VIDEO: મહેસાણામાં ઓવરબ્રિજને રેલવેની મંજૂરી, ટ્રાફિક સમસ્યામાં રાહતની આશા

મહેસાણા શહેરના ગુરુદ્વારા વિસ્તારથી પોલીસ હેડક્વાર્ટરને જોડતા પ્રસ્તાવિત ઓવરબ્રિજને રેલવે વિભાગની મંજૂરી મળી છે. સાંસદ હરિભાઈ પટેલે 30 જુલાઈ 2024ના રોજ લોકસભામાં શૂન્યકાળ દરમિયાન મહેસાણાની ટ્રાફિક સમસ્યા અંગે રજૂઆત કરી હતી. હવે રેલવે મંત્રાલયની મંજૂરી બાદ પ્રોજેક્ટને આગળ વધારવાનો માર્ગ મોકળો થયો છે. ઓવરબ્રિજ બનવાથી મહેસાણા શહેર-1 અને શહેર-2 વચ્ચેની કનેક્ટિવિટી વધુ સુગમ બનવાની સાથે મુખ્ય માર્ગો પરનું ટ્રાફિક ભારણ ઘટાડવામાં મદદ મળી શકે છે. આગામી તબક્કામાં રાજ્ય સરકાર દ્વારા જરૂરી પ્રક્રિયા પૂર્ણ કર્યા બાદ કામ શરૂ થવાની શક્યતા છે. આ પ્રોજેક્ટ શહેરના ટ્રાફિક વ્યવસ્થાપન માટે મહત્વપૂર્ણ ગણાઈ રહ્યો છે અને ભવિષ્યમાં અવરજવર સરળ બનવાની આશા છે.