેળવી શકાય છે જે ઓછામાં ઓછી 10 નોકરીઓનું સર્જન કરે છે. 2024માં 4,500થી વધુ EB-5 વિઝા જારી કરવામાં આવ્યા હતા.

ટ્રમ્પની નવી ગોલ્ડ કાર્ડ યોજના EB-5નું સ્થાન લેશે. EB-5 વિઝા અંગે, યુએસ કોમર્સ સેક્રેટરી હોવર્ડ લુટનિકે કહ્યું હતું કે આ એક બકવાસ વિઝા પ્રોગ્રામ છે જે ભ્રષ્ટાચારનું માધ્યમ બની ગયો છે. જોકે, નવા ઈન્વેસ્ટર વિઝા જૂના વિઝા કરતા ઘણા મોંઘા છે.