રાષ્ટ્રપતિની ચૂંટણી હારતા જ દેશ છોડી અમેરિકા નાસી ગયા બોલ્સોનારો

બ્રાઝિલના તાજેતરમાં યોજાયેલા રાષ્ટ્રપતિ ચૂંટણીમાં પરાજયનો સામનો કરનાર ફ્લાવિયો બોલ્સોનારો દેશ છોડીને અમેરિકા ચાલી ગયા હોવાના દાવા મંગળવારે અનેક વિદેશી મીડિયા રિપોર્ટ્સમાં કરવામાં આવ્યા છે. જોકે, આ અંગે તેમના પ્રવક્તા તરફથી પૂછવામાં આવેલા સવાલોનો કોઈ જવાબ આપવામાં આવ્યો નથી. ઉલ્લેખનીય છે કે, સોમવારે જ તેમને મંગળવાર બપોર સુધીમાં પોતાનો સામાન્ય અને રાજદ્વારી (ડિપ્લોમેટિક) પાસપોર્ટ જમા કરાવવાનો આદેશ આપવામાં આવ્યો હતો. તેમણે પાસપોર્ટ જમા કરાવ્યો છે કે નહીં તે અંગે હજુ સુધી સ્પષ્ટતા થઈ શકી નથી. આ ઉપરાંત ટેક્સાસ (અમેરિકા)માં રહેતા તેમના ભાઈ એડુઆર્ડો બોલ્સોનારોએ તેમને ચૂંટણી હારવાની સ્થિતિમાં દેશ છોડી દેવાની સલાહ આપી હતી.

ચૂંટણી પરિણામો રદ કરવાની માગ અને પરાજય અસ્વીકાર

ફ્લાવિયો બોલ્સોનારોએ આ રાષ્ટ્રપતિ ચૂંટણીમાં પોતાની હારનો સ્વીકાર કર્યો નથી અને મતદાનમાં વ્યાપક ધાંધલધમાલ થઈ હોવાના ગંભીર આરોપો લગાવ્યા છે. તેમણે ચૂંટણી પરિણામો રદ કરવાની સાથે વિજેતા બનેલા રાષ્ટ્રપતિ લુઇઝ ઇનાસિઓ લૂલા દા સિલ્વા અને ઉપ-રાષ્ટ્રપતિ ગિરાલ્ડો અલ્કમીનની ઉમેદવારી રદ કરવાની માગણી પણ કરી છે. આ ચૂંટણીમાં લૂલાને 6.4 કરોડથી વધુ મતો મળ્યા હતા, જ્યારે ફ્લાવિયોને 6 કરોડથી ઓછા મતો પ્રાપ્ત થતાં બંને વચ્ચે લગભગ 40 લાખ મતોનો મોટો તફાવત રહ્યો હતો. આવી સ્થિતિમાં ચૂંટણી પરિણામો ઉલટાવવા માટે બોલ્સોનારોએ ચૂંટણી કોર્ટમાં ધાંધલીના નક્કર પુરાવા રજૂ કરવા પડશે.

જેલ અને કાનૂની તપાસના ઘેરામાં બોલ્સોનારો પરિવાર

ફ્લાવિયો બોલ્સોનારો બ્રાઝિલના ભૂતપૂર્વ રાષ્ટ્રપતિ ઝાયર બોલ્સોનારોના પુત્ર છે. ઝાયર બોલ્સોનારો 2022ની ચૂંટણી હાર્યા બાદ તખ્તાપલટ કરવાનો પ્રયાસ કરવાના ગુનામાં 27 વર્ષની જેલની સજા કાપી રહ્યા છે અને હાલ નજરકેદ હેઠળ છે. આ ઉપરાંત, ફ્લાવિયો પોતે પણ ભ્રષ્ટાચાર, મની લોન્ડરિંગ અને કરચોરી સાથે જોડાયેલા બે અલગ-અલગ કાનૂની કેસોમાં તપાસનો સામનો કરી રહ્યા છે, જોકે તેમણે પોતાના પર લાગેલા તમામ આરોપોને નકારી કાઢ્યા છે.

ડોનાલ્ડ ટ્રમ્પનો લૂલાની જીત પર ધાંધલીનો આરોપ

અમેરિકન પ્રમુખ ડોનાલ્ડ ટ્રમ્પે પણ બ્રાઝિલના ચૂંટણી પરિણામો પર સવાલ ઉઠાવ્યા છે. મધ્યસત્ર ચૂંટણીના પ્રચારમાં વ્યસ્ત ટ્રમ્પે સોમવારે કોઈ પણ પુરાવા આપ્યા વિના પત્રકારોને જણાવ્યું હતું કે, બ્રાઝિલની ચૂંટણીમાં ડાબેરી નેતા લૂલા દા સિલ્વા જીત્યા તે એક વધુ ધાંધલીવાળી ચૂંટણી લાગે છે. નોંધનીય છે કે, લૂલા દા સિલ્વા ચોથી વખત બ્રાઝિલના રાષ્ટ્રપતિ બનવા જઈ રહ્યા છે અને તેઓ ડોનાલ્ડ ટ્રમ્પના આકરા આલોચક માનવામાં આવે છે