Video: દિયા તળે અંધારું': AMC દાણાપીઠ કચેરી બહાર જ ગેરકાયદે પાર્કિંગ,
અમદાવાદ શહેરમાં રસ્તા પર ગેરકાયદે પાર્કિંગ કરનારા વાહનચાલકો સામે ટ્રાફિક પોલીસ અને અમદાવાદ મ્યુનિસિપલ કોર્પોરેશન (AMC)નું એસ્ટેટ ડિપાર્ટમેન્ટ કડક કાર્યવાહીના દાવા કરે છે. પરંતુ અમદાવાદ મહાનગરપાલિકાની પોતાની જ મુખ્ય કચેરી બહાર 'દિયા તળે અંધારું' જેવી સ્થિતિ સર્જાઈ છે. દાણાપીઠ સ્થિત AMCની મુખ્ય કચેરી બહાર જ મુખ્ય રોડ પર જ વાહનોનું બેફામ પાર્કિંગ જોવા મળી રહ્યું છે.
પાર્કિંગની જગ્યાના અભાવે મુલાકાતીઓ અને કર્મચારીઓ મજબૂર
કોર્પોરેશનની મુખ્ય કચેરી ખાતે પ્રતિદિન મોટી સંખ્યામાં અરજદારો અને મુલાકાતીઓ પોતાની કામગીરી અર્થે આવતા હોય છે. આ ઉપરાંત, અધિકારીઓ અને કર્મચારીઓના વાહનોની સંખ્યા પણ ખૂબ મોટી છે. કચેરીના પરિસરમાં પૂરતી પાર્કિંગ સુવિધા ન હોવાના કારણે લોકોને પોતાના વાહનો નાછૂટકે બહાર મુખ્ય રોડ પર જ પાર્ક કરવાની નોબત આવે છે, જેના કારણે માર્ગ પર વાહનવ્યવહાર ખોરવાય છે.
પાર્કિંગ પ્લાઝા તૈયાર, છતાં લોકાર્પણનું મુહૂર્ત મળતું નથી
સ્થાનિક પાર્કિંગની સમસ્યા દૂર કરવા માટે મહાનગરપાલિકા દ્વારા નજીકમાં જ આવેલા ફાયર સ્ટેશન પાસે એક નવું પાર્કિંગ તૈયાર કરવામાં આવ્યું છે. પરંતુ આશ્ચર્યની વાત એ છે કે, આ પાર્કિંગનું કામ પૂર્ણ થઈ ગયું હોવા છતાં હજુ સુધી તેનું લોકાર્પણ કરવામાં આવ્યું નથી.
સામાન્ય નાગરિકો જો રોડ પર વાહન પાર્ક કરે તો એસ્ટેટ વિભાગ અને ટ્રાફિક પોલીસ તાત્કાલિક ટોઇંગ કે દંડની કાર્યવાહી કરે છે. ત્યારે હવે સવાલ એ ઊભો થાય છે કે પોતાની જ કચેરી બહાર થતા નિયમભંગ સામે તંત્ર કોની સામે અને ક્યારે પગલાં ભરશે?
