ગાઝા માટે ભારતનો મોટો નિર્ણય! દુનિયાના 51 દેશો સાથે મળીને ઈઝરાયલની નવી સરકારને કરી આ ખાસ અપીલ

ગાઝામાં રહેતા લોકો માટે શિયાળો એક નવી મુશ્કેલી લઈને આવી શકે છે. આવી સ્થિતિમાં ભારત સહિત સંયુક્ત રાષ્ટ્ર (UN)ના 51 દેશો ગાઝાની વ્હારે આવ્યા છે. તેમણે ઈઝરાયલની નવી સરકારને ત્યાં રાહત સામગ્રીનો સપ્લાય ન અટકાવાની અપીલ કરી છે. આ દેશોએ સ્પષ્ટપણે કહ્યું છે કે, ગાઝાના લોકોને ખોરાક, પાણી, ઈંધણ, દવાઓ અને રહેવા માટે જરૂરી સામાન મળવો જોઈએ. ખાસ ચિંતા મહિલાઓ, બાળકો અને બીમાર લોકોને લઈને વ્યક્ત કરવામાં આવી છે.

ભારત સહિત 51 દેશો ગાઝાની વહારે આવ્યા

ભારતે જોર્ડન, કતાર અને બ્રિટનની આગેવાનીમાં થયેલી આ પહેલનું સમર્થન કર્યું છે. ગુરુવારે યોજાયેલી મીડિયા બ્રીફિંગમાં ભારત તરફથી UNમાં ભારતના ડેપ્યુટી પરમાનન્ટ રિપ્રેઝન્ટેટિવ, એમ્બેસેડર યોજના પટેલ સામેલ થયાં. આ દરમિયાન ભારત સહિત 51 દેશોએ 'ગાઝામાં રાહત અને સ્વાસ્થ્ય સેવાઓ પહોંચાડવાની અપીલ'નું સમર્થન કર્યું.

ભારતના સંયુક્ત રાષ્ટ્ર મિશને શુક્રવારે સોશિયલ મીડિયા પ્લેટફોર્મ X પર કહ્યું કે, શિયાળો શરૂ થવાની સાથે ગાઝાના સામાન્ય લોકો સુધી સુરક્ષિત અને સતત માનવીય મદદ પહોંચાડવી જરૂરી છે. મિશને ખાસ કરીને મહિલાઓ અને બાળકોની જરૂરતોનો ઉલ્લેખ કર્યો. ભારતે સામાન્ય નાગરિકોની સુરક્ષા, આંતરરાષ્ટ્રીય માનવીય કાયદાના પાલન અને ક્ષેત્રમાં સ્થાયી શાંતિના પ્રયાસો નવા સિરેથી શરૂ કરવા પર પણ ભાર મૂક્યો.

ઈઝરાયલની નવી સરકાર પાસે શું માગ કરવામાં આવી?

બ્રિટનના સંયુક્ત રાષ્ટ્રમાં કાયમી પ્રતિનિધિ સારા મેકઈન્ટોશે તમામ દેશો તરફથી સંયુક્ત નિવેદન આપ્યું. આમાં ઈઝરાયલમાં ચૂંટણી પછી બનનારી નવી સરકાર પાસે ગાઝામાં ઝડપથી રાહત પહોંચાડવાની વ્યવસ્થા કરવાની અપીલ કરવામાં આવી.

દેશોએ ઈજિપ્ત અને જોર્ડનના રસ્તાઓથી માનવીય મદદ પહોંચાડવાની મંજૂરી આપવા માટે પણ કહ્યું. આ ઉપરાંત રહેવા માટે જરૂરી સામાન, ઈંધણ, પાણી, સ્વચ્છતા સાથે જોડાયેલી સામગ્રી અને સ્વાસ્થ્ય સેવાઓ માટે જરૂરી ચીજવસ્તુઓની આપૂર્તિ વધારવાની માગ કરવામાં આવી. આનો હેતુ ગાઝામાં લોકોની સ્વાસ્થ્ય સાથે જોડાયેલી સ્થિતિને વધુ બગડતી અટકાવવાનો છે.

ગંભીર દર્દીઓને અન્ય હોસ્પિટલોમાં સારવાર મળે

સંયુક્ત નિવેદનમાં એ દર્દીઓનો મુદ્દો પણ ઉઠાવવામાં આવ્યો, જેમની સારવાર ગાઝામાં શક્ય નથી. દેશોએ આવા લોકોને પૂર્વ યરુશાલેમ અને વેસ્ટ બેંકની હોસ્પિટલો સુધી પહોંચાડવાની મેડિકલ વ્યવસ્થા ફરીથી શરૂ કરવાની માગ કરી.

આ ઉપરાંત, ભારત સહિત આ દેશોએ હોસ્પિટલો, સ્વાસ્થ્યકર્મીઓ અને મેડિકલ વાહનોની સુરક્ષા સુનિશ્ચિત કરવાની વાત કહી. આ સાથે જ સ્વાસ્થ્યકર્મીઓ અને રાહતકર્મીઓ પર થયેલા હુમલાઓની પારદર્શક ફોજદારી તપાસ શરૂ કરવાની સાથે તેને જલ્દી પૂરી કરવાની માગ પણ કરવામાં આવી.

આ દેશોએ શિયાળા માટે ગાઝામાં રાહત કાર્યોમાં સહયોગ આપવાની પ્રતિબદ્ધતા વ્યક્ત કરી છે. આ અંતર્ગત લોકો સુધી રહેવાની જગ્યા, પાણી, સ્વચ્છતા સાથે જોડાયેલી સામગ્રી અને સ્વાસ્થ્ય સેવાઓનો જરૂરી સામાન પહોંચાડવા પર ભાર મૂકવામાં આવ્યો. સાથે જ ક્ષેત્રમાં સ્થાયી શાંતિ અને સ્થિરતા માટે નવેસરથી પ્રયાસો કરવાની જરૂરિયાત જણાવવામાં આવી.