મેક્સિકોમાં સુપરમાર્કેટમાં વિસ્ફોટ બાદ આગ, ઓછામાં ઓછા 23 લોકોના મોત, 11 લોકો થયા ઘાયલ

મેક્સિકોના ઉત્તરપશ્ચિમ રાજ્ય સોનોરાની રાજધાની હર્મોસિલોમાં એક સ્ટોરમાં ભીષણ આગ અને વિસ્ફોટમાં ઓછામાં ઓછા 23 લોકો માર્યા ગયા, જેમાં ઘણા બાળકોનો સમાવેશ થાય છે અને 11 અન્ય લોકો ગંભીર રીતે ઘાયલ થયા છે. શહેરના ડાઉનટાઉન વિસ્તારમાં આવેલા વાલ્ડોસ સ્ટોરમાં આ અકસ્માત થયો હતો. સોનોરાના ગવર્નર અલ્ફોન્સો દુરાઝોએ સોશિયલ મીડિયા પર પોસ્ટ કરેલા એક વીડિયોમાં ઘટનાની પુષ્ટિ કરી હતી અને પીડિતોના પરિવારજનો પ્રત્યે સંવેદના વ્યક્ત કરી હતી.

ઘાયલોની સારવાર ચાલુ છે.

રાજ્યના એટર્ની જનરલ ગુસ્તાવો સલાસ ચાવેઝે જણાવ્યું હતું કે પ્રારંભિક તપાસમાં જાણવા મળ્યું છે કે ઝેરી વાયુઓ શ્વાસમાં લેવાથી મૃત્યુ થયા છે. તેમણે કહ્યું કે હાલમાં એવા કોઈ સંકેત નથી કે આગ જાણી જોઈને લગાવવામાં આવી હતી, જોકે શક્યતા નકારી શકાતી નથી. ઘટના બાદ, 11 ઘાયલ લોકોને હર્મોસિલોની છ હોસ્પિટલોમાં દાખલ કરવામાં આવ્યા હતા અને તેઓ સારવાર લઈ રહ્યા છે.

રાષ્ટ્રપતિ ક્લાઉડિયા શેનબૌમે વ્યક્ત કર્યો શોક 

મેક્સીકન રાષ્ટ્રપતિ ક્લાઉડિયા શેનબૌમે ઇન્સ્ટાગ્રામ પર પોસ્ટ કરીને કહ્યું, "આ ભયાનક અકસ્માતમાં પ્રિયજનો ગુમાવનારા તમામ પરિવારો પ્રત્યે મારી સંવેદના છે. સરકારી રાહત ટીમો ઘટનાસ્થળે પહોંચી ગઈ છે."

આગ લાગવાના ચોક્કસ કારણની તપાસ કરવામાં આવશે.

સોશિયલ મીડિયા પર પોસ્ટ કરાયેલા વીડિયોમાં સ્ટોર સંપૂર્ણપણે આગમાં લપેટાયેલો જોવા મળ્યો હતો. એક વીડિયોમાં એક બળી ગયેલો માણસ સ્ટોરની બહાર પડી રહ્યો હતો, જે અકસ્માતની ગંભીરતાનો ખ્યાલ આપે છે. સ્થાનિક અધિકારીઓએ અહેવાલ આપ્યો હતો કે ફાયર ફાઇટરોએ ઘણા કલાકોના પ્રયાસો પછી આગ પર કાબુ મેળવ્યો હતો, પરંતુ ત્યાં સુધીમાં નોંધપાત્ર નુકસાન થઈ ચૂક્યું હતું. આગ લાગવાના ચોક્કસ કારણની હાલમાં તપાસ કરવામાં આવી રહી છે.