Video: સાઉદીના સંરક્ષણ મંત્રાલય અને સૌથી મોટી તેલ રિફાઈનરી પર મિસાઈલ હુમલો : હુથીઓએ ટાર્ગેટ કરી હોવાનો દાવો

યમનના ઈરાન સમર્થિત હુથી બળવાખોરોએ સાઉદી અરેબિયાની રાજધાની રિયાધ સ્થિત સંરક્ષણ મંત્રાલય અને દેશની સૌથી મોટી તેલ રિફાઇનરી રાસ તાનુરા પર બેલેસ્ટિક મિસાઈલ વડે હુમલો કર્યાનો દાવો કર્યો છે. આ હુમલા બાદ વિસ્તારમાં ભારે તણાવ ઊભો થયો છે. હુથી બળવાખોરોના સૈન્ય પ્રવક્તા યાહ્યા સરિયાના જણાવ્યા અનુસાર, તેમણે રિયાધમાં આવેલા સાઉદીના સંરક્ષણ મંત્રાલયને સીધું નિશાન બનાવ્યું હતું. આ ઉપરાંત, બળવાખોરોએ નજરાન એરપોર્ટ પરના 2 સૈન્ય પરિવહન વિમાનો અને ખમીસ મુશૈત સ્થિત એરબેઝને પણ નિશાન બનાવ્યા હોવાનો દાવો કર્યો છે. બીજી તરફ, સાઉદી ગઠબંધન સેનાએ જણાવ્યું છે કે તેમણે રિયાધ તરફ છોડવામાં આવેલી 2 અને પૂર્વીય પ્રાંત તરફ આવેલી 1 મળીને કુલ 3 મિસાઈલોને હવામાં જ નિષ્ફળ બનાવી દીધી હતી. રિયાધમાં ધમાકાના અવાજ બાદ સ્થાનિક રહીશોને સલામત સ્થળે ખસી જવા મોબાઈલ એલર્ટ મોકલવામાં આવ્યા હતા.