કેનેડામાં ભારતીય વિદ્યાર્થીઓની વધશે મુશ્કેલી, અભ્યાસ દરમિયાન કમાણી પર સરકારનો મોટો નિર્ણય

જસ્ટિન ટ્રુડોની સરકારે દેશની મજૂરીની અછતને પહોંચી વળવા માટે COVID-19 દરમિયાન આંતરરાષ્ટ્રીય વિદ્યાર્થીઓ પરની 20 કલાકની મર્યાદા અસ્થાયી ધોરણે હટાવી હતી.

ભારતીયો સહિત આંતરરાષ્ટ્રીય વિદ્યાર્થીઓને કેનેડામાં નાણાકીય મુશ્કેલીઓનો સામનો કરવો પડી શકે છે. કેનેડા સરકારે શિક્ષણની સાથે સાથે કમાણી પર પણ કાપ મૂક્યો છે. એટલે કે કેમ્પસ પછી તેમના કામના કલાકો ઘટાડી દેવામાં આવ્યા છે. કેનેડાના નવા નિયમો અનુસાર, હવે સપ્ટેમ્બર મહિનાથી વિદ્યાર્થીઓ દર અઠવાડિયે માત્ર 24 કલાક જ બહાર કામ કરી શકશે. આ અંગેનો નવો નિયમ મંગળવારથી લાગુ થશે.

કેનેડાના ઇમિગ્રેશન, શરણાર્થીઓ અને નાગરિકતાના મંત્રી માર્ક મિલરે સોમવારે જારી કરેલી પ્રેસ રિલીઝમાં જણાવ્યું હતું કે, "વિદ્યાર્થીઓને કેમ્પસની બહાર દર અઠવાડિયે 20 કલાકથી વધુ કામ કરવાની મંજૂરી આપતી અસ્થાયી નીતિ 30 એપ્રિલ, 2024 ના રોજ સમાપ્ત થશે."  તેમણે કહ્યું વિદ્યાર્થીઓ દર અઠવાડિયે કેમ્પસની બહાર કામ કરી શકે તેવા કલાકોની સંખ્યા બદલીને 24 કલાક કરવામાં આવી છે.

વડાપ્રધાન જસ્ટિન ટ્રુડોની લિબરલ પાર્ટીની આગેવાની હેઠળની સરકારે દેશમાં કામદારોની અછતને લઈને કોવિડ-19 રોગચાળા દરમિયાન આંતરરાષ્ટ્રીય વિદ્યાર્થીઓ માટે 20 કલાકના કામના કલાકોની મર્યાદાને અસ્થાયીરૂપે માફ કરી દીધી હતી. આને કારણે વિદ્યાર્થીઓ દર અઠવાડિયે 20 કલાકથી વધુ 40 કલાક સુધી એટલે કે પૂર્ણ સમય સુધી કામ કરતા હતા અને તેમાંથી વધારાના પૈસા કમાતા હતા. CTV ન્યૂઝ અનુસાર, આ છૂટ મંગળવારે સમાપ્ત થઈ રહી છે.

ભારતીય વિદ્યાર્થીઓ માટે કેનેડા સૌથી પસંદગીનું સ્થળ છે. કેનેડિયન બ્યુરો ઓફ ઈન્ટરનેશનલ એજ્યુકેશનના 2022ના રિપોર્ટ અનુસાર, તે વર્ષે કેનેડામાં 3,19,130 ​​ભારતીય વિદ્યાર્થીઓ હતા. કેનેડાની કોલેજો અને યુનિવર્સિટીઓમાં અભ્યાસ કરતા આંતરરાષ્ટ્રીય વિદ્યાર્થીઓમાં ભારતીયોની બહુમતી છે.

કેનેડિયન એલાયન્સ ઓફ સ્ટુડન્ટ એસોસિએશન્સ (CASA) ના એડવોકેસી ડિરેક્ટર મેટ્યુઝ સલમાસીએ જણાવ્યું હતું કે "આ જાહેરાત પછી 200,000થી વધુ આંતરરાષ્ટ્રીય વિદ્યાર્થીઓ દર વર્ષે સરેરાશ ઓછામાં ઓછા $5,000 અથવા 4.17 લાખ રૂપિયા ખિસ્સામાંથી ગુમાવશે"