"પાકિસ્તાન સાથે સંબંધ તોડવા અશક્ય, પણ આતંકવાદ પર બાંધીશું ભીડ": અમેરિકી વિદેશ મંત્રી માર્કો રુબિયોનો મોટો ખુલાસો

ભારતના 3 દિવસના પ્રવાસે આવેલા અમેરિકી વિદેશ મંત્રી માર્કો રુબિયોએ પાકિસ્તાન સાથેના સંબંધો અંગે મહત્વનું નિવેદન આપ્યું છે. તેમણે સ્પષ્ટ કર્યું છે કે, પાકિસ્તાન પાસે પરમાણુ હથિયાર હોવાથી અને તેની ભૌગોલિક સ્થિતિને કારણે અમેરિકા તેની સાથેના રાજદ્વારી સંબંધો પૂરા કરી શકે નહીં. જોકે, તેમણે ભારતને ખાતરી આપતા જણાવ્યું હતું કે, અમેરિકા આતંકવાદ અને તેને આશરો આપનારા દેશોની સખત વિરુદ્ધ છે અને પાકિસ્તાન સાથેની વાતચીતનો ઉપયોગ ભારતની સુરક્ષા ચિંતાઓને દૂર કરવા માટે કરવામાં આવશે.

મતભેદો હોવા છતાં પાકિસ્તાન સાથે સંવાદ જરૂરી

માર્કો રુબિયોએ જણાવ્યું કે, ‘હવે હું માત્ર એક સેનેટર નથી. વિદેશ મંત્રી તરીકે મારે સમગ્ર અમેરિકાની વિદેશ નીતિ સંભાળવાની છે. આ માટે અમારે એવા દેશો સાથે પણ સંબંધો જાળવવા પડે છે જેની સાથે અમારા ગંભીર મતભેદો હોય. પાકિસ્તાન એક એવો દેશ છે જેની પાસે પરમાણુ હથિયારો છે અને ભૌગોલિક દ્રષ્ટિએ પણ તેની સાથે સંવાદ જાળવી રાખવો અમારી જરૂરિયાત છે.’ રુબિયોએ અમેરિકાના આ વલણની સરખામણી ભારતના ઈરાન સાથેના સંબંધો સાથે કરતાં કહ્યું કે, દરેક દેશે પોતાના હિતો માટે મતભેદ ધરાવતા દેશો સાથે પણ વાત કરવી પડે છે.

આતંકવાદ સામે લડત અને ભારતની સુરક્ષાની ખાતરી

અમેરિકી વિદેશ મંત્રીએ વધુમાં કહ્યું કે, ‘અમેરિકાના પાકિસ્તાન સાથે સીધા સંપર્ક રહેવાથી ભારતની સુરક્ષા સંબંધિત સમસ્યાઓ સીધી રીતે રજૂ કરવાની તક મળે છે. અમે દુનિયામાં કોઈપણ જગ્યાએ થતા આતંકવાદની વિરુદ્ધ છીએ. જે કોઈ દેશ આતંકવાદને પ્રોત્સાહન આપે છે અમે તેનો વિરોધ કરીએ છીએ. આ વલણમાં અમેરિકા તરફથી કોઈ નરમાઈ આવી નથી. જો અમારા પાકિસ્તાન સાથે સંબંધો ચાલુ રહેશે અને અમે તેમની સાથે સીધી વાત કરી શકીશું, તો અમે એવી સ્થિતિમાં હોઈશું કે ભારતને જે બાબતો અંગે ચિંતા છે, જેમ કે આતંકવાદ અને સરહદ પારની ઘૂસણખોરી, તેને રોકવા માટે પાકિસ્તાન પર દબાણ બનાવી શકીએ.’

સંબંધો વચ્ચે સંતુલન જાળવવાનો અમેરિકી પ્રયાસ

વિદેશ મંત્રીના આ વલણથી સ્પષ્ટ થાય છે કે, અમેરિકા એક તરફ ભારત સાથેની પોતાની વ્યૂહાત્મક ભાગીદારી મજબૂત કરી રહ્યું છે, તો બીજી તરફ પાકિસ્તાનમાં પરમાણુ સુરક્ષા અને આતંકવાદ પર નિયંત્રણ રાખવા માટે સંતુલન સાધી રહ્યું છે. રુબિયોના જણાવ્યા અનુસાર ઈસ્લામાબાદ સાથેનો અમેરિકાનો સંપર્ક માત્ર વૈશ્વિક વિદેશ નીતિની મજબૂરી છે, પાકિસ્તાનની આતંકવાદ-સમર્થક નીતિઓને કોઈ પણ પ્રકારનું સમર્થન નથી.