Patan: 253 વર્ષ જૂનું છત્ર પતેશ્વર મહાદેવ મંદિર, ગાયકવાડી શાસનકાળમાં શરૂ થયું હતું મંદિરનું નિર્માણ

પાટણ શહેરના દામાજીરાવ બાગ ખાતે શ્રી છત્ર પતેશ્વર મહાદેવ મંદિર આવેલું છે, જેનો ઇતિહાસ લગભગ 253 વર્ષ જૂનો છે, આજે શ્રાવણ માસના પ્રથમ સોમવારે અહીં  ભક્તોની ભારે ભીડ જોવા મળી હતી. ગાયકવાડી રાજવંશના શાસનકાળ દરમિયાન બનેલું આ મંદિર પોતાની શિલ્પકલા અને કોતરણીની બેનમૂન રચના માટે જાણીતું છે, જે ભાવિક ભક્તો માટે આસ્થાનું પ્રતીક છે.

ઈ.સ. 1773માં વડોદરા સ્ટેટના રાજા દમાજીરાવ ગાયકવાડે આ મંદિરનું નિર્માણ શરૂ કરાવ્યું હતું. આ મંદિરનું બાંધકામ જમીનથી 20 ફૂટ નીચે કરવામાં આવ્યું છે, જે તેની વિશિષ્ટ રચનાને વધુ અનોખી બનાવે છે. મંદિરમાં ભગવાન શિવના શિવલિંગની સ્થાપના કરવામાં આવી અને તેનું નામ "છત્ર પતેશ્વર" રાખવામાં આવ્યું. 

મંદિરનું નિર્માણ પથ્થરોમાં ઝીણવટભરી કોતરણી અને શિલ્પ સ્થાપત્ય સાથે કરવામાં આવ્યું છે. મંદિરના 36 સ્તંભો પર આધારિત ગુંબજ આજે પણ અકબંધ અને મજબૂત સ્થિતિમાં જોવા મળે છે, જે ગાયકવાડી શાસનની સ્થાપત્ય કુશળતાનું પ્રતીક છે. આ મંદિરની કલાત્મક રચના અને ઐતિહાસિક મહત્ત્વ આજે પણ ભક્તો અને પ્રવાસીઓને આકર્ષે છે.

મંદિરમાં ભક્તોની ભીડ

શ્રાવણ માસના પ્રથમ સોમવારે મંદિરમાં ભક્તોની ભીડ જોવા મળી, જ્યાં શિવલિંગની પૂજા-અર્ચના અને સેવા માટે હજારો ભાવિકો ઉમટ્યા હતા. મંદિરનું ઐતિહાસિક અને આધ્યાત્મિક મહત્વ તેને પાટણના ધાર્મિક વારસાનો અભિન્ન હિસ્સો બનાવે છે. શ્રાવણ માસ દરમિયાન આ મંદિર ભક્તોની આસ્થા અને શિવભક્તિનું કેન્દ્ર બની રહે છે, જ્યાં દરરોજ પૂજા-અર્ચના અને ધાર્મિક વિધિઓનું આયોજન થાય છે.

આ મંદિર માત્ર ધાર્મિક સ્થળ જ નથી, પરંતુ ગુજરાતની સાંસ્કૃતિક અને ઐતિહાસિક ધરોહરનું પણ પ્રતીક છે, જે પેઢીઓથી ભક્તોની આસ્થાને જાળવી રાખે છે.