ભારતની વધતી તાકાતથી ગભરાયું ચીન! હવે પાકિસ્તાનના ખભે બંદૂક રાખીને રચી રહ્યું છે મોટું ષડયંત્ર

ભારતની વધતી તાકાતથી ગભરાયું ચીન! હવે પાકિસ્તાનના ખભે બંદૂક રાખીને રચી રહ્યું છે  મોટું ષડયંત્ર
તસવીર: gstv
આ સમાચાર સાંભળો

અમેરિકન કોંગ્રેસના યુએસ-ચાઇના ઇકોનોમિક એન્ડ સિક્યોરિટી રિવ્યૂ કમિશન (USCC)ના એક રિપોર્ટમાં ભારત માટે ગંભીર સુરક્ષા ચિંતાઓ વ્યક્ત કરવામાં આવી છે. રિપોર્ટમાં જણાવાયું છે કે ચીન અને પાકિસ્તાન વચ્ચે વધતા સૈન્ય સંબંધો ભારત માટે બે મોરચે સુરક્ષા પડકારનું જોખમ વધારી રહ્યા છે. USCCએ વોશિંગ્ટનને હિંદ મહાસાગરમાં નવી દિલ્હી સાથે સંરક્ષણ ક્ષેત્રે ઓપરેશનલ સંબંધો વધુ મજબૂત બનાવવાની અપીલ કરી છે. આ રિપોર્ટ 'China's Other Front: India and the Future of US Strategy in the Indo-Pacific' નામના ચેપ્ટરમાં રજૂ કરવામાં આવ્યો છે.

ચીન પાકિસ્તાનને ભારત સામે લડવા મદદ કરી શકે છે

અમેરિકાના રિપોર્ટમાં મોટો ખુલાસો થયો છે. રિપોર્ટમાં ભારતનો મુકાબલો કરવા માટે પાકિસ્તાનને ચીન તરફથી મળતા સમર્થનનો ઉલ્લેખ કરવામાં આવ્યો છે. જોકે, આ દરમિયાન ભારત અને ચીન વચ્ચે અવિશ્વાસ હજુ પણ યથાવત છે. પાકિસ્તાન સાથે ચીનની વધતી સૈન્ય ભાગીદારીએ ભારત માટે 2 મોરચે યુદ્ધની સ્થિતિનું જોખમ ઊભું કર્યું છે, જે ચિંતાનો વિષય છે.

જાહેરાત

ઓપરેશન સિંદૂર દરમિયાન ચીનની મદદથી ભારતની ચિંતા વધી

મેં 2025માં ઓપરેશન સિંદૂર દરમિયાન ભારત-પાકિસ્તાન સંઘર્ષે દર્શાવ્યું હતું કે ચીન સીધા યુદ્ધમાં સામેલ થયા વિના પણ સંકટના સમયે પાકિસ્તાનને મદદ પહોંચાડી શકે છે. આ ઘટનાએ ભારતની ચિંતા વધારી છે કે ભવિષ્યમાં પાકિસ્તાન સાથે કોઈ સંઘર્ષ થાય તો ચીન તેને મદદ કરી શકે છે.

અમેરિકન રિપોર્ટમાં શું કહેવામાં આવ્યું?

અમેરિકી રિપોર્ટ અનુસાર, ભારત એવા પસંદગીના દેશોમાં સામેલ છે, જેની પાસે નોંધપાત્ર વસ્તી, આર્થિક, સૈન્ય અને ભૌગોલિક ક્ષમતા છે. આ ક્ષમતા ચીનની તાકાતને ઘણી હદ સુધી અસર કરી શકે છે. ચીન ભારતના વિકાસને પડકાર તરીકે જુએ છે. તેને મર્યાદિત કરવા માટે ચીન ભારત પર સૈન્ય, આર્થિક, દરિયાઈ અને અન્ય પ્રકારના દબાણ લાવી રહ્યું છે.

સરહદ વિવાદ ભારત-ચીન તણાવનું મુખ્ય કારણ

ચીન સાથે ભારતની પ્રતિસ્પર્ધા પાછળ બંને દેશોના પોતાના હિતો છે. આ દરમિયાન ભારત-ચીન સંબંધોમાં સીમા વિવાદ અત્યાર સુધીના તણાવનું સૌથી મોટું કારણ રહ્યો છે. 2020માં ગલવાન ઘાટીની અથડામણો એક મોટો વળાંક સાબિત થઈ હતી. ત્યારબાદ ભારત સીમા વિવાદને ચીન સાથેના પોતાના વ્યાપક સંબંધોથી અલગ રાખવા તૈયાર નથી.

