ભારતીય કે અશ્વેત ? કમલા હેરિસ પર ડોનાલ્ડ ટ્રમ્પની વંશીય રીતે અપમાનજનક ટિપ્પણીઓ

અમેરિકી પ્રમુખપદની ચૂંટણીમાં મુકાબલો ડોનાલ્ડ ટ્રમ્પ વિરુદ્ધ કમલા હેરિસનો બની રહ્યો છે. બુધવારે નેશનલ એસોસિએશન ઓફ બ્લેક જર્નાલિસ્ટની વાર્ષિક કોન્ફરન્સમાં ટ્રમ્પે કમલા હેરિસની વંશીય ઓળખ પર સવાલ ઉઠાવ્યા હતા. આ માટે દર્શકોએ તેની મજાક ઉડાવી હતી. લગભગ 1,000 લોકોની ભીડને સંબોધતા ટ્રમ્પે કહ્યું, "કમલા હેરિસ હંમેશા ભારતીય મૂળની હતી અને તે માત્ર ભારતીય મૂળનો જ પ્રચાર કરતી હતી."

તેમણે આગળ કહ્યું, "મને ખબર નથી કે તે ભારતીય છે કે અશ્વેત ? પરંતુ તમે જાણો છો કે હું બંનેનું સન્માન કરું છું. પરંતુ તે સ્પષ્ટપણે નથી માનતી. તે શરૂઆતથી ભારતીય હતી. અચાનક તેણે વળાંક લીધો અને તે અશ્વેત વ્યક્તિ બની ગઈ. " તેમના નિવેદનનો ઘણો વિરોધ થઈ રહ્યો છે.

કમલા હેરિસે પોતાની ઓળખ અશ્વેત અને દક્ષિણ એશિયાઈ અમેરિકન બંને તરીકે આપી છે. તે પ્રથમ અશ્વેત અને એશિયન અમેરિકન યુએસ વાઇસ પ્રેસિડેન્ટ છે. વ્હાઇટ હાઉસના પ્રેસ સેક્રેટરી કેરીન જીન-પિયરે ટ્રમ્પના નિવેદન પર પ્રતિક્રિયા આપતા કહ્યું, "ટ્રમ્પએ જે કહ્યું તે ઘૃણાજનક છે. તે અપમાનજનક છે."

ઇન્ટરવ્યુ દરમિયાન, રિપોર્ટર રશેલ સ્કોટે ટ્રમ્પને પૂછ્યું કે શા માટે અશ્વેત મતદારોએ વંશીય રીતે અપમાનજનક ટિપ્પણીઓ સાથેના વિવાદાસ્પદ ઇતિહાસ હોવા છતાં તેમનું સમર્થન કરવું જોઈએ. ટ્રમ્પે આ પ્રશ્ન પર આકરી પ્રતિક્રિયા આપતા તેને ભયાનક, પ્રતિકૂળ અને અપમાનજનક ગણાવ્યું હતું.  ટ્રમ્પે કહ્યું કે, હું અબ્રાહમ લિંકન પછી અશ્વેત વસ્તી માટે શ્રેષ્ઠ રાષ્ટ્રપતિ રહ્યો છું.

ટ્રમ્પની ટીમે હેરિસ વિરુદ્ધ જાહેરાતો આપી હતી

ચૂંટણી પ્રચાર શરૂ કરતી વખતે, ટ્રમ્પની ટીમે કમલા હેરિસને દેશ માટે ખતરનાક ઉદારવાદી નેતા ગણાવતી જાહેરાતો બહાર પાડી છે. ટ્રમ્પની ટીમે આરોપ લગાવ્યો છે કે કમલા હેરિસ ખતરનાક રીતે ઉદારવાદી છે અને આ દેશ માટે બિલકુલ સારું નથી. કમલા હેરિસ પર ઈમિગ્રન્ટ્સ અંગેની જાહેરાતમાં આરોપ લગાવવામાં આવ્યો છે કે હેરિસ અમેરિકાની દક્ષિણી સરહદ પર ગેરકાયદે ઈમિગ્રન્ટ્સના આક્રમણને રોકવામાં નિષ્ફળ રહ્યા છે.

ટ્રમ્પ અભિયાનના વરિષ્ઠ સલાહકાર ડેનિયલ અલ્વારેઝે કહ્યું કે કમલા હેરિસની નિષ્ફળતાએ અમેરિકાને ઓછું સુરક્ષિત બનાવ્યું છે. ઇમિગ્રન્ટ ગુનામાં વધારો થયો છે, આતંકવાદીઓએ તેમની ખુલ્લી સરહદો ઓળંગી છે, માનવ તસ્કરી દરેક રાજ્યને અસર કરી રહી છે. તેમણે કહ્યું કે હેરિસ ખતરનાક રીતે ઉદારવાદી છે અને અમેરિકનો તેની કિંમત ચૂકવી રહ્યા છે. વિપક્ષી ડેમોક્રેટ્સે આ આરોપોને ફગાવી દીધા છે.