કેનેડાના આલ્બર્ટામાં સૈન્ય બેઝ પર ભીષણ આગ, અનેક સૈનિકોના મોત

કેનેડાના આલ્બર્ટા પ્રાંતમાં આવેલા એક લશ્કરી મથક પર બનેલી ઘટના બાદ ત્યાં ભીષણ આગ ફાટી નીકળી હતી. કેનેડાના સંરક્ષણ મંત્રી ડેવિડ મેકગિન્ટીએ જણાવ્યું હતું કે આ ઘટનામાં કેટલાક લોકોના મૃત્યુ થયા છે અને ઘણા લોકો ઘાયલ થયા છે, જોકે તેમણે પીડિતોની ચોક્કસ સંખ્યા જણાવી નથી. આગ લાગવાનું કારણ હજુ સુધી જાણી શકાયું નથી.

મેકગિન્ટીએ જણાવ્યું કે 'રોયલ કેનેડિયન માઉન્ટેડ પોલીસ' (RCMP) આ ઘટનાની તપાસ કરી રહી છે. તેમણે પરિસ્થિતિને અત્યંત સંવેદનશીલ ગણાવી હતી અને હાલમાં ત્યાં બચાવ અને રાહત કામગીરી ચાલી રહી છે. કેનેડિયન સશસ્ત્ર દળો, ફેડરલ સરકાર, પ્રાંતીય વહીવટીતંત્ર અને સ્થાનિક સત્તાવાળાઓ સાથે મળીને કામ કરી રહ્યા છે. નજીકના વેઈનરાઈટ (Wainwright) શહેરની હોસ્પિટલો અને અગ્નિશામક દળો પણ મદદ કરી રહ્યા છે.

તેજ પવનને કારણે આગ ઝડપથી ફેલાઈ 

વેઈનરાઈટના સ્થાનિક સત્તાવાળાઓના જણાવ્યા અનુસાર, તેજ પવનને કારણે આગ લશ્કરી મથકની સીમાઓ ઓળંગીને બહાર ફેલાઈ ગઈ હતી. આગને કાબૂમાં લેવા માટે વિવિધ વિસ્તારોમાંથી અગ્નિશામકો ત્યાં પહોંચ્યા હતા. જોકે, સત્તાવાળાઓએ આસપાસના વિસ્તારોમાં રહેતા લોકોને સ્થળાંતર કરવાનો આદેશ આપ્યો નથી.

કેનેડાના વડાપ્રધાન માર્ક કાર્નીએ સોશિયલ મીડિયા દ્વારા આ ઘટનાથી પ્રભાવિત લોકો પ્રત્યે સંવેદના વ્યક્ત કરી છે. આલ્બર્ટાના પ્રીમિયર (મુખ્ય વડા) ડેનિયલ સ્મિથે આ આગને એક ગંભીર અને દુઃખદ ઘટના ગણાવી હતી અને જણાવ્યું હતું કે તેનાથી ઘણા લશ્કરી જવાનો પ્રભાવિત થયા છે.કાર્નીએ કહ્યું કે ફેડરલ સરકાર, આલ્બર્ટા વહીવટીતંત્ર અને સ્થાનિક અધિકારીઓ સાથે મળીને કામ કરી રહી છે અને તેમણે તથા સ્મિથે એકબીજાના સંપર્કમાં રહેવાનું નક્કી કર્યું છે. સ્મિથે બચાવ અને રાહત કાર્યમાં જોડાયેલા તમામ લોકોનો આભાર માન્યો હતો.

કેનેડાના વિરોધ પક્ષ 'કન્ઝર્વેટિવ પાર્ટી'ના નેતા પિયર પોઈલિવરે જણાવ્યું હતું કે તેમણે કાર્ની અને મેકગિન્ટી બંને સાથે વાત કરી છે અને અસરગ્રસ્તોને મદદ કરવાની ખાતરી આપી છે. તેમણે વેઈનરાઈટના રહેવાસીઓને કટોકટીના સમયે આપવામાં આવતી સૂચનાઓનું પાલન કરવા અને બચાવકર્મીઓ માટે રસ્તાઓ ખુલ્લા રાખવા અપીલ કરી છે. આ મથક સૈનિકોને યુદ્ધ માટે તૈયાર કરે છે.

વેઈનરાઈટ લશ્કરી મથક કેનેડાના એડમોન્ટન શહેરથી લગભગ ૧૮૦ કિમી દક્ષિણ-પૂર્વમાં આવેલું છે. તે દેશના સૌથી વ્યસ્ત લશ્કરી તાલીમ કેન્દ્રોમાંનું એક છે, જ્યાં સૈનિકોને યુદ્ધ અભિયાનો માટે તૈયાર કરવામાં આવે છે. આ મથક પર 'કેનેડિયન મેન્યુવર ટ્રેનિંગ સેન્ટર' આવેલું છે, જ્યાં સૈનિકો વાસ્તવિક યુદ્ધ જેવી પરિસ્થિતિઓમાં કવાયત કરે છે. અહીં 'થર્ડ કેનેડિયન ડિવિઝન ટ્રેનિંગ સેન્ટર' પણ છે, જે સૈનિકોને લશ્કરી તાલીમ પૂરી પાડે છે. રક્ષા મંત્રીએ જણાવ્યું છે કે અધિકારીઓ આ ઘટનાના કારણને જાણવા માટે કામ કરી રહ્યા છે અને યોગ્ય સમયે વધુ માહિતી આપવામાં આવશે. પ્રધાનમંત્રી કે પ્રાંતીય વડા (પ્રીમિયર) - કોઈએ પણ આગ લાગવાના કારણ અંગે કોઈ વિગતો આપી નથી. આ ઘટના એવા સમયે બની છે જ્યારે આલ્બર્ટામાં - આગામી થોડા દિવસોમાં - કેનેડાથી અલગ થવાની પ્રક્રિયા શરૂ કરવાના પ્રસ્તાવ પર મતદાન થવાનું છે. જોકે, આગ અને આ રાજકીય મુદ્દા વચ્ચે કોઈ સંબંધ હોવાની પુષ્ટિ થઈ નથી.

કેનેડાના સંરક્ષણ મંત્રી ડેવિડ મેકગિન્ટીએ ઘટનાસ્થળની સ્થિતિની સમીક્ષા કર્યા બાદ જણાવ્યું હતું કે, તેમની યાદગીરીમાં તેમણે આટલો દર્દનાક નજારો ક્યારેય જોયો નથી. તેમણે જવાનોના મોત અને ઈજાગ્રસ્ત થવાની પુષ્ટિ કરી હતી, જોકે સત્તાવાર રીતે મૃતકો કે ઈજાગ્રસ્તોનો ચોક્કસ આંકડો હજુ સુધી જાહેર કરવામાં આવ્યો નથી.

આ દુર્ઘટના પર અલ્બર્ટાના પ્રીમિયર ડેનિયલ સ્મિથે પણ ઊંડા દુઃખની લાગણી વ્યક્ત કરી હતી. વડાપ્રધાન માર્ક કાર્નીએ જણાવ્યું હતું કે કેન્દ્ર સરકાર, પ્રાંતીય પ્રશાસન અને સ્થાનિક તંત્ર મળીને રાહત અને બચાવ કામગીરી હાથ ધરી રહ્યા છે. પરિસ્થિતિ પર કાબૂ મેળવવા માટે અલ્બર્ટા ઉપરાંત અન્ય પ્રાંતોમાંથી પણ વધારાની મદદ અને ફાયર ફાઈટિંગ ટીમો બોલાવવામાં આવી છે.