હિઝબુલ્લાએ ફરીથી ઇઝરાયેલના આર્મી બેઝ પર રોકેટ અને ડ્રોનથી કર્યો હુમલો, મિડલ-ઈસ્ટમાં વધ્યો તણાવ

મધ્ય પૂર્વમાં ઈઝરાયેલ અને હમાસ વચ્ચે ચાલી રહેલ યુદ્ધ હવે સતત વણસી રહ્યું છે.  ઈઝરાયેલ અને હિઝબુલ્લાહ પણ હવે સામસામે આવી ગયા છે. બંને વચ્ચે મોટા યુદ્ધના ભણકારા વાગી રહ્યા છે. તેવી જ રીતે, હિઝબુલ્લાએ કહ્યું છે કે તેણે ઇઝરાયેલના અનેક સૈન્ય મથકોને નિશાન બનાવીને મોટો ડ્રોન અને રોકેટ હુમલો કર્યો છે. હિઝબુલ્લાના જણાવ્યા અનુસાર, ઇઝરાયેલ અને હમાસ વચ્ચેના યુદ્ધ પછી આ તેનો સૌથી મોટો હુમલો હતો. હિઝબુલ્લાહ ઈરાન સાથે જોડાયેલું લશ્કરી જૂથ છે.  હિઝબુલ્લાહે ગુરુવારે સતત બીજા દિવસે 150થી વધુ મોટા કદના રોકેટ અને 30 ડ્રોન વડે ઈઝરાયેલ પર હુમલો કર્યો. હિઝબુલ્લાએ દાવો કર્યો છે કે તેના રોકેટ અને ડ્રોને ઇઝરાયેલી સેનાની નવ જગ્યાઓને નિશાન બનાવી હતી. જેનાથી ઇઝરાયેલને ભારે નુકસાન થયું છે. હિઝબુલ્લાહે બુધવારે પણ ઇઝરાયેલ પર લગભગ 250 રોકેટ છોડ્યા હતા.

હિઝબુલ્લાહે કહ્યું કે ઉત્તર ઇઝરાયેલમાં હુમલો ઇઝરાયેલના હવાઈ હુમલાના જવાબમાં હતો જેમાં તેના વરિષ્ઠ કમાન્ડર તાલેબ અબ્દુલ્લાનું મોત થયું હતું. હિઝબુલ્લાએ બદલો લેવા માટે હુમલો કર્યો હતો. અહેવાલ અનુસાર, હિઝબુલ્લાએ ગોલાન હાઇટ્સ સહિત 15 ઇઝરાયેલની જગ્યાઓને નિશાન બનાવવા માટે 150 રોકેટ અને 30 વિસ્ફોટક ડ્રોનનો ઉપયોગ કર્યો હતો. ઇઝરાયેલી મીડિયાના અહેવાલો અનુસાર, હુમલામાં ઓછામાં ઓછા બે લોકો ઘાયલ થયા છે અને આગચંપીની 15 ઘટનાઓ બની છે.

ઇઝરાયેલે પ્રક્ષેપણ અટકાવી દીધું

ઇઝરાયલી સૈન્યએ ટ્વિટર પરની એક પોસ્ટમાં જણાવ્યું હતું કે કેટલાંક પ્રક્ષેપણ રદ કરવામાં આવ્યા હતા અને કેટલાકમાં આગ લાગી હતી. હિઝબુલ્લાહ દ્વારા એક સત્તાવાર નિવેદનમાં કહેવામાં આવ્યું છે કે આ ઓપરેશન ગાઝામાં સંકલ્પબદ્ધ પેલેસ્ટિનિયન લોકોને સમર્થન આપવા અને તેમના હિંમતવાન અને સન્માનજનક પ્રતિકારના સંદર્ભમાં અને લેબનોનમાં ઝિઓનિસ્ટ દુશ્મન દ્વારા કરવામાં આવેલી હત્યાઓના જવાબમાં છે. 

હિઝબુલ્લાહે 200 રોકેટ છોડ્યા હતા

આ પહેલા બુધવારે હિઝબુલ્લાહે ઈઝરાયેલ પર 200 થી વધુ રોકેટ છોડ્યા હતા. મંગળવારે મોડી રાત્રે લેબનીઝ કમાન્ડર માર્યા ગયા ત્યારથી, ઇઝરાયેલમાં સતત સાયરન વાગી રહ્યા હોવાના અહેવાલો છે. આનાથી સ્પષ્ટ છે કે કમાન્ડરના મોત બાદ જ હિઝબુલ્લાએ કાર્યવાહી શરૂ કરી હતી. જવાબમાં, ઇઝરાયેલે દક્ષિણ લેબનોનના વિસ્તારોમાં બોમ્બમારો કરીને અને હિઝબુલ્લાહના સ્થાનોને નિશાન બનાવીને જવાબ આપ્યો. દક્ષિણ લેબનોનના ઘણા ગામોના લોકો તેમના ઘર છોડી ગયા છે.

ગાઝામાં ઈઝરાયેલના હુમલા ચાલુ છે

ઇઝરાયેલી સેનાએ યુદ્ધવિરામની વાટાઘાટો વચ્ચે ગુરુવારે ગાઝામાં હુમલા ચાલુ રાખ્યા હતા. આ સમય દરમિયાન, દક્ષિણના શહેર રફાહમાં લક્ષ્ય આધારિત હુમલા કરવામાં આવ્યા હતા જેમાં ઘણા હમાસ લડવૈયાઓ માર્યા ગયા હોવાના અહેવાલ છે. જાણવા મળ્યું છે કે ઇઝરાયેલી સેનાના તાજેતરના હુમલામાં ગાઝામાં 30 લોકો માર્યા ગયા છે. આ સહિત ગાઝામાં ઈઝરાયેલના હુમલામાં માર્યા ગયેલા પેલેસ્ટાઈનોની સંખ્યા અત્યાર સુધીમાં 37,232 થઈ ગઈ છે.