પાકિસ્તાનમાં ફરી બબાલ! ઈમરાન ખાનના હજારો સમર્થકોની ઈસ્લામાબાદ તરફ કૂચ : કલમ 144 લાગુ 

પાકિસ્તાનના પૂર્વ પીએમ ઈમરાન ખાન ગયા વર્ષે મે મહિનાથી જેલમાં છે. તેમના સમર્થકોએ દેશમાં વારંવાર વિરોધ પ્રદર્શન કરી રહ્યા છે. હવે ફરી એકવાર ઇમરાન ખાનના હજારો સમર્થકોએ પાકિસ્તાનની સડકો પર ઉતરવાનું નક્કી કર્યું છે.

ભૂતપૂર્વ શાસક પાકિસ્તાન તહરીક-એ-ઈન્સાફ (પીટીઆઈ) ના સમર્થકો ફરીથી ભૂતપૂર્વ વડા પ્રધાનની મુક્તિની માંગ સાથે રસ્તા પર ઉતરશે. જેમાં ખૈબર પખ્તુનખ્વા, સિંધ અને પંજાબ પ્રાંતમાંથી હજારો પીટીઆઈ સમર્થકો ઈસ્લામાબાદ પહોંચી શકે છે. પીટીઆઈ સમર્થકોએ બપોરે 3 વાગે રેલી યોજવાનું નક્કી કર્યું છે. તે જ સમયે, પાકિસ્તાની વહીવટીતંત્રને આશંકા છે કે આ રેલી ગત વર્ષે મે જેવી સ્થિતિ સર્જી શકે છે.

પ્રશાસને રેલી યોજવા માટે એનઓસી રદ કરી

ઈમરાન ખાને સ્થાપેલી પાર્ટીને અગાઉ આપવામાં આવેલ નો ઓબ્જેક્શન સર્ટિફિકેટ (NOC) રદ્દ કરવા છતાં પીટીઆઈએ આજે ​​(ગુરુવારે) સંઘીય રાજધાનીમાં રેલીની જાહેરાત કરી છે. એક નિવેદનમાં, ગૃહ મંત્રાલયે કહ્યું કે સંઘીય રાજધાનીમાં વિદ્યાર્થીઓની સુરક્ષા સુનિશ્ચિત કરવા માટે આ નિર્ણય લેવામાં આવ્યો છે.

તમામ શૈક્ષણિક સંસ્થાઓ બંધ રાખવાનો નિર્ણય

આ રેલીના આયોજનને ધ્યાનમાં રાખીને સુરક્ષાને ધ્યાનમાં રાખીને, ઇસ્લામાબાદ જિલ્લા પ્રશાસને ગુરુવારે તમામ જાહેર અને ખાનગી શૈક્ષણિક સંસ્થાઓ બંધ રાખવાનો નિર્ણય લીધો છે.

રાજકીય સંઘર્ષ એ આપણો બંધારણીય અને કાનૂની અધિકાર છે

બુધવારે એક નિવેદનમાં પીટીઆઈ ઈસ્લામાબાદના અધ્યક્ષ આમિર મુગલે કહ્યું કે જિલ્લા પ્રશાસને નોટિફિકેશન રદ કર્યું છે, પરંતુ અમે રેલીને રદ્દ કરી નથી તે રાજકીય સંઘર્ષને શાંતિપૂર્ણ રીતે આગળ ધપાવવાનો અમારો બંધારણીય અને કાનૂની અધિકાર છે.