હમાસ બાદ ઈઝરાયેલનો નવો ટાર્ગેટ, PM નેતન્યાહુની જાહેરાતથી લેબનોનથી ઈરાન સુધી મચી હલચલ

ગાઝામાં હમાસના આતંકવાદીઓને લગભગ ખતમ કર્યા બાદ ઈઝરાયેલે હવે પોતાનું નવું લક્ષ્ય નક્કી કર્યું છે. ઇઝરાયેલી સૈન્યએ હવે લેબનોનમાં ઇરાન સમર્થિત હિઝબુલ્લાહને ખતમ કરવાની પ્રતિજ્ઞા લીધી છે. ઈઝરાયેલના વડાપ્રધાન બેન્જામિન નેતન્યાહુની આ જાહેરાત બાદ લેબનોનથી લઈને ઈરાન સુધી ખળભળાટ મચી ગયો છે. બેન્જામિન નેતન્યાહુએ રવિવારે કહ્યું કે ગાઝામાં હમાસ સામેની લડાઈનો વર્તમાન તબક્કો સમાપ્ત થઈ રહ્યો છે. હવે લેબનીઝ આતંકવાદી જૂથ હિઝબુલ્લાનો સામનો કરવા માટે તેની ઉત્તરી સરહદ તરફ વધુ સૈનિકો મોકલવાની તૈયારીઓ શરૂ કરવામાં આવી છે. અમારો ઉદ્દેશ્ય હવે હિઝબુલ્લાહનો નાશ કરવાનો છે.

બેન્જામિન નેતન્યાહુની આ ટિપ્પણીઓએ ઈઝરાયેલ અને હિઝબુલ્લાહ વચ્ચેના તણાવમાં વધુ વધારો કર્યો છે. નેતન્યાહુએ એ પણ સંકેત આપ્યો કે ગાઝામાં ભીષણ લડાઈનો કોઈ અંત નથી. ઇઝરાયેલી નેતાએ એક ટેલિવિઝન ઇન્ટરવ્યુમાં જણાવ્યું હતું કે સેના ગાઝાની દક્ષિણે આવેલા શહેર રફાહમાં તેના વર્તમાન ગ્રાઉન્ડ અભિયાનને પૂર્ણ કરવાની નજીક છે, જેનો અર્થ એ નથી કે હમાસ સામે યુદ્ધ સમાપ્ત થઈ ગયું છે. પરંતુ તેમણે કહ્યું કે ગાઝામાં ઓછા સૈનિકોની જરૂર પડશે, તેમને હિઝબોલ્લાહ સામે લડવા માટે વધુ સ્પેશ મળશે.

હિઝબુલ્લાહ સંગઠનને ઈરાનનું સમર્થન છે

ઈરાન સમર્થિત હિઝબુલ્લાએ 7 ઓક્ટોબરે હમાસના હુમલા બાદ ઈઝરાયેલ પર હુમલો કરવાનું શરૂ કર્યું હતું. ત્યારથી ઇઝરાઇલ અને હિઝબોલ્લાહ વચ્ચે લગભગ દરરોજ ગોળીબાર ઘટનાઓ બની રહી છે. પરંતુ તાજેતરના અઠવાડિયામાં લડાઈ વધી છે, જે અન્ય યુદ્ધ ફાટી નીકળવાની ચેતવણી છે. વ્હાઈટ હાઉસના રાજદૂત એમોસ હોચસ્ટીન ગત અઠવાડિયે ઈઝરાયેલ અને લેબનીઝ અધિકારીઓ સાથે તણાવ ઓછો કરવા માટે બેઠક કરી હોવા છતાં લડાઈ ચાલુ છે. નેતન્યાહુએ કહ્યું કે તેઓ કટોકટીનો રાજદ્વારી ઉકેલ શોધવાની આશા રાખે છે, પરંતુ વચન આપ્યું હતું કે જો જરૂરી હોય તો સમસ્યા "અલગ રીતે" ઉકેલી શકાય છે. તેમણે કહ્યું, "અમે ઘણા મોરચે લડી શકીએ છીએ અને અમે તેના માટે તૈયાર છીએ."