ભારત-ચીન સંબંધોમાં સુધારા છતાં અવિશ્વાસ યથાવત

2020ના 4 વર્ષ બાદ એટલે કે 2024ના અંતથી ભારત અને ચીને ધીમે ધીમે પોતાના સંબંધો ફરી સામાન્ય બનાવવાના પ્રયાસો શરૂ કર્યા છે. જોકે, આ પ્રયાસો છતાં બંને દેશો વચ્ચે અવિશ્વાસ યથાવત છે. ભારતનું માનવું છે કે વ્યાપક સ્તરે સામાન્ય સંબંધો પુનઃસ્થાપિત કરવા માટે સરહદ પર શાંતિ હોવી અનિવાર્ય છે. આ મુદ્દે અનેક બેઠકો થઈ છે, જેમાં બંને પક્ષોએ સરહદી વિવાદ ઉકેલવા અને શાંતિ જાળવવા સતત પ્રયાસો કર્યા છે.

હિંદ મહાસાગરમાં ચીનની વધતી નૌસૈન્ય હાજરી ભારત માટે પડકાર

રિપોર્ટમાં જણાવાયું છે કે ચીનનો વધતો નૌસૈન્ય અને દેખરેખ વિસ્તાર હિંદ મહાસાગરમાં ભારતના લાંબા સમયથી ચાલતા વ્યૂહાત્મક લાભને પડકાર આપી રહ્યો છે. તેના કારણે ભારતીય સેનાઓ પર ઓપરેશનલ દબાણ વધી રહ્યું છે. બેઇજિંગ વધુ સ્થાયી નૌસૈન્ય તૈનાતી માટે માળખાકીય સુવિધાઓ અને લોજિસ્ટિક્સ સહાય વિકસાવી રહ્યું છે. ચીનના નૌસૈન્ય, દેખરેખ અને સંશોધન જહાજો ભારત તથા મહત્ત્વના દરિયાઈ માર્ગોની નજીક કામગીરી કરી રહ્યા છે. પેનલે વધુમાં જણાવ્યું છે કે ચીન હિંદ મહાસાગરમાં દક્ષિણ ચીન સાગરની પોતાની વ્યૂહરચનાના કેટલાક પાસાઓ અમલમાં મૂકી રહ્યું છે. તે ઐતિહાસિક અધિકારોનો દાવો કરી રહ્યું છે અને સમુદ્રની અંદર આવેલી ભૌગોલિક રચનાઓનાં નામ બદલી રહ્યું છે. આ પગલાં ભવિષ્યમાં વધુ આક્રમક કાર્યવાહી અથવા સંભવિત પ્રાદેશિક દાવાઓ માટે પાયો તૈયાર કરી શકે છે.

ચીનનો મુકાબલો કરવા ભારત-અમેરિકાના સંરક્ષણ સહયોગની ભલામણ

બેઇજિંગના પ્રાદેશિક દબાણનો મુકાબલો કરવા અને વ્યૂહાત્મક સહયોગ વધારવા માટે USCCએ અનેક ભલામણો કરી છે. કમિશને અમેરિકન કોંગ્રેસને સંરક્ષણ મંત્રી અને જોઈન્ટ ચીફ્સ ઓફ સ્ટાફના અધ્યક્ષને સૂચના આપવાની અપીલ કરી છે. તેમણે પોતાના ભારતીય સમકક્ષો સાથે મળીને હિંદ મહાસાગરમાં પાણીની અંદરની અને દરિયાઈ ક્ષેત્રની જાગૃતિ મજબૂત બનાવવી જોઈએ. કમિશને સમયાંતરે યોજાતા સૈન્ય અભ્યાસોથી આગળ વધીને કાયમી ઓપરેશનલ સંકલન સ્થાપિત કરવાની અપીલ કરી છે. તેમાં નિયમિત ગુપ્તચર માહિતી અને દેખરેખ સંબંધિત માહિતીની આપ-લે, ચીનના નૌસૈન્ય અને સબમરીન પ્રવૃત્તિઓનું સંયુક્ત ટ્રેકિંગ સામેલ છે. દરિયાઈ જોખમોનો સામનો કરવા માટે વધુ સારી પ્રક્રિયાઓ પણ વિકસાવવી જોઈએ. કમિશને ભારત-અમેરિકા વ્યૂહાત્મક નેતૃત્વ વિનિમય કાર્યક્રમ સ્થાપિત કરવાની પણ ભલામણ કરી છે, જે બંને દેશોના સંરક્ષણ, સરકાર, વ્યવસાય અને શૈક્ષણિક ક્ષેત્રના નેતાઓ વચ્ચે લાંબા ગાળાના સંબંધો વિકસાવશે.

આ સમાચાર શેર કરો

જાહેરાત