બ્રાઝિલ/  સાંબેલાધાર વરસાદ અને ભૂસ્ખલન, 37ના મોત, 600થી વધુ સૈનિકો અને 12 વિમાન બચાવ કામગીરીમાં રોકાયા 

બ્રાઝિલના દક્ષિણ રાજ્ય રિયો ગ્રાન્ડે દો સુલમાં ભારે વરસાદ અને ભૂસ્ખલન થઈ રહ્યું છે. રાજ્યપાલે તેને અત્યાર સુધીનો સૌથી વિનાશક વરસાદ અને ભૂસ્ખલન તરીકે ગણાવ્યું છે. રિપોર્ટ અનુસાર આ દુર્ઘટનાને કારણે મૃત્યુઆંક 37 પર પહોંચી ગયો છે અને 74 લોકો ગુમ હોવાનું જાણવા મળ્યું છે. મૃત્યુઆંક વધી શકે છે.

રાજ્યપાલ અને રાષ્ટ્રપતિએ ચિંતા વ્યક્ત કરી

રાજ્યમાં વરસાદ અને ભૂસ્ખલનથી લોકોને ભારે હાલાકીનો સામનો કરવો પડી રહ્યો છે. અનેક મકાનો અને પુલ ધરાશાયી થયા છે. ધરાશાયી થયેલા મકાનો, પુલ અને રસ્તાઓના કાટમાળ વચ્ચે ફસાયેલા લોકોને શોધવા માટે ઈમરજન્સી ઓપરેશન શરૂ કરવામાં આવ્યું છે. બચાવ કાર્ય ચાલુ છે અને મૃત્યુઆંક વધી શકે છે. સ્થિતિને જોતા ગવર્નર એડ્યુઆર્ડો લેઈટે કટોકટીની સ્થિતિ જાહેર કરી છે.

ગવર્નર એડ્યુઆર્ડો લેઈટે કહ્યું, 'અમે અમારા ઈતિહાસની સૌથી ખરાબ આપત્તિનો સામનો કરી રહ્યા છીએ. બચાવ કાર્ય ચાલુ છે પરંતુ અફસોસની વાત એ છે કે મૃત્યુઆંક વધી શકે છે. પ્રમુખ લુઇઝ ઇનાસિયો લુલા દા સિલ્વાએ અસરગ્રસ્ત વિસ્તારને સંપૂર્ણ સમર્થન આપવાનું વચન આપ્યું છે અને ખાતરી આપી છે કે ખરાબ હવામાન પરિસ્થિતિઓને કારણે થતી સમસ્યાઓને ઘટાડવા માટે માનવ અથવા ભૌતિક સંસાધનોની કોઈ અછત રહેશે નહીં.

600થી વધુ જવાનો રાહત કાર્યમાં લાગેલા છે

બચાવ અને રાહત કામગીરીમાં મદદ કરવા માટે 626 સૈનિકો સાથે 12 એરક્રાફ્ટ, 45 વાહનો અને 12 બોટ તૈનાત કરીને સંઘીય સહાય પહેલેથી જ એકત્રિત કરવામાં આવી છે. રસ્તાઓ સાફ કરવા, ખોરાક, પાણી અને ગાદલા જેવા આવશ્યક પુરવઠોનું વિતરણ અને વિસ્થાપિત વ્યક્તિઓ માટે આશ્રયસ્થાનો સ્થાપવા પર ધ્યાન કેન્દ્રિત કરવામાં આવ્યું છે.

દરમિયાન, રાજ્યની મુખ્ય નદી ગુઆઇબા ચિંતાજનક સ્તરે પહોંચવાની આગાહી છે. જો આમ થાય તો પૂરની સ્થિતિ સર્જાઈ શકે છે અને સ્થિતિ વધુ ચિંતાજનક બની શકે છે. હવામાન એજન્સીઓએ ખતરાની ચેતવણી જારી કરી છે. વરસાદને કારણે ઘણા સમુદાયો સાથેનો સંપર્ક તૂટી ગયો છે અને જાન-માલને નોંધપાત્ર નુકસાન થયું છે.

પરિસ્થિતિને જોતા લોકોને તે જગ્યાઓ ખાલી કરવા માટે કહેવામાં આવ્યું છે જ્યાં જોખમ વધારે છે. લોકોને પીવાનું પાણી પણ મળતું નથી.