નાઈજીરિયા/  નાઈજર નદીમાં પલટી બોટ, 27ના મોત, 100થી વધુ લાપતા

નાઈજીરિયાના ઉત્તરમાં નાઈજર નદીમાં શુક્રવારે એક મોટી બોટ દુર્ઘટના થઈ હતી. આ અકસ્માતમાં ઓછામાં ઓછા 27 લોકોના મોત થયા છે અને 100થી વધુ લોકો ગુમ છે. જેમાં મોટાભાગની મહિલાઓનો સમાવેશ થાય છે. આ દુર્ઘટના ત્યારે થઈ જ્યારે બોટ કોગી સ્ટેટથી નાઈજર સ્ટેટના ફૂડ માર્કેટમાં જઈ રહી હતી અને પલટી ગઈ.

બોટમાં લગભગ 200 લોકો સવાર હતા. નાઈજર સ્ટેટ ઈમરજન્સી મેનેજમેન્ટ એજન્સીના પ્રવક્તા ઈબ્રાહિમ ઓડુના જણાવ્યા અનુસાર, બચાવકર્મીઓએ શુક્રવાર સાંજ સુધીમાં 27 મૃતદેહો બહાર કાઢ્યા છે. કોગી સ્ટેટ ઇમરજન્સી સર્વિસીસના પ્રવક્તા સાન્દ્રા મોસેસે જણાવ્યું હતું કે સ્થાનિક ડાઇવર્સ અન્ય ગુમ થયેલા લોકોની શોધ કરી રહ્યા હતા, પરંતુ અકસ્માતના લગભગ 12 કલાક પછી પણ કોઈ જીવિત મળ્યું નથી.

ઓવરલોડિંગ બન્યું અકસ્માતનું કારણ?

દુર્ઘટનાનું કારણ સત્તાવાર રીતે જાણવા મળ્યું નથી, પરંતુ સ્થાનિક મીડિયા અનુસાર, બોટ ઓવરલોડ હતી. નાઇજિરીયાના દૂરના વિસ્તારોમાં રસ્તાની સુવિધાના અભાવને કારણે, લોકો વારંવાર જળમાર્ગનો ઉપયોગ કરે છે, જેના કારણે બોટ પર ભીડ જોવા મળે છે.

સલામતીનાં પગલાંનો અભાવ
નાઈજીરિયામાં આવા અકસ્માતો સામાન્ય બની ગયા છે. મોટાભાગના અકસ્માતો બોટના ઓવરલોડિંગ અને જાળવણીના અભાવે થાય છે. ઘણીવાર બોટમાં મુસાફરો માટે પૂરતા લાઈફ જેકેટ હોતા નથી. ઈમરજન્સી સેવાઓ અને સ્થાનિક બચાવ ટીમ ઘટનાસ્થળે પહોંચી ગઈ છે અને રાહત કામગીરીમાં લાગેલી છે. અધિકારીઓએ જણાવ્યું હતું કે મજબૂત પ્રવાહ અને ઊંડા પાણીને કારણે બચાવ કાર્યમાં અવરોધ આવી રહ્યો છે.

બોટમાં સવાર મોટાભાગના મુસાફરો મહિલાઓ હતા, જેઓ બજારમાં ખાદ્યપદાર્થો વેચવા જઈ રહ્યા હતા. બોટ પલટી ગયા બાદ ઘણા લોકો તરતા જોવા મળ્યા હતા, પરંતુ મોટી સંખ્યામાં લોકો હજુ પણ લાપતા છે. આ ઘટનાથી સ્થાનિક સમુદાયમાં ઘેરા શોક અને રોષની લાગણી ફેલાઈ છે.