Vadodara: આંગણવાડીના બાળકો દુધ વગર તરસ્યા, અધિકારીઓ એક બીજાને આપી રહ્યા છે ખો

વડોદરાની 438 આંગણવાડીઓમાં 10,000થી વધુ બાળકો પૌષ્ટિક આહારનો મહત્ત્વનો ભાગ ગણાતા દૂધથી વંચિત રહી રહ્યા છે. ઈન્ટિગ્રેટેડ ચાઈલ્ડ ડેવલપમેન્ટ સર્વિસીસ (ICDS) દ્વારા ગ્રાન્ટના અભાવ અને બરોડા ડેરી દ્વારા દૂધના પાઉચના ભાવમાં થયેલા નોંધપાત્ર વધારાને કારણે આ સ્થિતિ સર્જાઈ છે. આ ઉપરાંત, દૂધમાં ફેટ અને કેલરીની માત્રામાં વધારો થયો હોવાને લીધે બાળકોના સ્વાસ્થ્ય અંગે ચિંતા વ્યક્ત કરવામાં આવી રહી છે.

ગ્રાન્ટનો અભાવ અને ભાવ વધારો

આંગણવાડી સંચાલકોના જણાવ્યા મુજબ, ICDSને નાણાકીય ગ્રાન્ટ ન મળવાને કારણે દૂધની ખરીદીમાં મુશ્કેલી આવી રહી છે. બરોડા ડેરીએ દૂધના પાઉચના ભાવમાં બમણો વધારો કર્યો છે, જેના કારણે આંગણવાડીઓ માટે દૂધ ખરીદવું આર્થિક રીતે અશક્ય બની રહ્યું છે. આ ઉપરાંત, દૂધમાં ફેટની માત્રા વધવાને લીધે બાળકોને ડાયેરિયા જેવી સ્વાસ્થ્ય સમસ્યાઓનો સામનો કરવો પડી શકે છે, જેના કારણે દૂધની ગુણવત્તા અને તેની બાળકોના સ્વાસ્થ્ય પર થતી અસરો અંગે સર્વે હાથ ધરવામાં આવ્યો છે.

દૂધની અછત

આંગણવાડીઓમાં દૂધની અછતનો મુદ્દો નવો નથી. જૂન મહિનામાં આખો મહિનો બાળકોને દૂધ વિના રહેવું પડ્યું હતું. જુલાઈમાં 20 દિવસ દૂધના પાઉચનું વિતરણ શરૂ થયું, પરંતુ નાણાકીય અભાવ અને ચાલી રહેલા સર્વેને કારણે તે બંધ થઈ ગયું. છેલ્લા ચાર દિવસથી ફરી એકવાર બાળકો ફ્લેવર્ડ દૂધના પાઉચથી વંચિત છે, જેના કારણે આંગણવાડી સંચાલકો અને વાલીઓમાં નારાજગી જોવા મળી રહી છે.

આંગણવાડી અધિકારી અંબિકા જયસ્વાલ

આંગણવાડી અધિકારી અંબિકા જયસ્વાલે જણાવ્યું કે, "નાણાકીય ગ્રાન્ટના અભાવે દૂધનું વિતરણ શક્ય નથી બની રહ્યું. બરોડા ડેરીના ભાવ વધારા અને દૂધની ગુણવત્તા અંગેના પ્રશ્નોને લીધે પરિસ્થિતિ વધુ જટિલ બની છે." 

બાળકોના પોષણ પર અસર

આંગણવાડીઓ બાળકોના ખોરાક, વજન અને પોષણની તકેદારી રાખવાનું કામ કરે છે. દૂધ એ બાળકોના આહારનો મહત્વનો ભાગ છે, જે પ્રોટીન, કેલ્શિયમ અને અન્ય પોષક તત્વો પૂરા પાડે છે. દૂધની અછતને કારણે બાળકોના પોષણ પર ગંભીર અસર પડી શકે છે, જે લાંબા ગાળે તેમના સ્વાસ્થ્યને નુકસાન પહોંચાડી શકે છે.

મહિલા અગ્રણી ચંદ્રિકા બેન સોલંકી

જોકે મહિલા અગ્રણી ચંદ્રિકા બેન સોલંકીનું કહેવું છે સરકાર દ્વારા ગ્રાન્ટ નહીં ફાળવાતા આંગણવાડીના ભૂલકાંઓ ફ્લેવર્ડ મિલ્કથી વંચિત રહી ગયા છે, સરકાર આ માટે વહેલી તકે ગ્રાન્ટ ફાળવે જેથી બાળકોને પોષણ યુક્ત આહાર પૈકીનું એક ગણાતું દૂધ મળી રહે, તેમણે સરકારી તંત્ર પર આકરા પ્રહારો કર્યા હતા, અને બાળકોના સ્વાસ્થ્ય સાથે ચેડા ના કરવા તાકીદ કર્યા હતા, હવે જોવાનું એ રહેશે કે દૂધની રાહ જોઈને બેઠેલાં આંગણવાડીના ભૂલકાંને દૂધ ક્યારે મળશે, સરકાર આ માટે તાત્કાલિક ગ્રાન્ટ ફાળવે તે જરૂરી છે,