અમેરિકી ચૂંટણી પંચની વેબસાઇટ પર સાયબર હુમલો! સિસ્ટમ બંધ, મધ્યસત્ર ચૂંટણી પહેલાં મોટો ખતરો?

અમેરિકામાં 3 નવેમ્બરે યોજાનારી મધ્યસત્ર ચૂંટણી (Midterm Elections) પહેલાં ફેડરલ ચૂંટણી પંચની વેબસાઇટ પર સાયબર હુમલાની ઘટના સામે આવી છે. આ હુમલાના પ્રયાસ બાદ ચૂંટણીમાં થતા ખર્ચ અને રાજકીય દાનની વિગતો નોંધાવતી ઇલેક્ટ્રોનિક ફાઇલિંગ સિસ્ટમ (Electronic Filing System) અસ્થાયી રૂપે બંધ કરવી પડી છે. ચૂંટણીના અંતિમ તબક્કામાં બનેલી આ ઘટનાને કારણે રાજકીય પક્ષો અને ચૂંટણી પર નજર રાખતી સંસ્થાઓમાં ચિંતા વધી છે.

ચૂંટણી પંચની ઓનલાઇન સેવાઓ અસ્થાયી રૂપે બંધ

રોઇટર્સ (Reuters)ને મળેલા એક ઇમેઇલ અનુસાર, હેકર અથવા હેકર્સના જૂથે અમેરિકાના ફેડરલ ચૂંટણી પંચ (Federal Election Commission – FEC)ની સિસ્ટમમાં ઘૂસણખોરી કરવાનો પ્રયાસ કર્યો હતો. આ ઘટનાને પગલે પંચે ઇન્ટરનેટ દ્વારા ઉપલબ્ધ કેટલીક સેવાઓ અસ્થાયી રૂપે બંધ કરી દીધી હતી.

ચૂંટણી પંચે જણાવ્યું હતું કે તેની ઇલેક્ટ્રોનિક ફાઇલિંગ સિસ્ટમ હાલ બંધ છે અને આઇટી ટીમ (IT Team) તેને ફરી શરૂ કરવા માટે કામ કરી રહી છે. જોકે, વેબસાઇટ પર અગાઉની ચૂંટણીઓમાં થયેલા ખર્ચની જૂની રિપોર્ટ્સ હજુ પણ જોઈ શકાય છે.

મળતી માહિતી મુજબ, સોમવારે રાત્રે લગભગ 10 વાગ્યાથી સિસ્ટમ બંધ થઈ હતી. મંગળવારે રાત્રે પંચે જણાવ્યું હતું કે સમસ્યાની ઓળખ કરી લેવામાં આવી છે અને તેને દૂર કરવાની પ્રક્રિયા ચાલી રહી છે. જોકે, ત્યારબાદ પણ ફાઇલિંગ સિસ્ટમ બંધ હોવાની માહિતી વેબસાઇટ પર દર્શાવવામાં આવી હતી.

શું મતદાન પર અસર પડશે?

આ ઘટનાથી મતદારોના મતદાનના અધિકાર પર સીધી અસર થવાની આશંકા નથી. તેનું મુખ્ય કારણ એ છે કે અમેરિકામાં ચૂંટણી યોજવાની જવાબદારી ફેડરલ ચૂંટણી પંચની નથી. પંચની ભૂમિકા મુખ્યત્વે ચૂંટણીમાં થતા નાણાકીય વ્યવહારો, રાજકીય દાન અને ખર્ચ સંબંધિત નિયમોનું નિરીક્ષણ કરવાની છે.

જોકે, સિસ્ટમ બંધ થવાથી રાજકીય સંગઠનો માટે ચૂંટણી ખર્ચની ફરજિયાત રિપોર્ટ સમયસર જમા કરાવવી મુશ્કેલ બની શકે છે. કેટલાક અહેવાલો 24 કલાક અને 48 કલાકની અંદર રજૂ કરવાના હોય છે.

આ રિપોર્ટ્સ દ્વારા મતદારો જાણી શકે છે કે ચૂંટણીના અંતિમ દિવસોમાં કયા રાજકીય જૂથ દ્વારા કેટલો ખર્ચ કરવામાં આવી રહ્યો છે અને તેની પાછળ નાણાં કોણ પૂરાં પાડે છે. સિસ્ટમ લાંબા સમય સુધી બંધ રહે તો ચૂંટણીના ખર્ચમાં પારદર્શિતા (Transparency) જાળવવામાં મુશ્કેલી ઊભી થઈ શકે છે.

ટ્રમ્પની રિપબ્લિકન પાર્ટી માટે ચૂંટણી મહત્ત્વની

અમેરિકામાં 3 નવેમ્બરે યોજાનારી મધ્યસત્ર ચૂંટણીથી નક્કી થશે કે રાષ્ટ્રપતિ ડોનાલ્ડ ટ્રમ્પની રિપબ્લિકન પાર્ટી આગામી બે વર્ષ સુધી અમેરિકી સંસદમાં પોતાનું બહુમતીનું વર્ચસ્વ જાળવી શકશે કે નહીં.

આ ચૂંટણી પહેલાં જ ચૂંટણી પંચની સિસ્ટમ પર સાયબર હુમલાના પ્રયાસે રાજકીય નાણાકીય વ્યવસ્થાની સુરક્ષા અંગે સવાલો ઊભા કર્યા છે. જોકે, ઉપલબ્ધ માહિતીમાં આ હુમલા પાછળ કોણ હતું અને હુમલાખોરો સિસ્ટમમાં સફળતાપૂર્વક ઘૂસ્યા હતા કે નહીં, તે સ્પષ્ટ કરવામાં આવ્યું નથી.

અમેરિકાની સૌથી મોંઘી ચૂંટણી બનવાનો અંદાજ

આ વખતે અમેરિકાની મધ્યસત્ર ચૂંટણી અત્યાર સુધીની સૌથી મોંઘી ચૂંટણી બની શકે છે. રાજકીય જાહેરાતો પર નજર રાખતી સંસ્થા એડઇમ્પેક્ટ (AdImpact)ના અંદાજ મુજબ, રાજકીય જાહેરાતો અને ભવિષ્ય માટે બુક કરાયેલી જાહેરાતો પાછળ અત્યાર સુધીમાં આશરે 11.21 અબજ ડોલરનો ખર્ચ થવાનો અંદાજ છે.

આ આંકડો 2024ની ચૂંટણીમાં થયેલા અંદાજિત 11.2 અબજ ડોલરના કુલ ખર્ચ કરતાં પણ વધુ છે. આ ચૂંટણીમાં સુપર પીએસી (Super PACs) અને ડાર્ક મની જૂથો (Dark Money Groups)ની ભૂમિકા પણ મહત્ત્વપૂર્ણ છે. સુપર પીએસી મોટા દાતાઓ પાસેથી મોટી રકમ એકત્ર કરી રાજકીય અભિયાનોને સમર્થન આપી શકે છે.

ચૂંટણીના ખર્ચની દેખરેખ સામે પડકાર

ચૂંટણી પર નજર રાખતી બિનપક્ષીય સંસ્થા ઓપનસિક્રેટ્સ (OpenSecrets)ના સંશોધન નિર્દેશક બ્રેન્ડન ગ્લેવિનના જણાવ્યા અનુસાર, અગાઉના અઠવાડિયામાં સુપર પીએસી અને ડાર્ક મની જૂથોએ સરેરાશ દરરોજ પાંચ કરોડ ડોલરથી વધુ ખર્ચ કર્યો હતો. 20 ઓક્ટોબરના રોજ જ 25 કરોડ ડોલરથી વધુના ખર્ચની રિપોર્ટ સામે આવી હતી.

ચૂંટણી સંબંધિત નાણાકીય નિયમોનું પાલન કરાવતી કંપનીના વડા સ્ટીવન મેલેએ પણ આ ઘટનાને અસામાન્ય ગણાવી હતી. તેમના જણાવ્યા અનુસાર, 26 વર્ષના કારકિર્દી દરમિયાન તેમણે આવી સ્થિતિ જોઈ નહોતી.

હાલ અમેરિકી ચૂંટણી પંચની આઇટી ટીમ સિસ્ટમ પુનઃસ્થાપિત કરવા માટે કામ કરી રહી છે. અમેરિકી સાયબર સુરક્ષા અને ઇન્ફ્રાસ્ટ્રક્ચર સુરક્ષા એજન્સી (CISA) તથા એફબીઆઇ (FBI)એ આ મામલે પૂછપરછ માટે ચૂંટણી પંચનો સંપર્ક કરવા જણાવ્યું છે. સિસ્ટમ ક્યારે સંપૂર્ણ રીતે શરૂ થશે અને આ ઘટનાની પાછળ કોણ જવાબદાર છે તે અંગે હજુ સ્પષ્ટ માહિતી સામે આવી નથી.